50
1 Areng my,
“Aju akhai vui nai neampacho kamta kai ly kaimy i khumichi ai
kapatheu pawn bo, nanai nangchi athang khai u a?
Huna nai akhai lawh baly, akhai nai chachi ly ma mang y awm mo?
Amy i cho chanauchi ai miseaung y jo vui nai kamta,
kai ly nangchi ai langheng palawn iy jo vui bo, nanai nangchi athang khai u a?
Nangchi ai patiu iy hawi pawn nai avum u nai ly nangmychi i kamngolai ne.
Nangchi ly nangmychi hawi y sa nai molam y ang patheu nai ne.
2 Kai ly kaimy i khumichi ai atleu ai nai jeu nai thym khala y,
ati mana nai y nichi ly kai ai ka-vum so u y lawh mo?
Kaimy palau nai khala, ati mana nai y pathang u y lawh mo?
Kai ly nichi ai atleu pajau y na pa-rei, atho di nai sai a?
Kaimy pangli ai leu pei baly tui kang hai pajau.
Tavochi ai khutaha daichi ka-vym lawm hai vui pajau nai ne.
Huni tavochi ra y tui by y nai deaungkho y, ngochi ly dei be bo.
3 Kani khusang ly khumi kadei i vui y paleung si vo tangam nai
ka-ma-ra patei nai kamta, veng khiu na pa-rei kai ly sa thai.”
Areng i miseaung ly leu tangai nai
4 Atho bai nai khumi ai atho awm teang ai nai mana atho pei ai mo, nanai
kai Areng my leu pei nai ne.
Mymy thui pi ai naichi tangai ai nai
mymy ly kai ai khawn tleirei, awn hai na bo.
5 Areng ly kai ai pany thai naira pei nai deaungkho y,
kai ly mymy ai tiu ai ny y.
Mymy teng i nai py amphri vui y ai.
6 Kai ly kai ai pakhau nai khumichi teng y nithun anam amteng pi nai ne.Ref 50.6: Mt 26:67; Mk 14:65
Kai i labeaung muichi aprei chum baly,
kai i meimai y pachi pathawi iy, kai ai nichi my ana nai khala,
kai ly nichi ai paka y leang.
7 Na i py Areng ly kai ai sabawm nai deaungkho y,
nichi i ana nai ly kai i tlang tleaung y
patang naira tym hai y leang.
Hunichi ai kham pajau ai nai, kai ly khamta bo.
8 Tameuh ly kai i sahawi y awm iy,Ref 50:8-9: Rom 8:33-34
kai teng y kamngo by y nai sai ka-ma-ra patei pi ai nai deaungkho y,
kai ly tahm anem ai ny y, nanai pany.
Kai ai neng hai vam nai khumi leaungrei awm lawh baly, jeung y chei u sina!
Huni khumi ly my i neng hai nai sai syn ryp sy!
9 Areng mymy kypkyp my, kai mang y asa hai ai i,
kai teng y kamngo awm, nanai ami my pany hai nai ka-ma-ra patei pajau ai mo?
Kai ai neng hai nai khumi ngiereichi ly tama veng ai.
Nichi ly thaikem my cha nai ateaung kamta phra ai.
10 Areng ai tahm khai iy, mymy i miseaung i leu tangai nai khumichi awi,
nangchi i tako ai nai lam ly veng py veng lym ai.
Na i py nangchi ly Areng ai ym u;
Nangchi i Tameuh ai paleung pado u.
11 Khumi takhrachi ai tamyh pawn ai nai dawn paviu nai khumi bawibawichi awi,
nangchi ly nangmychi i dawn paviu nai hawimy, myh kang u ai.
Areng mymy kypkyp my, hini atitichi tym hai ai.
Nichi ly ngari kamtang avum u ai.