31
Jerusalem mary ai Areng my ama hai nai
1 Aikupta pri mang y kasabawmra hnei ai nai chei naichi ly taham si! Nichi ly keaungngochi, tavai ka-richi hawi keaungngo atang nai risachi, napi nai Aikupta pri i tavai atho len nai ai ym u nai ne. Na i py Israela chengchi i chai parai nai Areng Tameuh ai ly ym u y. Kasabawmra nga ai nai mymy teng y py hnei u y.
2 Mymy ly mymy i sa reng nai kalop ai pany na a! Mymy ly khri pa-rei ka-jeira tym hai bo. Khumi hawi y naichi hawi nichi ai ama hai nai khumichi ai pajeng ai nai leumo pei nai kamta sa nai ne.
3 Aikupta chengchi ly vawinam arengchi ny y. Khumi mangrichi teu na a. Nichi i keaungngochi py vawinam keaungngochi ny y. Areng my bawi la nai khala y, atho len nai cheng ly dei lawm vui ai. Kasabawmra nga nai khumi chengchi py anawi vui ai. Huni khumi cheng amjy nyhrei py myh kang vui ai.
4 Beram typ nai keungchi my man tanrei hang hai teu i py, mawi kei nai khrangsi ai pajei ai nai ngo y nai kamta, Zion mawi y kry nai ati cheaungkhang sa thai nai keung Areng ai ati my py paka pajau ai ny y.
5 Tavo ly my i tabu salo mang akheang taki naimy cho ai kry nai kamta, ati cheaungkhang sa thai nai keung Areng ly Jerusalem mary ai ama hai iy, paleung ka-echi ai tiu ai,” nanai kai ai leu pei nai ne.
6 Areng my, “Aw Israela chengchi awi, nangchi ly kai i tlang tleaung y kamngo sa iy, ka-awi sa u. Na i py vai, kai teng y ali u teang jau!
7 Nangchi bawibawi py, nangmychi i sa nai amso ngai nai muku tangka mynchi ai aphi vui nai neng kani tym ai.
8 Asuria pri ly tavai sum ai. Na i py khumichi i sa thai naira haiho molam y ny y. Asuria chengchi tavai keung i nai angpreng u ai. Nichi i thawndeang deaungdichi py miseaung y achei u ai.
9 Nichi i samrang py jei i, preang vui ai. Tavailu arengchi ly mychi i tavai tamkhawnchi khai u su ai,” napi. Huni ly Areng my leu pei nai ne. Mymy ly Jerusalem mary y khumichi my chiu nai Areng ne iy, mymy i mai kangveaung py tawnbawichi ai leng patlum ai nai angveaung nai ne.