14
Pri palara i vawi ali teang nai
1 Areng ly mymy i khumi Israela chengchi ai pahen ali teang nai ne. Mymy i khumichi palawn ai nai vawi takhra ai. Mymy ly nichi ai mychi i saleaung khutengra y awm u ali teang ai nai pei ai. Cheng takhra khumichi ly jeu iy nichi hawi vanrei awm u ai.
2 Khumi cheng cheaungkhangchi ly Israela chengchi ai, Areng my pei nai pri y vawi u ali teang ai nai sabawm u ai. Huni pri y cheng takhra khumichi ly Israela chengchi teng y miseaung kamta kalop sa u ai. Israela chengchi ai patiu nai khumichi ai, vai ly Israela chengchi my patiu ali teang ai. Israela khumichi py, vaichi khala mychi ai ana nai khumichi ai peang u ai.
Tavau pri y Babulon samrang tym nai
3 Areng ly Israela chengchi ai, mychi avum nai patang naira hawi ngari kamtangchira i nai py, kalop karam sa naichira i nai py, alawra pei ai.
4 Huna nai kamta mymy sa nai khala y, nichi ly Babulon samrang ai panui hai iy,
“Pahyp y naimy ana nai samrang ly dei bo! Ni ly vai mo mang y amimi ai py ana ai nai nga bi ai ny y!
5 Khumi mipuichi ai kado theu naimy ana iy my i pajau nai khumichi ai py,
6 avaw by y pa-rei ana reng nai samrang hawi y naichi i sa thai naira ai, Areng my tama hai veng bo.
7 Hina nai khala naini khaileaung pri verei ly tlamsa iy, khumi bawibawichi py amo theu naimy khulym thui u ai nai nga.
8 Lebanon daichi theung i maicha keungchi hawi saitleang keungchi my, nang ly dei veng bo i, kaichi ai paliu ai nai khumi by y leaung bo, nanai thui iy, Babulon samrang dei nai molam y amo theu u bo.
9 Tavau pri ly Babulon samrang ai lamchung ai nai angveirym nai ne. Khaileaung pri y awm nai thym khala, khri pa-rei sa thai naira awm nai khumichi i phailochi ly aleaung ali u bo. Samrangchi i phailochi py, mychi i samrang atehrachira i nai ang thau u bo.
10 Nichi bawibawi my Babulon samrang teng y, ‘Vai nang ly kaichi kamta, atho by y lawh bo ly! Kaichi theung y abawi teang nai lawm lawh bo lo-oh!’
11 Nang ai ly vaichi khala, taro changpreng katynchi hawi tahm khai ang palo nai ne; na i py vai ly tavau pri y tym vui lawh bo. Kaleungchi ai nibai palawn iy aseaung naimy, thaideaungchi ai kanih palawn iy akhiu lawh bo,’ nanai aeu naimy thui u.
12 Aw khutawimo cho Babulon samrang, angvang phang nai khawn tempo, nang ly kani mang dengdairei tla vui lawh bo! Vaichi i neng khala nang ly khumi cheng cheaungkhangchi ai tiu bo. Na i py vai i neng y ly khaileaung y aphi su nai avum lawh bo.Ref 14:12: Amt 8:10, 9:1
13 Nang ly kani mang tym pa-rei lyn iy, asang keh nai ka-sichi salo y nangmy i samrang atehra khai ai nai leu pacheang yb bo. Nang ly tameuh takhrachi akachu u nai tosyh mang i mawi salo y samrang leaungrei kamta ateh ai nai nga ai, nanai athang khai bo. Ref 14:13-15: Mt 11:23; Lk 10:15
14 “Kai ly tamaichi salo y lyn iy ati cheaungkhang sa thai nai keung hawi atawm pa-rei sa ai,” nanai thui bo.
15 Na i py huna nai lawm ai nai tleaung y ly tavau pri khri pa-rei thiu parai nai meingtym y tym y aphi nai avum lawh bo.
16 Khumi kadeichi ly nang ai khen mynkym u ai. Nichi my, “Khaileaung amchyh hai iy prichi ai khrukhra hai nai keung ly hini khumi lawh ai?
17 Marychi phra hai iy khaileaung y tui by y nai daichi ka-vym lawm hai nai keung ly hini khumi a? Theaung tla naichi ai paeung jojo iy, nichi i yhm hlau y vawi ai nai pei y nai khumi ly hini khumi a?,” nanai deng u ai.
