13
Babulon mary ai Tameuh my pajeng ai nai
1 Hini leu pei nai ly Babulon pri i molam y Tameuh my Amoz i chapo Isaia teng y tym nai leu ne. Ref 13:1—14:23: Isaia 47:1-15; Jer 50:1—51:64
2 Mawi tabiuliu nai saleung y tavai tamkhawn theaung u! Paleung len amlyh nai mary pui katheu pa-khochi ai tiu ai nai aeu naimy, nangchi i kiu pheu iy tavaimichi ai leu pei u.
3 Areng ly mymy i kado theu hai nai khumichi i tlang tleaung y pajeng ai nai molam, mymy ka-ym awm iy tahm khai nai tavaimi kahawichi ai palau nai ne.
4 Mawi salo y awm nai khumi mipuichi i raawi tangai u. Huni raawi ly khumi cheng cheaungkhangchi hawi prichi akachu u nai katynchi ne. Kani pri tavai luchi i Areng ly mymy i tavaimichi ai tavai thau hai ai nai angveirym bo.
5 Nichi ly khaileaung pri katemra y awm nai, pri kamlochira i dengdairei ang jeu u bo. Areng ly kado theu nai deaungkho y, tavai ateaung hawi pri vereichi ai tamyh pawn ai nai ang jeu ai.
6 Ati cheaungkhang sa thai nai keung ly ka-jeira tym hai ai nai neng kani napi nai, Areng i tara chih nai neng kani ang tym hai ai mang.Ref 13:6: Joel 1:15
7 Kamtang avum naimy vo tangam u. Khumi bawibawichi i kiu ly atho bai u ai. Huni khumichi ly paleung theang u ai.
8 Nichi bawibawi malawn py jei hyn naimy deaungdi tapen nai neampachy kamta, khri pa-rei patang naira avum u ai. Nichi ly leaung leaungrei ka-jei paleung hawimy akhen u leungtang ai. Nichi i meimai py kangji thi amteng naimy awm u ai.
9 Kapahenra by y nanai kado katheu pajengra avum u ai nai neng kani napi nai, Areng i tara chih nai neng kani ang tym ai. Khaileaung ly khumi angso by y nai meingtym lawm ai. Kamngo sa nai khumi ngiereichi py, tamyh pawn naira avum u ai.
10 Ka-si tauki bawibawichi ly angvang y naimy awm ai. Kani si nai khala veng naimy awm ai. Lo py kangvang pei ai ny y.Ref 13:10: Ezek 32:7; Mt 24:29; Mk 13:24-25; Lk 21:25; Amt 6:12-13
11 Areng my, “Kai ly ka-jeira ai khaileaung salo y tym hai iy, khumi hawi y naichi ai mychi i kamngo nai molam y, kamngo pajeng ai. Kai ly amlyh am-e nai khumi ngiereichi ai tahm panem iy, paleung kalen asa nai hawi pahyp y naimy ana nai khumi bawibawichi ai, kamngo pajeng ai.
12 Dei kamthum khumichi ly muku tleaung y py takang ai.
13 Ati cheaungkhang sa thai nai keung kai, Areng my kado theu hai nai khala, kani khusang ly amchyh neung ai i, khaileaung py awm kari ra i nai asyh vui ai.
14 Mawi sarachi teng i dengdairei angpreng phro nai sisiuchi kamta, typ nai keung by y nai beramchi kamta, Babulon pri y awm nai cheng takhra khumichi ly mychi i saleaung khuteng mang y preang u ali teang ai.
15 Nichi theung i kangheng patiu naichi ly haisau hawi tleh nai avum u ai.
16 Nichi ly jeaungmang naimy khen u kalingie nai thym y, nichi i deaungdi chymplei naichi ly athyhteng iy padei nai avum u ai. Nichi i yhmchi ly lawm naira avum iy, nichi i ajuchi ly pajang nai avum u ai,” napi.
17 Areng my, “Kai ly Medi chengchinote 13:17\xk Medi chengchi: Pasia empara i phy harei lawm nai Babulon pri nisi tosyh mang y awm nai cheng harei ne.\x*ai, Babulon pri y tiu ai nai kachyh nai ne. Nichi ly tangka ai tahm khai u y. Muku ai py paleung no u y.
18 Mychi i thailihochi hawi thawndeang deaungdichi ai ko iy padei u ai. Nichi ly deaungdi chymplei naichi ai pahyp ai ny y. Deaungdichi ai py pahen ai ny y.
19 Babulon pri ly pri leilachi theung y apu keh iy, mary i khumichi i vui amlyh naira lawm bo. Na i py kai, Areng ly Sodom hawi Komora mary y sa nai kamta, Babulon ai py phra hai ai! Ref 13:19: AA 19:24
20 Huni meingtymra y mana khala py khumichi awm ai nai nga u ai ny y. Mani Arab cheng khuleaung kacheichi py, tai sa iy anga ai nai nga u ai ny y. Mani beram typ nai keungchi py huni meingtym y, mychi i beram kanghuchi sui patlai ai nai nga u ai ny y.
21 Huni meingtym ly daichi mawichi tlai nai meingtym, beaungkuchi tabu sa nai meingtym lawm ai. Huni meingtym y kula-iu tavochi awm iy, sumpajochi py yhm ka-nawichi theung y ampyh u lengleang ai. Ref 13:21: Is 34:14; Zep 2:14; Amt 18:2
22 Angdeangrachi hawi samrang yhmchi ly kasui hawi khivachi a-u nai katyn hawimy amsau na ai. Babulon mary y kamngo pajeng nai neng kani ly ang tym bo! Huna nai awm nai neng kani py dym ai nai kasa bo.