30
Aikupta pri hawi amso amnai aso moh
1 Areng my, “Juda pri y peang nai khumichi ly taham si! Ati mana nai mo nabaly, nichi ly kai ai niu ngai y nai deaungkho y ne. Nichi ly kai i kangai hawi athli vui nai ka-dawnchi sa iy, kaimy pei y naimy amso amnaichi asa iy kamngo harei salo y harei panawira nai sa tamang u bo.
2 Nichi ly kai teng i katau hnei y naimy, Aikupta pri y chei iy kasabawmra hnei u nai ne. Aikupta pri my ama hai naira ngai nai deaungkho y, nichi ly Aikupta samrang ai ym u bo.
3 Na i py huni pri ly nichi ai ama hai pajau ai ny y. Aikupta pri i ama hai naira py, pri phra naira mang y atlum ai.
4 Nichi i savaichi ly Aikupta pri Zoan mary hawi Hane mary mang y tym veng bo.
5 Juda chengchi ly mychi kasabawmra nga u ai, nanai athang khai u teuni ly sabawm y nai khumi cheng, ka-ym by y nai huni khumi chengchi teng y, abyh lawh nai molam y uikheih u ai.
6 Tameuh i hini leu pei nai ly tokalawi mang daichi ka-vymra y awm nai, daichi mawichi i vui ne. Mymy ly “Savaichi ly khrangsichi aeung nai meingtym, pavui kangsochi, naka kangkheangchi awm iy ka-jeira nawi nai meingtym y tako u prei nai ne. Huni khumichi ly mymychi ai ati kasabawmra py pei pajau y nai khumi cheng i vui y, vang kateng langseaungchi ai keaungngo kano kasauchi, kula-iuchi hawi tang iy syn u bo.
7 Aikupta pri i pei nai kasabawmra ly ati sai py ny y leang. Hunai deaungkho y kai ly Aikupta pri ai ‘Thailai by y nai naka,’ nanai amyn pathi pi bo,” napi.
Leu atangai y nai khumi cheng
8 Tameuh my, “Huni khumichi ly ati mana nai khumi cheng mo, nanai kangkhym y pany jo nai ka-ma-ra awm jo ai nai cha-iu harei theung y tajiu typ ba,” nanai kai ai ang thui pi nai ne.
9 Nichi ly Tameuh ai avawrei tiu naimy, avawrei tapawp naimy, Areng i leu ai avawrei akhi naimy awm u nai ne.
10 Amochi ai py awm u pypy ai nai thui pi u bo. Nichi my, “Kaichi teng y leu kateng thui pi u moh. Kaichi thai ai ngai nai leu thui pi u. Kaichi ai kaimychi i tamang nai ka-dawnchi hawimy awm hai jo teu sy.
11 Kaichi lam i nai aheng u; kaichi i lam paka u moh. Nangchi my chiu iy Israela chengchi i chai parai nai Tameuh satang, kaichi thai ai nai ngai y,” nanai thui u bo.
12 Na i py Israela chengchi i chai parai nai Tameuh my, “Nangchi ly kai i leu tahm khai u y naimy, khrukhra naira hawi tapawp naira naini a-ym u bo.
13 Nangchi ly kamngo pajeng ai ataing naichi ne. Nangchi ly akoprei nanai lengseaung apai ka-sang pui kamta, vaimy anawi u ai.
14 Laawm phei ka-kawi hawi mai-aichi akhui ai nai py, chy-y theung y pani iy tui vei ai nai py, ngo pajau y pa-rei kawi seaungkhrang nai alai laawm hawi atawm u ai.
15 Israela chengchi i chai parai nai Areng Tameuh my khumichi teng y, “Nangchi ly kai teng y vawi iy kajeaung kaji naimy kai ai ym u. Hunaibaly nangchi ly atho ham naira nga iy, atleu naira nga u ai,” napi. Na i py nangchi ly tangai u y!
16 Huna nai tangai ai nai tleaung y ly rang parai nai keaungngochi atang iy, paleung ka-echi teng i dengdairei preang ai nai dawn pasym u nai ne. Nangchi i ka-dawn ly hawichy y! Ati mana nai mo nabaly nangchi ly preang u takengkei ai tla nai deaungkho y ne. Nangchi ly nangmychi i keaungngochi ai rang parai, nanai athang khai u teu i py, nangchi ai ang hui nai nichi i keaungngochi ly rang keh ai.