18 Khaileaung pri y awm nai samrang bawibawichi ly mychi i apu parai nai tapreaungchi ra y aseaung u nai ne.
19 Na i py nang i vui ly tapreaung by y. Veaung tlawn hai ai nai nang i veu ly aphi u su bo. Huni veu ly tavai keung y dei nai tlaiveuchi hawi ataphum naimy, haisau hawi thun nai avum iy, lengseaung angawm theung y aphi su nai, chiu piupa nai avum bo.
20 Nang ly nangmy i pri phra hai iy nangmy i pri khumichi ai padei nai deaungkho y, takhra samrangchi kamta nang i veu ai ly heung ai ny y. Nang i hawi y nai kangpreangchi ly leaungrei py dei y naimy tleaung ai ny y.
21 Amsi pajochi i kamngo deaungkho y, chapochi tlang tleaung y padei ai nai amteaung u na sy! Hini samrang i kangpreangchi theung y ami py, khaileaung pri y peang ai nai nga ai ny y.”
Areng my Babulon mary phra hai ai nai satang
22 Ati cheaungkhang sa thai nai keung Areng my, “Kai ly Babulon mary ai tiu iy phra hai ai. Huni meingtym y awm nai ngiereichi taphra pawn ai. Deaungdichochi malawn py, dei y naimy awm ai ny y.
23 Kai ly Babulon mary ai akai hai iy, beaungkuchi ly huni meingtym y awm u ai. Kai ly yhmpheu pasi nai khumi kamta, Babulon mary i awm nai ngiereichi ai taphra pawn ai. Hini ly ati cheaungkhang sa thai nai keung kai, Areng my thui nai leu ne,” napi.
Asuria chengchi ai Areng my tamyh ai nai satang
24 Ati cheaungkhang sa thai nai keung Areng my vaineng abeu iy leu pei nai ly “Kai i dawn pasym yb naichi ly tym ai. Leu pacheang yb nai kamta ly tym takengkei ai.Ref 14:24-27: Is 10:5-34; Nah 1:1—3:19; Zep 2:13-15
25 Kai ly kaimy i Israela pri theung i Asuria chengchi ai tamyh pawn iy, kai i mawi aheungchi salo y nichi ai chiu piupa ai. Kai i khumichi ai Asuria chengchi pho hai nai myn kaji hawi kamtang myn kajichi ra i nai lawi hai ai.
26 Hini ly khaileaung pri i vui kai i dawn pasym yb nai ne i, kai ly khumi cheng cheaungkhangchi ai, kamngo pajeng ai nai kiu pheu yb bo,” napi.
27 Ati cheaungkhang sa thai nai keung Areng ly hina nai kamta sa ai nai leu pacheang yb bo. Mymy py kamngo pajeng ai nai kiu pheu yb nai ne. Mymy ai ami py paka pajau ai ny y. Ref 14:29-31: Jer 47:1-7; Ezek 25:15-17; Joel 3:4-8; Amo 1:6-8; Zep 2:4-7; Zech 9:5-7
Philistin chengchi ai Areng my tamyh ai nai satang
28 Hini leu pei nai ly samrang Ahaz dei nai saneng y thai hai nai leu ne. Ref 14:28: 2 Areng 16:20; 2 Neng 28:27
29 Aw Philistin khumichi awi, nangchi ai pakhau nai thengbeang ly tleu veng bo; na i py nangchi amo theu u ai naira by y. Pavui harei dei nai khala, huni pavui tleaung y kaso nai takhra pavui harei khei bi ai. Pavui kaduira i nai thailai kaso keh nai Naka kangkheang khei reng lawh nai ne.Ref 14.29-31: Jer 47.1-7; Ezek 25:15-17; Joel 3:4-8; Amo 1:6-8; Zep 2:4-7; Zekh 9:5-7
30 Areng ly mymy i khumichi theung i, kamawn katichi ai beram typ nai keung kamta typ iy, chymme naimy awm hai ai. Na i py Philistinchi ai ly ka-jei hawi parai nai takang theu hai ai i, nichi ly leaungrei py dei kamthum awm ai ny y.
31 Aw Philistin mary bawibawichi awi, vo tangam naimy aeu iy kasabawmra hnei u! Nangchi bawibawi py jei hyn naimy awm u! O-a sorai paleung awm nai khumi leaungrei py abawi y nai tavaimi kamkawm pui harei ly khaileaung khyhmeung naimy tosyh mang dengdairei ang jeu u bo.
32 Philistin pri i dengdairei ang jeu nai savaichi teng y, achi ati mana pathang ai mo? Areng ly Zion mary ai palum bo i, huni maryra y patang naira avum nai mymy i khumichi ly chymme naira nga u ai, nanai satang nichi teng y thui pi u sina.