13
Israela chengchi i vui y kangkhym kangtem i tara chih nai
1 Vaichi khala Ephraim cheng theaungchi i thui nai leu ai, takhra Israela cheng theaungchi ly jei hyn u bo. Takhra Israela cheng theaungchi ly Ephraim cheng theaungchi ai tahm khai u nai ne. Na i py nichi ly Bala tameuh ai chiu u nai kamngo molam y dei u ai.
2 Nichi ly tau cheng nai khumichi i kasabawm hawi, tangka mynchi chiu iy kamngo sa ra sa ra nai ne. Naibaly nichi my, “Hini mynchi teng y apathyp u!” nanai thui u. Khumi ly huni si katai mynchi ai pachawm ai nai avo na a!
3 Hunai deaungkho y hini khumichi ly khawn mang y tla reng nai kadam kamta py, khawn angthodyh y tama reng nai kadam amai kamta py, tama u ai. Nichi ly choh ati nai meingtym i ali my hm iy akheang nai choh ali kamta py, paheung mang theu nai maikhyh kamta py tama u ai.
4 Areng my, “Kai ly nangchi ai Aikupta pri dengdairei pahawi nai, nangchi i Areng Tameuh ne. Nangchi ly kai ny y baly Tameuh takhra by y, kai leaungrei naini nangchi i atleu keung ne.
5 Kai ly jengha iy bi parai nai daichi ka-vymra y, nangchi ai kang kry nai ne. Ref 13:5-6 Leu 8:11-17
6 Na i py nangchi ly tlamsa naira angym nai pri y tym iy, teicha teinei kajeu kawi pa-rei cha ai nai nga nai deaungkho y, paleung tuinem nai khala, paleung len i, kai ai tami u bo.
7 Hunai deaungkho y khrangsi kamta, nangchi ai ka-jo hau ai. Nangchi i chei nai lam jeungrei y, takaikheng kamta kang-oh ai.
8 Cho tama nai tavym kamta, nangchi ai kang be puipa ai. Khrangsi kamta avum nai meingtym y kei iy, daichi mawi kasi kamta theng piupa ai.
9 “Israela khumichi awi, kai ly nangchi ai tamyh vui ai. Nangchi ai ami my sabawm pajau ai mo?
10 Nangchi ly samrang hawi lu sa nai keungchi ai, kaichi ai pei ba, nanai hnei u bo. Na i py hini khumichi ly pri atleu pajau na a?
11 Kai ly kado theu naimy nangchi teng y samrangchi pei pi bo. Kai ly kado katheu hawimy, huni samrangchi ai la teang vui bo.
12 “Israela chengchi i kamngo sa nai ai record khai iy, huni recordchi ai kryme nai ne.
13 Israela chengchi ly tlang heng ai nai nga nai ly lo kawp y nai deaungkho y, khri pa-rei tamang na bo. Nichi ly tapen ai nai neng tym i py, tapen ai ngai y nai deaungdicho hawi atawm.
14 Kai ly hini khumichi ai tavau pri i nai py, dei areng i sa thai naira i nai py, atleu ai ny y. Aw dei areng, nang teng i no kanghawi tym hai ba. Aw tavau pri, nang teng i phra naira tym hai ba. Kai ly hini khumichi ai pahen y, tamen y leang bo. Ref 13:14 1 Kor 15:55
15 Israela chengchi ly acha keungchi kamta angvai i py, kai ly khutaha daichi ka-vym mang dengdairei, nisi mang i ali kabi aho hai nai deaungkho y, nichi i tavo micheaungchi hawi tuikanchi kang hai iy, vang kateng vawnsai ngiereichi chau pawn ai.
16 Samari mary i khumichi ly kai ai tiu nai deaungkho y, pajeng naira avum ai. Samari khumichi ly tavai molam y dei u ai. Deaungdichochi ly khaileaung y athyh iy, padei nai avum u ai. Neampachy jeubomchi i kajeu py, phokra nai avum ai.