ISAIA
I AMO LEU
(1) Pakeung 1-39 Tokalawi khu ka-peang Juda pri ly phum-ang len parai nai pri deaungpa Asuria pri my pajei pahyn naira avum nai neng ne. Isaia i niu nai ly Juda pri y pajei pahyn tatang nai ly Asuria i atho ny y. Amy cheng kypkyp i kamngochi hawi Tameuh i leu tangai y naichi, Tameuh ai ym y naichi molam y ne. Amo i chaipyn naimy teng khyp nai leuchi thui pi nai ly nichi hawi nichi i lu sa naichi ai kataw kateng heng ai nai hawi, ka-dyh ka-dawi heng ai nai mang y pahawi iy, huni khumichi i Tameuh i leu tangai y nai molam y, phra naira tym ai nai pany hai bo. Huni khyh chang y, khaileaung pri verei tlamsa naimy awm iy reita leu hawi ka-dyh ka-dawi peang ai nai samrang leaungrei ly samrang Davida kangpreang theung i dengdairei amthawn ai, nanai Isaia my thui pi yb nai ne.
(2) Pakeung 40-55 Juda cheng nawi keh naichi ly Babulon pri y miseaung achei nai neng, ana palum pali naira avum nai neng, athang khai naira by y nai neng ne. Amo my Tameuh ly mymy i khumichi ai lawi tleaung naira pei iy, heng nai sai kangtha amteaung ai nai molam, mychi i saleaung khuteng Jerusalem mary y pahawi pi ali teang ai, nanai thui pi yb bo. Hini pakeungchi i aly len nai ly Tameuh ly razavang i areng ne iy, Israela chengchi hawi vanrei huni chengchi molam y amtheaung naira nga ai nai khumi bawibawichi i vui, huni Areng my tau paran yb nai ne. “Tameuh i miseaung,” nanai leuchi ly Leu Maikawm Kangngym cha-iu theung i, khumichi my pany nawi nai satangchira y abawi nai ne.
(3) Pakeung 56-66. Jerusalem mary y vawi ali teang nai khumichi i vui dawn pi patyp iy tajiu nai ne i, Tameuh ly mymy i khumichi teng y mymy i leu ka-deu angym hai ai nai satang pany chaipyn ai ngai nai khumichi i vui tajiu pi nai ne. Kateng sa nai hawi ka-dyh ka-dawi sa nai satangchi, anawn kani ai kry nai satang, apathyp nai sai satang hawi chiu sa nai satangchi ai py, tabawi nai ne. Adawn patyp ai nai pakeung kadeaung ly 61:1-2 ne i, huni leu ly Areng Isu i kalop sa amteaung nai hawi palau patyp nai satang ne.
1
1 Hini cha-iu theung y Juda samrangchi napi nai Uzia samrang, Jotham samrang, Ahaz samrang hawi Hezekia samrangchi i deung y Juda pri hawi Jerusalem mary tlang tleaung y ati mana tym ai mo, nanai Amoz i chapo Isaia teng y Tameuh my pei nai amo leuchi abawi nai ne.Ref 1:1: 2 Areng 15:1-7, 15.32—16:20, 18:1—20:21; 2 Neng 26:1—32:33
Tameuh my mymy i khumichi ai khri pa-rei parip patyp nai
2 Areng my, “Khaileaung hawi kani khusangchi awi, kai i leu pei nai tangai u! Kaimy pacho panei nai deaungdichi ly ang tiu u lawh bo.
3 Si hawi painochi ly yhmkeung ai pany; keaungngo kano kasauchi py yhmkeung i keaungngo hai, mychi i yhmkeung my teicha patlai nai meingtymchi pany. Na i py kai i khumi Israela chengchi ly huna tanrei pany u y. Nichi ly pany thai u y na ly” napi.
4 Nangchi kamngo sa nai khumichi awi, sa tamang reng nai khumi kamngochi awi! nangchi ly taham si u bo. Nangchi ai ly kamngo mynji my ang ti cheng na lawh bo ly! Israela chengchi i chai parai nai Areng Tameuh ai khai su iy, mymy ai nithun thun u vui bo.
5 Nangchi ly ati mana nai y tiu u veangveang lawh mo? Vai i tleaung y lenra nai kamngo pajeng naira avum ai nai ngai u lawh a? Nangchi Israela mipuichi awi, nangchi i luchira y tamo kalem kawi na bo. Nangchi i paleung pathym py phra u na bo.
6 Kheupadawi dengdairei lu tym pa-rei, nangchi i tlang bom verei ly tamo kalem chym y na bo. Abei ako nai tamochi, tamo kangtha, kangngymchi hawimy kawi nai ne. Huni tamo kalemchi ai pasawp iy kanih hawi bam y rai, asi py so y rai.
7 Nangchi i pri ly phra iy nangchi i marychi py, maidym satlawi lawm vui bo. Nang khen nai thym khala my py, pri takhra khumichi ly nangchi i khu peang vui iy, ati cheaungkhangchi ai phra hai pawn bo.
8 Katanmeuh naira avum nai Jerusalem mary harei naini awm khyh bo. Huni mary ly mymy i vui amtang pajau y nai kreip akho typ nai tai kamta py, pajawi bai typra tai kamta py lawm nai ne.
9 Ati cheaungkhang sa thai nai keung Areng my naini, mary i khumi phyreichi ai dei kamthum khai pi mailai y lawh teu i khyly, Jerusalem mary ly Sodom mary hawi Komora mary kamta, taphra naira avum ai nai ne.Ref 1:9: AA 19:24; Rom 9:29
10 Aw Jerusalem mary, nang ai peang nai samrangchi hawi nang i mary khumichi ly Sodom mary hawi Komora mary i khumichi hawi atawm. Nang ai Areng my leu pei nai tangai ba. Achi i Tameuh my parip nai tangai ba.
