52
Tameuh my Jerusalem mary ai atleu ai nai satang
1 Jerusalem mary awi, nang ly atho alo teang ly lo-pa teang jau ba!Ref 52:1: Amt 21:2, 27
Tameuh i mary pui kachai awi, nangmy ai phum-ang hawi khiu ba!
Pri takhra chochi ly mo mang y mana khala py, nang i apai pa-kho theung y kun u ai ny y.
2 Aw Jerusalem mary! Nangmy my ai atho sa iy, law tleaung ai nai so.
Spryh theung i nai ang thau iy, nangmy i areng atehra y ateh ba!
Langheng y hawi nai Zion mary i khumichi awi!
nangchi ai ang kawm nai sengkrychi su u pawn jau.
3 Areng my mymy i khumichi teng y, “Nangchi ai tangka hawi jo y teu i py, miseaung lawm u bo. Hunai kamta ly nangchi ai atleu nai py, vang tla ai ny y. Nangchi ly jawm naimy law tleaung naira nga u ai.
4 Tlenrei khala nangchi ly nangmychi ngai nai kamta Aikupta pri y cheng takhra khumichi amlawn iy awm u nai ne. Naibaly Asuria chengchi my, nangchi ai atyhtyh naimy ana u.
5 Areng my vai, Babulon pri y py hina nai kamta tym hai nai ne. Nangchi ly huni pri y ati sai py ny y pui naimy, langheng hawi naichi lawm u bo. Nangchi ai peang nai keungchi ly panui hai iy, kai i amyn y avawrei mei aniu y nai sa u, nanai thui. Ref 52:5 Rom 2:24
6 Na i py kai ly Tameuh ne, nanai kai i khumichi ly kai i amyn pany iy, nangchi teng y leu pei nai keung ly kai ne, nanai kangkhym y nangchi pany u ai.
7 Aly nai satang kahawi syn pi nai keung,Ref 52:7: Nah 1:15; Rom 10:15; Eph 6:15
savai leaungrei mawi aheung tako prei nai ai niu nai ly
khri pa-rei apu parai na ly!
Huni savai ly atleu nai satang thai hai iy Zion mary ai,
“Nang i Tameuh ly samrang ne!,” napi.
8 Mary typ nai risachi ly tao pajeng parai nai hawi
amo theu parai naimy vanrei aeu u sau bo.
Areng ly Zion mary y ang jeu ali teang ai, nanai
nichi kypkyp my niu u nai ne.
9 Jerusalem mary i phra seaungkhrang nai yhm hlauchi awi!
Amotheu naimy aeu u.
Areng ly mymy i khumichi ai awm hai nem bo.
Mymy ly Jerusalem mary ai atleu bo.
10 Areng ly chai parai nai kiu hawi, pri tleireichi mo y
mymy i khumichi ai atleu nai deaungkho y,
huni atitichi ai khaileaung pri vereichi my niu u nai ne.
11 Achura yhm i ateaung khauchi syn u nai khumi bawibawichi awi,Ref 52:11: 2 Kor 6:17
Babulon pri i dengdairei, vaimy jeu u!
Paka nai atitichinote 52:11\xk paka nai atitichi: Hebrai leu y chai y nai atitichi, nanai sai ne.\x* ai kiu hawi py, abi u dei moh.
Nangmychi ai apachai iy, mary i nai theu u.
12 Hini tlenrei ly nangchi theu awn ai nai, aly ngai ai ny y.
Nangchi ly preang ai nai atho sa u ai nai aly ngai y.
Israela chengchi i Areng Tameuh ly
nangchi ai pahawi iy, ati cheaungkhangra ama hai ai.
Ngari kamtang avum nai miseaung
13 Areng my,
“Kai i miseaung ly my i sa nai kalopra y cheng parai naimy sa ai.
Ni ly palo nai avum iy tahm pasang naira nga ai.
14 Khumichi ly ni ai niu nai khala y, phailo seaung u bo.
Ni ly khri pa-rei mo-cha phra nai deaungkho y, khumi hawi py atawm y na bo.
15 Na i py vai, ni ly khumi cheng cheaungkhangchi ai chai hai ai.Ref 52:15: Rom 15:21
Samrangchi py mynkym u ai.
Nichi ly mana khala py pany vai y nai hawi
thai vai y naichi niu iy, pany u thai ai,” napi.