14
Israela chengchi teng y Hosea my takeng nai
1 Israela khumichi awi, nangchi i Areng Tameuh teng y vawi u teang jau. Nangchi ly nangmychi i kamngo molam y athei thleaung iy atlym u bo.
2 Areng teng y vawi u ali teang iy, mymy teng y hina nai chiu so takeng u. “Kaichi i kamngochi pahen pi iy, pahen nai saho y kaichi ai kawn pi kyh ba. Kaimychi adeu nai kamta, nang i nang parai nai sai ai palo ai.
3 Asuria samrang ly kaichi ai mana khala py atleu pajau y. Tavai keaungngochi ly kaichi ai amo hai pajau y. Kaimychi kiu hawi sa nai mynchi ai, kaichi i Tameuh, nanai thui ali bi y ai. Aw Areng, nang ly awmra jeaungmang nai khumichi ai pahen nai ne”
Areng my Israela chengchi i vui deung kangtha sa pi ai nai adeu nai
4 Areng my,
“Kai i khumichi ai kaimy teng y vawi hai ali teang ai.
Kai ly nichi ai paleung hawi verei tamen ai;
nichi i tlang tleaung y kado theu nai rym bo.
5 Kani tui ly jengha nai khaileaung y suino hai nai kamta,
kai ly Israela khumichi ai tlamsa hai ai.
Nichi ly kaseaung kamta pau amthym u ai.
Lebanon mawi i dengkeaung keung kamta, tangjyn aviu ai.
6 Nichi ly paumyn hawi sai angpho naimy angvairu iy,
olive keung kamta apu parai ai.
Lebanon thengreung i saitleang keung kamta
mui kahawi amseaung ai.
7 Nichi ly kai i kry nai ka-khui anui y awm ai nai nga u ai.
Nichi ly chohchi pati iy
kreip akho kamta athai pasu parai ai.
Nichi ly Lebanonra i kreip hang kamta, amyn amthang ai.
8 Israela khumichi ly mynchi hawi atakai u ai.
Kai ly nichi i chiu sa nai tangai iy, nichi ai kry ai.
Kai ly heng-yh jo nai keung kamta, nichi ai ama hai ai.
Kai ly nichi i vui amtheaungra lem phraiphreaung pa-rei leaung naira lawm ai.
Patem nai leu
9 Tau cheng nai khumi hawi dawn pasym thai nai khumichi ly hini cha-iura tajiu nai ngiereichi ai dawn pany thai iy, paleung theung y pateung u me na sy. Areng my khai pi nai reitachi ly teng nai deaungkho y khumi kahawichi ly huni reita lamchi kamta tangai iy, heng u bo. Na i py kamngo sa nai khumichi ly huni reita lamchira y tako u y nai deaungkho y, athei thleaung iy atlym u nai ne.