11 Mymy ly “Nangchi avaw avawrei talam nai kapathyprachi ai kai aly ngai,” nanai athang khai u a? Nangchi i leng patlum nai beramchi hawi tawnbawichi i thauchi paleih na bo. Si, beram, mi-ichi i thichi ai py, kai paleung no y leang bo.Ref 1:11-14: Amo 5:21-22
12 Nangchi kai teng y chiu sa ai nai jeu u nai khala y, hunichi syn u ai nai tla, nanai nangchi ai ami my leu pei mo? Ami my nangchi ai kai i Achura yhm mang y tako nai a-i mengmeaung hai lawh mo?
13 Nangchi i ati sai py ny y nai kapathyprachi ai kai, aly ngai bi y leang bo. Nangchi i talam nai mui katui kamuichi ai kai paso. Nangchi i lo si pawi kanichi, anawn kanichi hawi reita pawi kanichi ai kapaso. Nangchi i kamngo nai molam y, hunichi ly tamang piupa na veng bo.
14 Nangchi i lo si pawi kanichi hawi kani kachaichi ai kai, kaniu ngai y. Huni kanichi ly kai pho ai ngai y nai myn kaji ne.
15 “Nangchi kiu pheu iy chiu sa u nai khala y, kai ly nangchi mang y hi iy kang khen pi ai ny y. Nangchi i kiuchi ly kamngo thi akau nai deaungkho y, nangchi mana tanrei ham parai naimy chiu sa u teu i py, kang tangai pi ai ny y leang.
16 Nangchi i paleung chai pa-rei so u. Kai i mo y nangchi i sa tamang naichi anawn u. Hawi y sa naichi anawn iy
17 kahawi so u. Ana piupa naira avum nai khumichi ai sabawm iy, nuro nukai chochi hawi lumai cheaungtichi i nga ai avo naichi ai ama hai nai hawimy, tara leu reita my peang nai awm pa-rei so u,” napi.
18 Areng my, “Vai,nangchi i sa nai sai adawn pasym u sina. Nangchi ly kamngo thi akau naimy awm. Na i py kai ly nangchi ai ji amai kamta kaleung pa-rei paju pachai pi ai. Nangchi ly kamngo thi hawi pasen na teu i py, palopi kamta kaleung hai ai.
19 Nangchi ly kai i leu tangai lawh teu i khyly, khaileaung i theu nai amti amjang kahawichi cha ai nai nga u ai.
20 Na i py kai i leu tangai ai nai akhi vui iy, kai ai amtang u lawh ai nabaly nangchi ly myh kang u ai. Hini ly kai Areng my leu pei nai ne,” napi.
Khri pa-rei kamngo sa nai mary
21 Vaichi khala ka-ym awm nai mary ly vai i neng y bimanu kamta lawm veng lawh bo ly! Vaichi khala huni mary theung y khumi kahawichi awm u nai ne teu i py, vai ly khumi ai padei naichi naini awm khyh bo.
22 Aw Jerusalem mary, nang ly vaichi kha tangka hawi atawm. Nang ly vang teng y nai lawm veng bo. Vaichi khala nang ly kreip hang kahawi hawi atawm. Vai ly tui lawm angchi khyp veng bo.
23 Nang i miteaung kehchi py langmeang thau naichi, kangviu ai atho pei naichi lawm u bo. Nangchi ly un langseaungchi la u teu i py, Tara jeungra y nuro nukai chochi ai amo hai u y. Lumai cheaungtichi i ka-jo ka-thuichi ai py, tangai iy chih pi y.
24 Hunai deaungkho y sa thai naira angym nai Israela chengchi i Tameuh, ati cheaungkhang sa thai nai keung Areng my leu pei nai vai, tangai ba. Mymy ly “Kai ly kaimy i paleung ka-e napi nai nangchi ai vawitheung tha ai i, nangchi ly kai ai mana mo i py, khrukhra hai pajau ai ny y.
25 Kai ly nang ai bawi la iy kang pajeng ai. Tamo ngan ai pachai nai kamta, nang i kakhawi kangjenchi py pachai iy, nang ai kachai sa ai.
26 Jangni i kamta nang teng y lu sa naichi hawi tau pei nai bangtangchi kang pei ai. Hunaibaly Jerusalem mary ai khumi kahawichi i reita angym nai mary, ka-ym awm nai mary, nanai amyn pathi ai,” napi.
27 Areng ly hawi nai deaungkho y, mymy ly Jerusalem mary hawi uikheih nai khumi ngiereichi ai atleu ai.
28 Na i py mymy ly kamngo sa nai khumi hawi mymy ai tiu nai khumi bawibawichi ai tamyh pawn ai. Mymy ai khai su nai khumi ngiereichi ai tamyh ai.
29 Nang ly dengkeaung keungchi ai chiu lawh nai deaungkho y, chiu ai nai akho baichi sa lawh nai deaungkho y, paleung si naira avum ai.
30 Nang ly dei enten nai ngopraibiu keung hawi, tui lei y nai akho bai kamta jei rawm vui ai.
31 Dengkeaung kadei ly mai kali deaungkho y, mai amtawi nai kamta phum-ang len nai khumichi py, mychi i kamngochi deaungkho y phra u ai. Huna nai phra naira ai ly ami py paka ai nai nga ai ny y,” nanai thui bo.