10
1 Nangchi ly taham si! Kai i khumichi ai ana ai nai, teng y nai reitachi sa u bo.
2 Hina nai kamta nangchi ly khumi kamawnchi ai mychi nga ai avo naichi ngo thai y ai nai, nangchi ly reita kateng tara chih ai nai so u y. Lumai cheaungtichi hawi nuro nukai chochi i vawnsaichi py la pi pawn nai ne.
3 Nangchi i tlang tleaung y Tameuh my pajeng nai khala, nangchi ati mana sa u ai mo? Mymy ly nangchi ai kamlora i dengdairei ang jeu nai ka-jeira avum hai nai khala, nangchi ati mana sa u ai mo? Kasabawmra hnei ai nai ami teng y angpreng u ai mo? Nangmychi i yhmtheaung katuichi ly ma mang y heu u ai mo?
4 Nangchi ly tavai keung y dei u ai; ti y baly langheng palawn iy ang hawi pawn nai avum u ai. Huni neng khala py Areng ly kado theu nai rym y ai i, kamngo pajeng ai nai kiu pheu naimy awm jo ai.
Asuria samrang ai Tameuh i ateaung alang palawn nai
5 Areng my, “Aw Asuria chengchi awi, kai i kado theu hai nai khumichi tlang tleaung y, nangchi ly samtleang lawm ai nai kaimy teaung ai.Ref 10:5-34: Is 14:24-27; Nah 1:1—3:19; Zep 2:13-15
6 Tameuh by y nai cheng hawi, kai ai kado ang theu hai nai khumichi ai tiu ai nai Asuria chengchi ai kapato bo. Nichi ly lawm nai hawi paviu naimy, huni khumichi ai spryh kamta lamchira y chiu piupa ai nai, kaimy kapato nai ne,” napi.
7 Na i py Asuria empara samrang ly khrukhra hai ai ngai nai deaungkho y, my i vui ka-dawnchi sa yb nai ne. Ni ly pri neangneangchi ai taphra ai nai leu pacheang yb bo.
8 Ni ly amlyh naimy, “Kai i tavailu areng ngiereichi ly samrangchi ne na a!
9 Kalano mary hawi Kakhemish mary, Hamath mary hawi Arpad mary, Samari mary hawi Damaska marychi ai kaimy tiu veng bo.
10 Myn y chiu nai prichi ai kapajeng ai nai kai i kiu pheu bo. Huni pri y ly Jerusalem mary hawi Samari marychi tleaung y mynchi nawi parai nai ne.
11 Samari mary ai mynchi hawi vanrei, kaimy taphra chum veng bo. Jerusalem mary hawi huni mary i khumichi chiu u nai mynchi py, huna nai kamta kasa ai,” napi.
12 Na i py Areng my, “Kai ly Zion mawi hawi Jerusalem mary y sa ai awm nai kalop sa pajau bo nabaly, Asuria empara samrang teng y my i amlyh nai hawi paleung len nai molam y kamngo pajeng ai,” napi.
13 Asuria empara samrang my, “Hini kalop ai kaimy sa nai ne. Kai ly atho awm; cheng naira awm iy pany thai nai ne. Pri khujyhchi taphra iy nichi i pateung achu nai cha nei vawnchi la pi veng bo. Huni prichira y awm nai khumichi ai, kai ly si my chiu nai kamta, kachiu piupa bo.
14 Khaileaung pri y awm nai prichi ly tavo tabu hawi atawm i, kai ly huni pri i yhmtheaung katuichi ai tavo kaduichi kamta, jadeu naimy kalapi veng bo. Ami py pakhi takhym y, labeaung ang u vam y!,” nanai amlyh lawh!
15 Na i py Areng my, “Peuseng ly mymy ai teaung nai keung tleaung y len keh, nanai thui pajau na a? Raw py mymy ai amkhaw iy si nai khumi tleaung y aly len, nanai thui pajau na a? Tamtleang my khumi ai amkhaw nai ny y, khumi my tamtleang ai amkhaw nai ne,” napi.
16 Ati cheaungkhang sa thai nai Areng ly vai i neng y bym pa-rei cha ai nga nai khumichi ai pajeng ai nai, no kanghawi tym hai ai. Nichi i ngan theung y ly mai kamta ango aninau ai.