17 Paleung ka-e leaungrei ai niu baly, nangchi teng i khumi leaung sangrei preang u ai. Paleung ka-e leaung pangrei nabaly, nangchi bawibawi malawn py preang u ai. Mawi saleung y tamkhawn my tlairei leng jo nai ny y baly, nangchi tavaimi theung i ati sai py awm jo ai ny y.
18 Na i py Areng ly nangchi ai pahen iy sabawm ai nai ajeng nai ne. Mymy ly ka-dyh ka-dawi sa pi jojo nai ne i, nangchi ai pahen pi ai nai ajeng rym bo. Areng ai ym nai khumichi ly taham hawi nai ne.
Tameuh ly mymy i khumichi ai amtheaungra pei ai nai satang
19 Jerusalem mary y awm nai khumichi awi, nangchi ly vo pi u ai ny y. Areng ly pahen nai ne. Sabawm naira nga ai nai mymy teng y nangchi a-au u nai khala y, mymy ly tangai iy pathang pi ai.
20 Areng ly nangchi ai hawi y nairachi avum hai ai nai ne teu i py, mymy naimy nangchi hawi vanrei awm iy lam patei pi ai. Nangchi py mymy ai hau ai nai aly ngai y leang bo.
21 Langvawi mang y, ti y baly lamtang mang y nangchi lam tamang u nai khala y, “Lam kateng ly hini ne; hini lam kataw tako u,” nanai nangchi nithun mang mymy i leu pei nai raawi thai u ai.
22 Nangchi ly tangka hawi sa nai mynchi, muku hawi paleaung nai mynchi la iy, “Kaichi mei keung i nai theu u la!,” nanai thui iy chainem y nai kamta aphi vui ai.
23 Nangchi amti amjangchi pati u nai neng tleirei y prau hai ai nai, Areng ly kani nai hai ai. Nangchi tyn ai nai amti amjangchi thawn hai iy, si, painochi py sui tlaira ka-leu nga ai.
24 Nangchi i li khaileaungchi thawn pi nai sichi, keaungngo kano kasauchi ly hawi keh, chai keh nai teichachi cha ai nai nga ai.
25 Nangchi ly paleung ka-echi i amtangrachi taphra vui iy, nichi ai padei pawn nai khala y, mawi hawi mawi aheung awm nai tleireira i micheaung tuichi ly leaung kathiu ai.
26 Lo ly kanito tanrei angvang naimy, kanito py kanito saryhrei vanrei theu nai kamta, kari tleaung y phy saryhrei angvang na ai. Mymy ly mymy i khumichi nga nai tamo kalemchi ai kanih hawi bam iy, tamochi ra y asi sa pi nai hawi nai khala y, hini atitichi ly tym ai.
Asuria pri y Areng my pajeng ai nai satang
27 Areng i sa thai naira hawi nang parai naira ai kamlo mang my niu pajau nai ne. Mai kangvang hawi maikhyhchi ly mymy i kado theu nai sai patei pi bo. Mymy leu pei nai khala y labeaung mang theu nai leuchi ly mai kamta kang hai bo.
28 Mymy ly ali aho hai ai. Huni ali ly ati cheaungkhangchi ai amjau hai pawn nai tavo tui lem nai kamta, khumi cheng cheaungkhangchi ai tama hai pawn iy, nichi i hawi y nai katauchi phra hai ai.
29 Na i py Tameuh i khumichi awi, nangchi ly vum y sa nai reita pawi kamta, amo theu naimy khulym thui u ai. Nangchi ly Israela chengchi i abyh nai keung Areng i Achura yhm mang y chei nai lam y, byhlyh katyn hawi kamlym tako u nai khumichi kamta amo theu u ai.
30 Areng ly khumi bawibawichi teng y phum-ang angym nai raawi thai hai iy, mymy i kado theu nai haiho avum hai ai. Mai kadeu kangveaungchi, kani pajyh nai, ji amaichi tla nai hawi, khri pa-rei kani nai hai ai.
31 Asuria chengchi ly Areng i raawi thai nai khala y, jei hyn naimy mymy i pajeng nai avum u ai.
32 Areng my nichi ai avawsadym pakhau nai khala y, mymy i khumichi ly taro teaungteng katyn, pengpeng katynchi kamlym beu u ai. Tameuh mymy kypkyp py Asuria chengchi ai tiu ai.
33 Jangni khala y my Asuria samrang ai mai hawi patawi ai nai, patawira yhm sa yb nai ne. Huni patawira yhm ly tamdo thiu iy kau bo. Huni meingtym y thengheaung pui ka-sang harei py awm. Areng ly labeaung mang dengdairei mai kangveaung patheu iy, huni thengheaung ai mai amtawi i, kang hai ai.