7
Neampacho
1 Nang ly khri pa-rei lyh ai hawi nai neampachy ne lawh ly!
Vuinawn ka-pi phainai amchiu nai nang i kheuchi ly khri pa-rei apu parai.
Nang i phai tangkengchi ly
myn sa kawp nai keung i kupe lasa hawi atawm.
2 Nang i laileung ly
mui katui padeung yb nai kreip hang khau hawi atawm.
Nang i kajeu ly jeupawm pauchi hawi ka-pu sa nai
chohpui chomaw pau peung mang nai hawi atawm.
3 Nang i paleung kangthai ly sikhi cho kamphi hawi py,
sisiu nyhrei hawi py atawm nai ne.
4 Nang i kaneaung ly kasai nuh hawi sa nai lengseaung yhm hawi atawm.
Nang i meichi ly Hesabon mary pui
katheu pa-kho sahawi i tuisampumchi hawi atawm.
Nang i notareang ly Damaska mary pui ai ama hai nai
Lebanon yhm ka-sang hawi atawm.
5 Nang i lu ly Karamela mawi ka-sang kamta asang hyp bo.
Nang i khui nai sam ly khawitangeung kamta sadi iy,
samrang ai malawn py meicho num hai pajau nai ne.
6 Nang ly khri pa-rei mo-cha hawi parai;
khrei ai hawi parai nai mo-cha hawi angym nai ne.
7 Nang ly chamleaung keung kamta apu parai iy, nang i paleung kangthaichi ly
chamleaung athai phrawnchi hawi atawm nai ne.
8 Kai ly chamleaung salo y lyn iy
athaichi jaw ai.
Nang i paleung kangthaichi ly kreip athai phrawn hawi py,
nang i taho nai ali ly apple athai mui amseaung nai hawi py,
9 nang i labeaung ly tuikeh nai kreip hang hawi py atawm, nanai kai athang khai.
Neampachy
Huna lawh baly huni kreip hang ly kai i khrei nai nang i labeaungteng hawi,
hochi sala i nai tao aleaung mang hawihai palai leaung jo sy.
10 Kai i khrei nai keung ly kai ai peang, ni ly kai ai kadeaung naimy awm bo.
11 Kai i paleungjyn y khrei nai keung awi, jeu jau ba;
li prangchi mang y chei hawi sina, avangchi theung y vum jei hawi sina.
12 Ani ly khawn angthodyh ang thau iy,
kreip keungchi pau mo, pau y mo, nanai py,
pauchi angdai mo, angdai y mo, nanai py,
thaitleung keungchi pau mo, pau y mo, nanai py khen hawi sina.
Huni meingtym y nang teng y kai i khrei nai kang pei ai.
13 Nang ly khuma athai mui amseaung nai pany ai nai ne.
Ani i takun katheu pa-kho sahawi y tui parai nai thengthai athai cheaungkhang awm.
Paleung jyn y khrei nai awi, kaimy nang i vui
thengthai athai cheaungkhang pateung achu pi bo.
1 Kai ly nang ai kaimy i amhm kanu tui nei nai khumi,
Kai i ampro kypkyp palawn ai nai ngai parai nai ne.
Naibaly kai ly nang hawi lam y avum iy nang ai pachawm lawh baly,
khumichi my thui tamawn ai ny y.
2 Kaimy nang ai nei i yhm mang y hawi iy,
kai ai khrei nai leaungsai patiu pi ai.
Mui katui padeung nai kreip hang py,
thaitleung hang py kang panei ai.
3 Nang ly nangmy langvawi kiuban tleaung y kai ai lu tleang hai iy,
lamtang kiu hawi kai ai takawi me bo.
4 Jerusalem mary i neampachychi awi,
nangchi ly kaini i akhrei nai paka ai ny y, nanai leu adeu u.
Tariu i khulym
Neampachychi
5 Mymy i khrei nai khumi hawi kiu asyn iy
daichi ka-vym mang jeu nai ly ami mo?
Neampachy
Kai ly khrei nai keung i tapen nai meingtym
apple keung anui y, ni ai i kapalaw nai ne.
6 Kai ai ny y baly takhra ami ai py khrei moh;
Kai ai ny y baly takhra ami ai py takawi moh.
Khrei nai paleung ly dei nai kamta sa thai naira awm;
khrei nai mai ly tavau saleaung kamta atho awm.
Huni ly vaimy angveaung ryp iy,
atho awm nai mai kadeu kamta, kang hai pajau nai ne.
7 Akhrei nai mai ai ly tui hawi padei pajau y;
huni ai mani tavo tui my py um pajau y leang.
Khumi ly amy i yhmtheaung katui hawi akhrei nai ai vang ai nai atho sa baly,
panui hai naira naini avum ai.
Neampachy i amprochi
8 Kaichi teng y yhmtheaung sa ai lawm y rai nai
tuichochy leaungrei awm;
ni ai khrei nai khumi awm nai khala y,
achi ati mana sa ai mo?
9 Ni ly mary apai lawm lawh baly
achi ly huni mary apai salo y tangka hawi angdeangra yhm ka-sang sa pi ai.
Na i py ni ly mary apai katheu pa-kho lawm lawh baly
kaichi ly huni katheu pa-khora y saitleang katheuchi tai pi iy khaw hai ai.
Neampachy
10 Kai ly mary apai lawm iy
kai i paleung kangthai ly mary apaira i angdeangra yhmchi ne.
Kai ly ni hawi vanrei awm ai nai nga baly, paleung awmnem ai i,
amo theu naimy awm, nanai kai i khrei nai keung my pany bo.
Neampacho
11 Samrang Solomon teng y Bala Hamon napi nai meingtymra y akho harei awm.
Samrang ly akho kry nai keungchi ai vawi takhra iy akho pheaung alai ai nai pei bo;
nichi ly samrang teng y leaungrei nai y
tangka chang sangrei pei ai nai tla.
12 Samrang Solomon ly mymy i nga ai avo nai tangka chang sangrei ai py,
samrang i akho kry naichi ly mymychi i phy nga nai tangka chang chungvairei ai py la pajau nai ne.
Kai ly kaimy i peang nai akho ai, kaimy teng y akhai nai ne!
13 Kai i khrei nai awi, akho theung i dengdairei, nang i raawi thai ai nai pei kyh;
nang i leu raawi ai ly kai i ahawichi py kano patheung u nai ne.
Neampachy
14 Kai i khrei nai keung awi, sikhicho kamta py, rimui keung cheaungkhang prau nai mawi salo i,
sisiu beaungjeaung katai kamta py, kai teng y jeu jau ba.