17 Israela chengchi i kangvang ne iy, chai parai nai Tameuh ly aleng keung amjy cheaungkhang takhawi y naimy, ati cheaungkhangchi ai kanirei y my kang hai nai mai kamta atawm ai.
18 Dei hai pajau nai no mi deaungkho y khumi ly myh kang nai kamta, apu parai nai atu thengreungchi hawi, li hlauchi ly phra bebe ai.
19 Dengkeaung keungchi maidenreichy awm ai khyh bo i, hunichi ai deaungdi my malawn py kati be pajau ai.
Khumi phyreichi naini mymy teng y vawi u teang nai
20 Dei kamthum Israela khumichi ly mymychi ai myh kang vi pa-rei taphra nai khumichi teng y paleung pado y ai nai neng kani tym ai. Nichi ly Israela chengchi i chai parai nai Areng Tameuh ai meitang khyp, ym u tatang ai.
21 Israela khumi phyreichi py, mychi i sa thai nai keung Tameuh teng y vawi u ali teang ai.
22 Vai i neng y Israela chengchi ly pangli spryh jirei vi nawi teu i py, phyreichi naini mymy teng y vawi u ali teang ai. Tameuh ly nichi ai tamyh ai nai paran yb nai ne. Nichi py huna nai tamyh ai nai ataing khyp bo. Ref 10:22-23: Rom 9:27
23 Ati cheaungkhang sa thai nai keung Areng ly mymy i leu pei yb nai kamta, pri verei tamyh pawn khyp ai.
Asuria pri ai Areng my pajeng ai nai
24 Ati cheaungkhang sa thai nai keung Areng ly Zion mary y awm nai mymy i khumichi teng y, “Asuria chengchi ly Aikupta chengchi kamta nangchi ai ana u teu i py, nangchi ly nichi ai jei u moh.
25 Nangchi ai pajeng chum baly kra y naimy kai ly nichi ai tamyh ai.
26 Ati cheaungkhang sa thai nai kai, Areng ly Oreb lengseaung sahawi y, Midian chengchi ai kai i cheaungvawi hawi parip nai kamta, nichi ai py kaparip ai. Kai ly Aikupta chengchi ai ngari kamtang tym hai nai kamta, nichi ai py ngari kamtang tym hai ai.
27 Huni neng kani tym nai khala y kai ly nangchi ai Asuria chengchi kiu i nai law tleaung hai ai. Nangchi i tlang tleaung y mynji kang tleang hai ai ny y. Nangchi khri pa-rei chawn pa nai deaungkho y, nangchi i mynchi ly jang ai,” napi.
Paleung ka-echi my tiu nai
28 Paleung ka-echi ly Ai mary y tym u bo! Nichi ly Mikaron mary y tako prei iy ang jeu u bo! Mychi i cha nei vawnchi ly Meima mary y daw u nai ne!
29 Nichi ly mawi aleaung lam tako u prei iy, Keba mary y anawn u! Huna nai khala Ramah mary i khumichi ly jei u i, samrang Sawla i awm nai meingtym Kibeah mary i khumichi py, preang u pawn nai ne.
30 Aw Kalim mary i khumichi awi, aeu u! Aw Laisa mary i khumichi awi, huni aeu nai raawi tangai u! Anatho mary i khumichi awi, leu pathang u!
31 Madmanah mary i khumichi hawi Kebim mary i khumichi ly mychi law tleaung ai nai preang u pawn bo.
32 Paleung ka-echi ly vaini Noba mary y awm u bo. Nichi ly huni mary i dengdairei, Zion mawi hawi Jerusalem mary ai kiu pahyn u nai ne.
33 Ati cheaungkhang sa thai nai keung Areng ly dengkeaung do nai y changpi tla nai kamta, nichi ai phra hai ai. Nichi theung y paleung len amlyh keh nai hawi khumi kalenchi ai tahm panem vui ai.
34 Atu thengreung theung i dengkeaung keungchi ly atiu mareng tamo hawi aheng nai kamta, Lebanon daichi theung i vang teng keh nai dengkeaung keungchi aheng pawn nai kamta, nichi ai Areng my atlym hai ai.