17
Suria pri hawi Israela pri ai Areng my pajeng ai nai satang
1 Hini leu pei nai ly Damaska mary i vui ne. Areng my, “Damaska mary ly mary khaw jo y leang. Anawi seaungkhrang nai yhm ka-nawichi naini lawm ai.Ref 17:1-3: Jer 49:23-27; Amo 1:3-5; Zekh 9:1
2 Suria mary ly khumi angso savai tlang jojo nai mary lawm ai. Huni marychi ly beramchi hawi si, painochi i vui sui tlai naira lawm ai. Huni tawnbawichi ai paryh pawn ai nai khumi awm ai ny y.
3 Israela pri ly paleung ka-echi ai amtang pajau ai nai atho by y ai. Damaska mary py tlamsa nai tama vui ai. Dei kamthum Suria chengchi ly Israela chengchi kamta, tahm anem ai. Hini ly ati cheaungkhang sa thai nai keung kai, Areng my thui pi nai leu ne,” napi.
4 Areng my, “Israela pri i phum-ang haiho jum ai nai neng kani tym ai. Huni pri ly nang chawn naira i nai kamawn ang vum ai.
5 Israela pri ly amti amjangchi pakym pyn veng nai li kamta py, chohkawmchi tawn pan veng nai Rephaim leaunghawira i li kamta py, chai pan vui ai.
6 Khumi maidenreichy naini dei kamthum awm nai khala, Israela py athaichi jaw be chum nai bo y, keung salyh y athai nyh, athai thomrei hawi changpichi ra y athai palyh, athai pangreichy awm khyh nai olive keung hawi atawm ai. Huni ly ati cheaungkhang sa thai nai keung kai, Areng,Israela chengchi i Tameuh my thui pi nai leu ne,” napi.
7 Huni neng kani tym nai khala y khumichi ly mychi ai sabawm ai nai Israela chengchi i chai parai nai Tameuh, napi nai atiti sa nai keung ai avum u ai.
8 Nichi ly mymychi my sa nai maichamchi ai py, Aser kani anglo ai chiu ai nai mychi kiu hawi sa patyp nai tamkhawnchi hawi rimui muikatuichi patawi naira maichamchi ai py, ym u ai ny y.
9 Huni kani tym nai khala, khaw parai nai lengseaung apai tapang nai marychi ly Hivit hawi Amori chengchi ly Israela chengchi teng i preang u nai khala y khai su nai marychi kamta, khumi angso savai tlang nai lawm iy phra seaungkhrang ai.
10 Aw Israela pri, nang ly nang ai atleu iy lengseaung pui kamta ama hai nai Tameuh ai tami veng lawh bo. Nang ly cheng takhra khumichi i tameuh ai chiu ai nai apu parai nai keungchi ui nai ne.
11 Na i py huni akhochira i dengkeaung hmchi ly nang i ui nai kani khawn mang y my prau iy pauchi pau lawh teu i py, nang ly hunichira i athaichi jawi ai nai nga ai ny y. Ngari kamtang hawi tami pajau y nai patangra naini avum ai.
Paleung ka-echi sum nai
12 Phum-ang len nai prichi ly pangli tui kamsau katyn, tui sampyh kalenchi katyn kamta, kado tukulu nai ne.
13 Huni pri i khumichi ly tui sampyhchi kamta, athorei my mo mang y lyn u bo. Na i py Tameuh my nichi deaungkho y khrikhri pa-rei thui parip nai khala y, nichi ly mawi para ra i spryhchi kamta py, ali tengkalengra y akheang nai choh-ali kamta py, athawn u veng bo.
14 Nichi ly khumichi ai dym tengsa neng khala jei hyn hai teu i py, khutawi en neng khala ly by y leang bo. Hini ly kaichi pri y tiu nai khumichi i khym taham ne.