11
Tlamsa nai pri
1 Samrang Davida i kangpreang ly paliu vui nai dengkeaung keung hawi atawm. Na i py dengkeaung miukhiura i chethe kangpho pati nai kamta, Davida kangpreang theung i, samrang kangtha leaungrei amthawn ai. Ref 11:1: Amt 5:5, 22:16
2 Ni ly mymy i khumichi ai peang ai nai cheng naira,
pany thai naira hawi haiho ly Areng i Phailo hawi nga ai.
Ni ly Areng i kangai pany iy, mymy ai tahm khai ai.
3 Mymy i leu tangai nai hawimy amo theu ai.
Ni ly mei hawi niu nai ryrei, ti y baly thai pateang nai ryrei my tara chih pi ai ny y.
4 Khumi kamawnchi ai leu meitang naimy tara chih pi iy, Ref 11:4: 2 Thes 2:8
tahm anem naichi i nga ai avo naichi ama hai ai.
Ni i pei nai leu haiho hawimy, khumi mipuichi ly pajeng naira avum u ai.
Khumi hawi y naichi py dei u ai
5 Ni ly mymy i khumichi ai leu meitang adyh adawi naimy peang ai. Ref 11:5: Eph 6:14
6 Kasuichi ly beramchi hawi vanrei tlamsa naimy awm u ai. Ref 11.6-9: Is 65.25
Takaikhengchi py mi-ichochi hawi vanrei, i u ai.
Sichochi hawi khrangsichi ly vanrei
teicha cha u iy, nichi ai deaungdichi my typ ai.
7 Sinuchi hawi tavymnuchi ly vanrei teicha cha u ai.
Nichi i chochi py vanrei, tlamsa naimy awm u ai.
Khrangsichi ly si, painochi kamta acha cha u ai.
8 Kanu kanei deaungdichi ly pavui kangso kho peang y pavai lawh teu i py,
pavui thailai ka-jeira avum ai ny y.
9 Tameuh i nang parai nai Zion mawi salo y,Ref 11:9: Hab 2:14
ka-jeira lawm hai nai, ti y baly hawi y naira ati sai py awm ai ny y.
Panglichi ly tui kawi mang nai kamta, huni pri y
Areng ai pany nai cheng naira hawimy kawi angym ai.
Pri pala nai khumichi vawi u ali teang nai
10 Samrang Davida kangpreang theung i amthawn nai samrang ly khumi cheng cheaungkhangchi i vui aly len nai ka-ma-ra harei lawm nai neng tym ai. Nichi ly ni i mary pui y jeu achu iy, ni ai tahm pasang ai. Ref 11:10: Rom 15:12
11 Huni neng kani tym nai khala y, Areng ly mymy i sa thai nai haiho teaung bi iy Asuria pri, Aikupta pri, Pathros pri, Ethiopia pri, Elam pri, Babulon pri, Hamath pri, pangli peang meingtymchi hawi tlawnchira y awm rai nai Israela chengchi ai, mymychi i saleaung khuteng mang y pahawi ali teang ai.
12 Mymy ly amprei phro nai Israela khumichi ai py, ahei phro nai Juda khumichi ai khaileaung taki palyh dengdairei kachu ali teang nai ai py, pany hai ai nai Areng my patei nai tamkhawn theaung ai.
13 Israela mipuichi ly Juda mipuichi tlang tleaung y paleung ka-no awm ai ny y. Juda mipuichi py Israela mipuichi i paleung ka-e lawm ai ny y leang bo.
14 Huni pri nyhreichi ly amkawm iy nidym mang y awm nai Philistin chengchi ai tiu iy, nisi pri mang y awm nai khumichi i yhmtheaung katuichi lawm u ai. Nichi ly Edom chengchi hawi Moba chengchi ai pajau iy, Ammon chengchi ai py mychi i sa thai naira anui y awm hai ai.
15 Areng ly ali kabi aho hai iy Zu-e pangli katheaung hawi Euphrat tavochi ai tui kang hai chum baly, amimi py ne sy, tako prei thai nai tavochy saryhrei naini awm hai ai.Ref 11:15: Amt 16:12
16 Aikupta pri dengdairei Israela chengchi theu u nai thym khala i kamta, Asuria pri y awm rai nai, mymy i khumichi theu u ai nai i vui y, lam manglai pui harei lawm hai ai.