32
Leu meitang awm nai samrang
1 Kanirei nai khala y leu meitang teaung nai samrang leaungrei hawi, ka-dyh ka-dawi naimy peang nai cheng i vui lu sa naichi amthawn ai.
2 Nichi bawibawi py ali hawi alipui khupuira i nai abyh nai meingtym kamta lawm ai. Nichi ly khutaha meingtymra y leaung nai tavo micheaungchi hawi py, ati sai py prau y nai kani kabira y awm nai lengseaung pui ka-khui hawi py atawm ai.
3 Nichi ly mipuichi i avaw naichi pany ai nai, mei karang, kano ha naimy awm ai.
4 kado theu nai paleung hawi so y naimy tau kacheng hawi sa iy, meitang khyp katheu u ai.
5 Khumi ka-khumchi ai tahm awm nai khumichi nanai py, khumi hawi y naichi ai khumi kahawichi nanai py, ami py athang khai iy thui u ai ny y.
6 Khumi ka-khum ly ka-khum leu katheu iy, hawi y nai atitichi sa ai nai dawn pasym reng. Ni i sa nai kalop hawi ni i katheu nai leuchi ly Areng ai khumi aniu y nai sa nai ne. Ni ly kajeu alam naichi ai mana khala py pacho y; tui ahai naichi ai mana khala py tui panei y.
7 Ni ly khumi hawi y nai ne i, hawi y nairachi naini sa thai khyh. Khumi kamawnchi i nga ai avo naichi ngo y vui ai nai, li-tapawp iy dawn pasym reng.
8 Na i py khumi kahawichi ly paleung kahawi naimy sa iy, kateng lam mang y angdo hai reng nai ne.
Tara chih nai hawi sa palum teang nai
9 Paleung kabi paleung ka-mawn by y nai, paleung savairu nai neampachychi awi, kai i leu tangai u.
10 Nangchi ly vai, paleung tienem naimy awm u teu i py, amlo hini neng y paleung phra u ai. Ati mana nai mo nabaly nangchi pakym achu ai nai kreip athaichi nga u ai ny y nai deaungkho y ne.
11 Nangchi ly paleung kabi paleung ka-mawn by y iy, paleung savairu naimy awm u bo. Na i py vai ly jei hyn naimy awm u! Nangchi i ateaungchi aleng iy akeng y kanih kamawnchi apam u.
12-13 Amti amjang thawn nai li khaileaungchi hawi kreip akhochi ly phra pawn veng nai deaungkho y py, kai i chengchi i khaileaung meingtymchira y aleng keung cheaungkhangchi my khiu cheng nai deaungkho y py, nangchi ly paleung si paleung mawn naimy, nangmychi i paleung atum u. Vaichi khala y khumichi amo theu naimy awm u nai yhmchi hawi, lo-pa sareaung hawi nai mary i vui vo u.
14 Samrang i yhm malawn py huni my tlairei awm su iy, mary pui ly khumi angso savai tlang naimy awm ai. Huni mary pui y typ nai amtangrachi hawi yhmchi py, deungrei phra naimy awm jo ai. Huni meingtym y keaungngo kano kasau karamchi tlumtlai iy, beramchi teicha tlai u ai.
15 Na i py Tameuh ly mymy i phailo ai achi teng y pato pi ali teang ai. Huna nai khala y khaileaung ka-keuchi ly khaileaung kahawichi lawm iy, li khaileaungchira i amti amjangchi neangneang theu ai.
16 Pri theung i meingtym tleirei y khumi kahawichi i kahawi lam hawi, leu meitang adyh adawi nai teaung u ai.
17 Khumi bawibawichi ly kateng sa u nai deaungkho y,deungtasa tlamsa nai hawi chymme naimy awm u ai.
18 Tameuh i khumichi awm nai yhmchi ly chymme naimy awm ai. Huni khumichi py paleung kabi, paleung ka-mawn by y ai.
19 (Dengkeaung thengreungchi salo y jichi tla ai; mary py phra ai.)
20 Amti amjangchi hawi keaungngo kano kasau, si paino sui tlairachi vui tui ka-leu nga nai deaungkho y, khumi bawibawichi ly amo theu u ai.