15
Moba pri ai Areng my tamyh ai nai satang
1 Hini leu pei nai ly Moba pri i vui ne.Ref 15:1—16:14: Is 25:10-12; Jer 48:1-47; Ezek 25:8-11; Amo 2:1-3; Zep 2:8-11
Ara mary hawi Kira mary ly vumrei y my phra nai ne. Moba pri py savai tlang na bo.
2 Dibon mary i khumichi ly myn chiu nai meingtymra y chei u iy, vo tangam ai nai mawi saleung y lyn u. Moba pri i khumichi py Nebo mary hawi Medeba mary i vui paleung si nai deaungkho y vo hang u nai ne. Nichi ly paleung si nai ka-ma-ra sam hawi labeaung muichi vau pawn.
3 Lamchira y awm nai khumichi ly paisiu akhiu u nai ne. Khaileaung ka-hochi hawi yhm amphuchi salo y py, paleung si nai patei iy vo u bo.
4 Hesabon mary hawi Elealeh mary i khumichi ly vo hang u i, nichi i vo nai raawi ly Jaha mary mang y khrairei thai nai deaungkho y, Moba tavaimichi malawn py kaso tahyn theu u i, jei u nai ne.
5 Kai ly Moba pri i vui vo tangam bo! Mipuichi ly Zorath mary Ekalath Shelishija ryrei preang u. Phyrei khumichi ly meikatui tla naimy, Luhith mawi lam kataw lyn u bo. Phyreichi ly paleung si vo hang naimy, Horonam mary mang y preang u nai ne.
6 Nimarim tavo micheaung ly tui kang pawn nai y, tavo micheaung peang i awm nai achachi py jei pawn i, suino naira ati sai py by y leang bo.
7 Khumichi ly mychi i vawnsai awm nai ngierei syn u iy, paijeaung keung leaunghawi tako prei iy preang u ai nai atho sa u.
8 Moba pri khujyh tengtangra y vo tangam nai raawi thai u bo. Huni raawi ly Ekalaim mary hawi Berelim mary mang malawn py thai u nai ne.
9 Dibon mary tavo tui ly thichi hawimy pasen na bo. Tameuh py huni mary i khumichi i vui, hawi y keh nai ka-jeira khai pi rym nai ne. Moba pri y awm asai rai nai khumi ngiereichi ly huni meingtym y pahyp y naimy atleh ahum nai avum u ai.