29
Jerusalem mary i khym taham
1 Tameuh i maicham napi nai Jerusalem mary malawn py taham si! Davida i tavai taira mary ly taham si! Huni mary y sanengrei, saneng nyhrei pawichi sa naimy awm u rai sy,
2 naibaly Tameuh ly “Tameuh i maicham,” nanai amyn pathi nai mary y ka-jeira naini tym hai ai. Khumichi ly vo tangam u ai. Mary verei py kapathyprachi talam nai maicham lawm vui ai.
3 Tameuh ly huni mary y tiu naimy katanmeuh iy peang vui ai.
4 Jerusalem mary ly tapreaung angawm theung y leu katheu ai nai atho sa nai namli hawi atawm ai. Huni mary i katyn py speung theung i dengdairei, sailang amny y nai raawi kamsyh y theu nai katyn lawm ai.
5 Aw Jerusalem mary, nang ai tiu nai cheng takhra khumichi ly spryh kamta py, nichi i ka-jei hawi parai nai tavaimichi ly choh ali kamta py, vaimy ahei u pawn ai.
6 Ati cheaungkhang sa thai nai Areng ly ali pui khu puichi, kalei theu hai naichi hawimy katyn amsau iy nangchi ai atleu ai. Mymy ly ali kamchaichi hawi mai kadeu py pato ai.
7 Huna nai khala y Tameuh i maicham mary y tiu u nai tavaimi bawibawichi hawi, nichi i tavai ateaung awm nai ngiereichi ly amang kamta py, vum y paleung adawn pasym atyhtyh nai kamta py, tama vui ai.
8 Jerusalem mary y tiu u nai khumi cheng cheaungkhangchi ly amang mang y teicha teineichi cha ai nai nga iy, anglaw nai neng khala y kajeu alam kari alam veangveang nai kamta py, amang mang y tui nei iy i anglaw nai neng khala tui ahai nai ly tui ahai veangveang nai khumi hawi py atawm ai.
Pany hai nai leuchi ai ami py tangai pi y nai
9 Nangchi ly tau akhum naimy awm u! Mei paju naimy awm u! Kreip hang nei y naimy pavui u! Amjawnreichy py nei y naimy atlym khikha u!
10 Areng ly nangchi ai rai y naimy i hai vui ai. Amochi ly khumichi i mei lawm ai nai avo teu i py, Tameuh ly nichi i mei tamym pi vui bo.Ref 29:10: Rom 11:8
11 Paleung mei hawi niu nai ngiereichi i awm nai saichi ly pajawp typ nai cha aeang kamta, nangchi i vui khiu pi vui ai. Cha phain kawp nai khumi leaungrei teng y nangmy phain hai lawh baly, huni khumi my, “Hini cha aeang ai pajawp hai typ nai deaungkho y, kai ly phain ai nai ngo y,” nanai thui ai.
12 Cha phain kawp y nai khumi ai phain hai i py, huni khumi my, “Kai mana phain ai mo, pany y,” ang napi ai.
13 Areng my, “Hini khumichi ly kai ai labeaung mang ly kang chiu bo, nanai thui i py, nichi i leuchi ly ati sai py ny y. Nichi i paleung py meingtym takhra mang y apei vui nai ne. Nichi i reita ly khen y naimy thui kawp nai khumichi i tanyn hawi, reitachi naini lawm bo. Ref 29:13: Mt 15:8-9; Mk 7:6-7
14 Hunai deaungkho y kai ly nichi athang khai y nai patang naira harei chum baly harei tym hai iy, nichi ai jei hyn hai ai. Khumi kachengchi ly khumi hawi y naichi lawm u be iy, nichi i tau cheng nai ngiereichi py, nichi ai ati sai py hawi hai ai ny y,” nanai leu pei bo.Ref 29:14: 1 Kor 1:19
Mo mang i vui athang khai naira
15 Areng teng y amychi i dawn pasym naichi apha vui ai nai atho sa nai khumichi ly taham si! Nichi ly mychi i dawn tau naichi kangviu y sa nai ly amychi ai ami my py niu ai ny y; amychi i atitichi sa naichi ai py ami py pany ai ny y, nanai athang khai u.
16 Nichi ly ati cheaungkhangra y athli hai piupa reng nai ne. Laawm beu nai keung hawi laawm khaileaungchira y, ami aly len keh mo? Khumi i kiu hawi sa amcheang nai harei my khumi teng y, “Kai ai nangmy sa nai ne a?,” nanai py, “Nang ly nangmy i kalop ai pany y,” nanai py thui pajau na a?Ref 29:16: Is 45:9
17 Thui achih awm nai kamta, kra y nai sala y my daichi thengreung ly li khaileaung lawm ai; li khaileaung py daichi thengreung lawm ai.
18 Huni neng kani tym nai khala y, kano kapangchi ly cha phain nai katyn thai ai. Kaveng theung y awm nai mei kamjuchi ly mei angvang iy niu u ai
19 Khumi kamawnchi hawi tahm anem nai khumichi ly Israela chengchi i nang parai nai Areng Tameuh my pei nai, amo theu naira nga u ali teang ai.
20 Amichi ai ana iy Tameuh ai mei aniu y nai khumichi ly tama u ai. Kamngo sa nai khumi ngiereichi ly sum naira nga u ai.
21 Tameuh ly ami ai kangji pei naichi, reita taphra nai khumi ai pajeng naira avum y pa-rei sa vui naichi hawi, khumi kahawichi my ka-dyh ka-dawi tara chih nai lei amcheang y ai nai, ka-chawi naimy pany hai nai khumichi ai tamyh ai.
22 Hunai deaungkho y Abraham ai ngari kamtangra i atleu nai Israela chengchi i Areng Tameuh my, “Aw, kai i khumichi awi, nangchi ly kangji nga u ai ny y. Kangji nga iy meimai phra u ai ny y.
23 Nangchi ly kaimy kang pei ai nai cho chanauchi niu u ai. Huna nai khala y kai ly Israela chengchi i chai parai nai Tameuh ne, nanai nangchi pany u ai. Kai ai tahm pateng iy tahm khai naimy jei u ai.
24 Khumi ka-khumchi ly pany thai naira nga u ai. Tangam nai khumichi hawi paleung kyhchaw nai khumichi py, thui parip nai ai amo theu parai naimy tangai u ai.