2
Deungtasa tlamsa naira
(Mik 4:1-3)
1 Anui i leu pei nai ly Juda pri hawi Jerusalem mary ati mana lawm ai mo, nanai Amoz i chapo Isaia teng y Tameuh my pei nai ne.
2 Isaia my
vai mo mang i neng khala y
vai, Achura yhm awm nai mawi ly
mawi bawibawichi ai cho iy,
asang keh nai lawm ai.
Khumi cheng bawibawichi py, huni mawi y jeu u ai.
3 Nichi my,
“Areng i mawi salo y
Israela chengchi i Tameuh i Achura yhm mang y, achi lyn u sina.
Mymy i kangai amtiu u sina.
Mymy i vawi takhra pi nai lam y achi tako u sina,” nanai thui u ai.
“Areng i reita leu ly Jerusalem mary i dengdairei py,
mymy i leu ly Zion mawi salo i dengdairei py theu ai.”
4 Mymy ly khumi cheng kalenchi a-ei nai rym hai ai. Ref 2:4: Joel 3:10
Nichi py mychi i haisauchi ai li thawnra tamo,
mychi i tivichi ai changpi kalei nai akeichi lawm ai nai thip palai vui ai.
Khumi cheng bawibawichi ly mo mang y, mana khala py tavai atiu u ai ny y.
Tavai atiu u bi ai nai py aeng u ai ny y.
5 Jakob i katu chanauchi awi, vai, achi ly Areng my pei nai kangvangra y aleaung u sina!
Paleung len amlyh nai ai taphra vui nai
6 Aw Tameuh, nang ly Jakob i katu chanauchi ne nai, nangmy i khumichi ai khai su lawh ly! Nichi i pri py nisi mang i prichi, Philistin chengchi i atam kakawp teaung naichi hawi kawi na bo. Mipuichi ly pri takhra reita tanynchi teaung u nai ne.
7 Nichi i pri ly muku, tangka awm ma mang nai deaungkho y, khri pa-rei nang chawn nai ne. Nichi i pri y keaungngochi nawi parai i, keaungngo ka-richi py khrikhri pa-rei nawi parai nai ne.
8 Nichi i pri ly mynchi hawi kawi na i, khumichi ly mychi kiu hawi sa naichi ai chiu u bo.
9 Huna nai y khumi luteng ly cheh nai avum u iy, kangji nga u ai. Aw Areng, nichi ai kamngo pahen pi moh!
10 Areng i kado theu nai, mymy i sa thai naira hawi nang parai naira i nai law tleaungra nga u ai nai, nichi ly lengseaung tapiuchira y py, khaileaung angawm tai i py aheu u ai. Ref 2:10: Amt 6:15; 2 Thes 1:9
11 Khumichi i haiho jum nai neng, paleung len am-e naira dyhp nai neng tym ai. Huna nai khala Areng leaungrei naini, tahm asang naira avum ai.
12 Huni neng khala y ati cheaungkhang sa thai nai keung Areng ly sa thai naira len nai khumi, amlyh am-e nai khumi hawi paleung len nai khumi bawibawichi ai tahm panem pi vui ai.
13 Mymy ly Lebanon mawi i saitleang keung ka-sangchi hawi Bashan atura i, ngopraibiu keungchi ai tleu hai ai.
14 Mawi katheang kalenchi ai panawi vui iy,
15 asang parai nai angdeangra ngiereichi hawi, apai ngiereichi taphra pi pawn ai.
16 Mymy ly len keh, apu keh nai samphochi ai py, tup hai pawn ai.
17-18 Khumichi i haiho jum iy paleung len amlyh naichi ly phra ai. Huni neng tym nai khala y, Areng leaungrei naini, tahm asang naira avum ai. Mynchi ly tama angchi khyp ai.
19 Khaileaung amchyh hai ai nai, mymy jeu nai khala y khumichi ly Areng i kado theu nai, mymy i sa thai naira hawi nang parai naira i nai law tleaungra nga ai nai lengseaung tapiuchi ra y py, khaileaung angawm tai i py aheu u ai.
20 Huni neng kani tym nai khala y, khumichi ly mychi i sa nai muku, tangka mynchi ai thangbui hawi phanglauchi sala y aphi iy khai su ai.
21 Khaileaung amchyh hai ai nai Areng jeu nai khala y, khumichi ly mymy i kado theu nai, sa thai naira hawi nang parai naira i nai law tleaung ai nai khaileaung angawmchi hawi lengseaung tapiuchira y aheu u ai.
22 Dei nai amjy napi nai khumichi ai ym naimy paleung apado u moh. Nichi ly ati kamran awm mo?