28
Tosyh mang i Israela pri ai pany hai pi nai
1 Israela pri ly taham si! Mychi i cha nei ala nai lu sa nai keungchi i adeung nai kaseaung lukhym kamta, huni pri i phum-ang ly rawm naimy awm nai ne. Huni lu sa nai keungchi ly amlyh am-e naimy, mychi i lu y mui kahawi rimui amthym teu i py, nei cha ala nai y atlym u na bo.
2 Areng ly nichi ai tiu ai nai atho haiho len nai khumi leaungrei khai pi yb bo. Huni khumi ly ji akawi tla hai nai kamta py, kani satleu hai nai kamta py, paka pajau y nai tavo tui lemheu nai kamta py,jeu iy pri verei y khiu ai.
3 Huni neicha ala nai lu sa nai keungchi i amlyh am-e nai ly kheu hawi chiu piu nai avum ai.
4 Paleung len amlyh nai lu sa nai keungchi i dyhp nanai phum-ang ly myn nai hawimy jaw iy cha vui nai, neng kamtleh athai nai thaidu athaichi kamta, tama veng ai.
5 Ati cheaungkhang sa thai nai keung Areng ly dei kamthum mymy i khumichi i vui y, phum-ang nang parai nai areng lukhym kamta lawm nai neng kani ang tym ai.
6 Mymy ly tara chih nai keung sa nai khumichi teng y, ka-dyh ka-dawi sa thai nai paleung ka-dawn py, paleung ka-echi ai mary apai katheu pa-khochi ra i nai patheu vui nai khumichi teng y, sorai paleung py pei pi ai.
Isaia hawi nei cha ala nai Juda amochi
7 Amochi hawi pathyp pi nai keungchi malawn py nei cha ala nai deaungkho y atlym u khikha nai ne. Nichi ly kreip hang hawi mhm-rah nei ala nai deaungkho y, tapai taveang iy atlym u bo. Amochi ly pavui jojo nai deaungkho y, Tameuh my amteng hai naichira i awm nai sai pany thai u y. Pathyp pi nai keungchi py, mychi teng y tym nai atitichi ai tara chih pi thai y nai ne.
8 Nichi i sabawichi ly khen amnu y na pa-rei, amleuchi akau tlitlai na.
9 Nichi my, “Hini khumi ly achi ai ati palawn nai y thui parip nai mo? Ni i leu pei nai ly amichi i vui kamran awm mo? Kanu-li ang vawi nai deaungdichochi hawi naini amlau nai ne!
10 Ni ly achi ai atho sa iy kamsi kamdi, lamrei chum baly lamrei, sairei chum baly sairei patiu pi nai ne,” nanai kai i leu ai tlau u teang bo.
11 Nangchi ly kai i leu tangai u y lawh baly, Tameuh my nangchi ai hawi nai hawi y nai pany ai nai, lyh ai awm nai leu thui nai cheng takhrachi ai teaung ai.Ref 28:11-12: 1 Kor 14:21
12 Mymy ly nangchi ai chymme naimy awm ai nai pei teu i py, nangchi ly mymy i leu tangai u y.
13 Huna nai y Areng ly nangchi ai hawihai palai kamsi kamdi, lamrei chum baly lamrei, sairei chum baly sairei patiu pi ai. Hunai deaungkho y nangchi ly kheu takan nai tleirei atlym u ai. Nangchi ly tamo kalem nga iy deaung y man i, patiu nai avum u ai.
Zion i vui taki i lengseaung
14 Vai, Jerusalem mary y hini khumichi ai peang nai, nangchi amlyh am-e nai khumichi awi, Areng my leu pei nai tangai u.
15 Nangchi ly dei areng hawi amsawi amnai asa chum bo, nanai py, tavau pri hawi ka-ly nga bo, nanai py, amlyh u reng. Nangchi ly li-tapawp nairachi ai a-ym naimy chymme naira hau nai deaungkho y, ka-jeira tym nai khala py tlang hengra nga ai, nanai ym u cheng nai ne.
16 Vai, ati cheaungkhang sa thai nai keung Areng my leu pei nai ly “Kai ly Zion y khaw parai pa-rei langdeng kapala ai. Kai ly ‘Hawihai palai ym naimy athang khai nai khumi ly kham tanga naimy ajeng nai ne,’ nanai tajiu typ nai cha abawi nai, khaw parai nai taki i lengseaung ai py, huni langdengra y khai pi ai.Ref 28:16: Sam 118:22-23; Rom 9:33, 10:11; 1 Pet 2:6
17 Huni langdeng i vui adyh adawi nai suju vuinawn, kataw kateng pata nai vuinawn palawn iy teaung ai.
Naibaly kai ly ali pui khu pui kamta nangchi a-ym nai li-tapawp nairachi paleang pi pawn ai. Tavo tui leaung nai kamta nangchi i chymme nai py, phra hai pawn ai.
18 Nangchi ly dei areng hawi amsawi amnai asa nai taphra iy, tavau pri hawi ka-lyra nga nai py, taphra pawn ai nai tla. Ka-jeira ang tym nai khala y nangchi ly sum u ai.
19 Nichi ly nangchi ai khawn tleirei, ang tiu taleang ang tiu taleang bi ai. Nangchi ly vum kanithun patang u ai. Tameuh i leu pei nai tleirei y, jei hyn naimy awm u ai.
20 Nangchi ly “Theang ala nai kanih akhiu iy dawi ala nai ira kadangra y, i ai nai atho sa nai khumi,” kamta lawm u ai.
21 Areng ly Perazim mawi hawi Kibeon leaunghawira y sa nai kamta tavai thau ai. Mymy ly mymy i sa ai awm nai kalop amcheang pa-rei sa ai. Huni kalop ly aneng parai nai ne.Ref 28:21: Josh 10:10-12; 2 Sam 5:20; 1 Neng 14:11
22 Ati cheaungkhang sa thai nai keung Areng ly pri verei taphra pawn ai nai leu pacheang chum veng bo, nanai kathai. Nangchi ai kaimy kang pany hai nai ly panui hai u moh. Panui hai u lawh baly nangchi ly dei ai naira i, law tleaung ai nai khri pa-rei rai u ai.
Tameuh i cheng naira
23 Kai i thui nai tangai u; nangchi teng y kai i thui nai leu dawn patyp iy tangai u.
24 Mani li sa nai khumi py pati ai nai molam y, my i li ai avawrei thawn y leang.
25 Khaileaung palum chum iy ni ly chabana hawi zija napi nai tichi pati reng. Bali choh hawi chajai choh ai lam pajyn naimy pati iy, li angpheaung tengchira y takhra amti amjangchi pati reng nai ne.
26 Tameuh ly ni teng y cheng naira pei pi nai deaungkho y, ni ly amy i sa ai nai pany.
27 Chabana hawi zija vuichi ai tamtleang hawi pakhau iy ati vai y. Huna nai sa ai nai jeng y, avo nai thengbeangchy hawi naini chip reng khyh nai ne.
28 Ni ly chajai chohneichi phra y ai nai chohvuichi ai avaw by y pa-rei ati y leang. Chajai chohneichi tleu piupa y pa-rei ka-ri hawi mana ati ai mo, nanai pany.
29 Ni ly hini cheng naira ngiereichi ai, ati cheaungkhang sa thai nai keung Areng teng i nga nai ne. Tameuh i sa nai katauchi ly cheng naira ka-dawn angym iy eaung naira nga jojo nai ne.