3
Jerusalem mary ahei seaungkhrang nai
1 Vai ly aw Areng, ati cheaungkhang sa thai nai keung Areng ly khumi mipuichi my paleung pado nai khumi ngiereichi hawi vawnsai ateaung ngiereichi ai, Jerusalem mary hawi Juda pri dengdairei, vym pi pawn ai bo. Mymy ly nichi i teicha teineichi vym pi pawn ai.
2 Nichi i khumi soraichi hawi tavaimichi, tara chih nai keungchi hawi amo, leung sarachi hawi sa ai avo nai khumichi,
3 nichi i tavai kalop hawi khu ka-peangra i miteaung kehchi, pri kalop sa naichi hawi atam kakawpchi ai vym pawn ai.
4 Areng ly tleaungri acheang y rai nai deaungdichi teng y, khumichi ai peang ai nai pei ai.
5 Khumi luteng ly leaung leaungrei tlang tleaung y neng ka-pe dyp iy, amy i vui kamran hau ai. Thawndeang deaungdichi ly miteaung yhmrengchi tlang tleaung y py, khumi hawi y naichi ly khumi kahawichi tlang tleaung y py, tahm khai u y ai.
6 Cheng theaung amjychi ly mychi theung i khumi leaungrei ai vawi takhra iy, “Ati py ne sy, nang teng y baichu ateaungchi awm rai nai ne. Hunai deaungkho y vai, patang naira avum nai neng khala y, kaichi ai lu so pi ba,” nanai thui u nai neng tym ai.
7 Na i py huni khumi my, “Kai sa ai nai tlo moh sy! Kai ly nangchi ai atleu pajau y leang. Kai teng py teicha teinei hawi ateaung by y leang. Kai ai nangchi i vui lu sa ai nai khai u moh!,” nanai ang thui pi ali teang ai.
8 Jerusalem mary ly taham si lawh ly! Juda pri py phra lawh bo ly! Nichi i sa nai ngiereichi hawi, thui nai ngiereichi ly Areng hawi ka-awi naini lawm nai ne. Nichi ly Tameuh kypkyp ai mei aniu y nai sa nai ly amthang leaung na bo.
9 Nichi i meimai awm nai sai my nichi teng y kamngo awm, nanai amny hai bo. Sodom mary i khumichi kamta, nichi ly kamngo amteng na pa-rei sa tamang u. Nichi ly taham si u bo. Mychi phra tleaung phra ra nai ly mychi naimy sa u nai ne.
10 Khumi kahawichi ly taham hawi ai. Nichi i vui cheaungkhangra y amsym ai. Nichi ly mychi i dawn nai, tau nai, sa naichi molam y, hawi naira avum u ai.
11 Khumi hawi y naichi ly taham si u ai. Mychi i hawi y naira dawn nai, tau nai, sa naichi molam y, kamngo pajeng naira avum u ai.
12 Tangka paseng nai khumichi ly kai i khumichi ai ana u bo. Paisa tangka ko nai khumichi my, nichi ai li-tapawp u bo. Kai i khumichi awi, nangchi ai lu sa naichi ly nangchi ai lam kateng patei y nai deaungkho y, nangchi ly mani lam mang y tako ai mo, nanai malawn py, pany u pajau y nai ne.
Areng my mymy i khumichi ai tara chih nai
13 Areng ly mymy i kalop ai patei pi yb bo. Mymy ly khumi cheang cheaungkhangchi ai tara chih ai nai angchi yb nai ne.
14 Areng ly mymy i khumichi theung i miteaung cheng naichi hawi lu sa naichi ai tara chih ai. Nichi teng y mymy ly “Nangchi ly kreip akho baichi lawm u bo. Nangchi i yhmchi py khumi kamawnchi teng i lawm nai vawnsaichi hawimy kawi na bo.
15 Nichi teng y kai i khumichi ai ana ai nai, khumi kamawnchi tlang tleaung y neng ka-pe dyp ai nai py sa thai naira by y. Huni ly ati cheaungkhang sa thai nai keung kai, Areng my pei nai leu ne,” napi.
Jerusalem mary i neampachychi ai pany hai nai
16 Areng my, “Jerusalem mary i neampachychi ly mana tanrei paleung len na mo, nanai khen u cham! Nichi ly lu deangtheang iy tako u reng. Avawrei kamlai kam-e sa u nai ne. Nichi i kheukanchi ly khen apu parai i, nichi i khichangchi py tyn sorang na bo.
17 Na i py kai ly nichi ai lu vau tabiuliu iy pajeng ai,” napi.
18 Jerusalem mary i khumichi tahm apasang, am-e naichi ly Areng my nichi teng i la pi veng ai nai neng tym ai. Nichi i khichangchi, lura i ateaungchi, kaneaung y awi naichi,
19 kano amchochi, ka-sichi, nichi i meimai amym nai
20 pahachi, lukhymchi, kiubanra y, akeng y akawm nai laphawichi,
21 kiu sabyhchi, notareang amchochi, ateaung kahawichi,
22 salo i baichu kangjiuchi, chakychi, paisa-yhchi,
23 angpo dawdi nai ateaungchi, kanih mai ka-syn atamuirachi, lu amym nai pahachi, hunichi taphra pi pawn ai.
24 Nichi ly rimui kamui amseaung y naimy, kaveaung kamui amseaung ai. Apu parai nai khobaichi jeng y, vuinawnchi teaung u ai nai tla ai. Khen apu parai nai samteungchi jeng y, lu tabiuliu nai awm u ai. Apu parai nai ateaung alangchi jeng y, ateaung kamawnchi ateaung u ai nai tla ai. Nichi i khrei ai hawi parai nai areaung py, kangji awm nai mang y amtlau vui ai!
25 Nichi i juvo neampachochi ly manatanrei atho ham u teu i py, tavai keung y dei u ai.
26 Mary apai katheuchi ly vo tangam naimy, mary pui py tlang ka-keu naimy, khaileaung y ateh nai neampachychi hawi atawm ai.