16
Moba pri i tavai kapreangchi Juda pri y chei u nai
1 Tui by y nai daichi ka-vymra y awm nai Selah mary i Moba chengchi ly Zion mawi i chaniu teng y beram harei langseaung pei pi u.
2 Nichi ly Arnon tavo peang y ajeng u nai thym khala, tabu khai su nai tavochi kamta, kheupui meaung kamhi aleaung ali naimy awm u bo.
3 Nichi my Juda mipuichi teng y, “Kaichi ai tau pei u kyh; kaichi ly tavai kapreangchi ne. Kani thunteng nai khala, savairu nai dengkeaung keung i ka-khui kamta, nangchi ly kaichi ai amo hai pi u. Ami py hau iy niu pajau y ai nai kaichi ai heu pi veng ba.
4 Nangchi i pri y awm ai nai pei ba. Kaichi ai tamyh vui ai ngai nai khumichi teng i nai amo hai ba,” nanai Moba mipuichi thui u nai ne.
(Ana piupa nai hawi taphra nairachi ly tama ai. Pri phra hai nai khumichi py by y leang bo.
5 Huna nai khala y Davida katu chanau theung i leaungrei naini samrang lyn iy, mipuichi ai ka-ymra, ka-tamenra hawi peang ai. Ni ly kahawi sa ai nai patyh ai ny y; leu meitang naimy tara chih pi ai.)
6 Juda mipuichi my, “Moba mipuichi ly mana tanrei paleung len na mo, nanai kaichi thai bo. Nichi ly paleung len amlyh u naimy mymychi ai tahm apasang u teu i py, nichi i amlyh naichi ly atyhtyh teu, nanai kaichi pany bo,” napi u.
7 Moba mipuichi ly mymychi i avum nai ngari kamtang molam y vo-pi u ai. Kir Here mary y mychi cha u reng nai cha nei kahawichi adawn u ali teang nai khala, nichi bawibawi ly vo-pi ai. Paleung phra atho di naimy awm u ai.
8 Hesabon mary sahawi i li hlauchi hawi, Sibmah kreip akhobaichi ly phra pawn veng bo. Cheng takhra samrang bawibawichi ly huni akhobaira i theu nai, kreip hangchi hawi pavui u. Vaichi khala kreip angjynchi ly nisi mang Jaza mary hawi, tui by y nai daichi ka-vym khrairei py, nidym mang pangli kadei y khrairei py amjang nanai ne.
9 Vai, kai ly Jaza mary i vui vo-pi reng nai kamta, Sibmah kreip keungchi i vui py vo-pi lawh bo. Khumichi amo theu naimy pakym achu ai nai amti amjangchi by y nai deaungkho y, kai ly Hesabon mary hawi Elealeh mary i vui y meikatui tla bo.
10 Vai ly pa-tiu khuta hawi nai lichira y amo theu nai khumi by y; kreip akhobaichi ra y khulym thui aeu nai khumi by y. Kreip athaichi ati iy kreip hang sa nai khumi py by y veng bo. Amotheu aeu nai khumichi ly tama pawn bo.
11 Kai ly Moba pri i vui paleung hawi y naimy, Kir Here mary i vui paleung si naimy tangam lawh bo.
12 Moba mipuichi ly chiu sa ai nai myn chiu nai meingtymchi hawi achura yhmchi mang y chei u teu i py, ati sai py kamran awm ai ny y.
13 Hini leu pei nai ly Moba pri molam y, angchei khala i dengdairei Areng my pei nai leu ne.
14 Vai ly Areng my, “Saneng thomrei awm khyp nai khala, Moba pri i yhmtheaung katuichi ly tama pawn ai. Mipui neangneangchi theung i khumi maidenreichy naini, dei kamthum awm ai. Nichi py atho bai naimy awm u ai,” napi.