33
Sabawm ai nai chiu sa nai
1 Achi i paleung ka-echi ly taham si! Amychi ai ami py tiu y, vaineng taphra u teu i py, nichi my tiu iy vaineng takan u lawh bo. Na i py nichi my tiu iy vaineng taphra nai neng kani kheih nai neng tym ai. Huna nai khala y nichi ly tiu nai hawi vaineng taphra nai avum u ai.
2 Aw Areng, kaichi ai pahen kyh ba. Kaichi ly nang ai kadeaung nai ne. Kani tleirei kaichi ai ama hai iy, patang naira tym nai neng khala atleu kyh ba.
3 Nang ly kaichi mang y asa hai iy atiu pi nai khala, paleung ka-echi ly tavai atiu nai katynchi molam y preang u bo.
4 Nichi i yhmtheaung katuichi ai py, tavai atiura i abawi nai vawnsaichi kamta palawn iy, lawm pi pawn nai avum u ai.
5 Areng ly khri pa-rei nang parai na ly! Mymy ly ati cheaungkhangchi ai peang nai ne. Jerusalem mary y leu meitang adyh adawi naira hawi py, hawi naira hawi py angym hai iy,
6 Israela chengchi ai khaw parai naira pei ai. Mymy ly mymy i khumichi ai avawrei ama hai iy, cheng naira hawi pany thai naira pei pi. Nichi i vang teng keh nai yhmtheaung katui ly Areng ai tahm khai naimy jei kaji nai ne.
7 Khumi soraichi ly kasabawmra hnei u lawh bo. Tavai atiu y ai nai atho sa nai savaichi ly khrikhri pa-rei vo u bo.
8 Lam manglai puichi ly ka-jeira khri pa-rei nawi nai deaungkho y, ami py tako u vam y. Amsawi amnai asa naichi taphra iy, leu meitang adeu naichi py phra veng bo. Ami my py tahm khai nai avum u y leang bo.
9 Huni pri py jengha iy khumi angso savaitlang veng bo. Lebanon daichi py aurui na veng bo. Khaileaung khuta hawi nai Sharon leaunghawi py, tui by y nai daichi ka-vym kamta lawm iy, Basen mawi hawi Karamela mawi y awm nai dengkeaung keungchi ly ngam vui be veng bo.
Paleung ka-echi ai Areng my pany hai pi nai
10 Areng ly khumi cheng cheaungkhangchi teng y, “Vai, kai ly bawi la iy kang sa ai. Kai i sa thai naira len nai kang patei pi ai.
11 Nangchi ly ati sai py ny y nai ka-dawnchi sa u bo. Nangchi i atiti sa naichi py atyhtyh teu. Kai i phailo ly mai kamta ne i, nangchi ai taphra ai.
12 Nangchi ly theung palawn ai nai mai paawp nai lengseaung kamta py, maidym lawm pa-rei kang nai aleng keung kamta py, dei lawm u veng ai.
13 Kamlo kangsara y awm nai khumi ngiereichi ly kai i sa nai satangchi thai iy kai i sa thai naira pany u na mang,” napi.
14 Kamngo sa nai Zion mary i khumichi ly jei hyn naimy awm u nai ne. Nichi my, “Tameuh i tara chih nai ly angveaung jojo nai mai hawi atawm. Huna nai mai theung i achi law tleaung iy, dei y naimy awm na a?,” nanai thui u bo.
15 Nangchi ly leu kateng thui katheu u ai nabaly, dei y naimy awm pajau nai ne. Khumi kamawnchi ai li-tapawp ai nai, nangchi i sa thai naira teaung u moh. Un langseaungchi py talam u moh. Khumi ai padei ai nai, takhra hawi y naichi sa ai nai ka-dawn awm naichi hawi amkawm u moh.
16 Huna i naini nangchi ly ka-dawn eaung iy, khaw parai nai lengseaung yhm y awm nai kamta chymme ai. Cha nei ai nai teicha teineichi py nga u ai.
Apu parai nai mo mang i neng
17 Nangchi ly khri pa-rei kau parai nai khu ka-peang theung y, nang parai naimy peang nai samrang leaungrei ai niu u ai.
18 Cheng takhra khumi akeu cheaung naichi hawi, khen paviu naichi ai nangchi jei u nai ly jangni i sa nai saichi naini palawn ai.
19 Nangchi ly thai kawp y nai leu katheu nai khumi hawi, paleung len amlyh nai cheng takhra khumichi ai niu u ai ny y leang bo.
20 Achi i reita pawichi sa nai Zion mawi ai khen u; Jerusalem mary ai khen u! Huni mary ly chymme naira awm iy khri pa-rei awm ai hawi parai nai mary ne na a! Huni ly paran nai khangmuichi mana khala py aphiu vui y naimy, khaw jojo nai vuinawnchi hawi jeng iy mana khala py kasyh ai ngo y nai kanih tangbeung hawi atawm ai.
21 Areng ly mymy i nang parai nai sai achi niu ai nai pei ai. Achi ly tavo pui, micheaung puichi sahawi y awm ai nai nga u ai. Na i py huni tavo puichi ra y paleung ka-echi i paleaung hawi samphochi, so kathiu, so kalau ai nai nga u ai ny y.
22-23 Huni paleaung, samphochi i alika teang hawi vuinawnchi ly asu vui i, alika py kadai ai nai ngo y lawh ly! Paleung ka-e tavaimichi teng i vawnsaichi lawm u ai. Huni vawnsaichi ly nawi parai nai deaungkho y, kheu kangbaichi malawn py mychi i vui phy nga u ai. Areng mymy kypkyp py, achi i samrang lawm ai. Mymy ly achi ai peang iy ama hai ai.
24 Achi i pri y awm u nai khumi bawibawichi ly noso keaungno awm, nanai mana khala py tangam u ai ny y. Kamngo awm nai ngiereichi py lawi naira nga u ai.