3
Habakkuk i chiu sa nai
1 Hini ly amo Habakkuk i chiu sa nai ne.
2 Aw Areng , nang i sa nai leaungsaichi kai thai bo i,
kai ly jei hyn naimy lyh na bo.
Nang i sa nai nang parai nai saichi ly
kaichi i deung y py, so pi teang kyh ba.
Nang kado theu nai neng khala y py, pahen pi kyh ba.
3 Tameuh ly Edom pri mang dengdairei ang jeu ali teang ai;
Chai parai nai Tameuh ly Paran mawi aheung mang dengdairei ang jeu ai.
Mymy i phum-ang ly kani khusang y khiu na bo.
Khaileaung py mymy ai palo nai raawi hawi kawi na bo.
4 Mymy ly kanito kangvang kamta sangso angvang teaung naimy ang jeu bo.
Sa thai naira awm nai kiuban i nai
kangvang sangso theu nai ne.
5 Mymy ly mymy mo i my, no kanghawi pato iy,
nithun mang ly dei areng abang hai bo.
6 Mymy anawn nai khala y, khaileaung amchyh na.
Tlenrei khen lau nai ryrei my, khumi cheng cheaungkhangchi ahyn u bo.
Deungrei awm nai mawichi ly dei lawm vui iy,
jangni jangkhawn i neng y mymy aleaung reng nai, mymy awm jojo nai mawi katheangchi ly tama pawn veng bo.
7 Kushan khumichi jei hyn naimy awm nai py,
Midian khumichi kaso theu naimy awm nai py, kai ly niu.
8 Aw Areng, nang kado theu ai nai kachyh nai ly tavochi, micheaungchi my a?
Nang ai khri pa-rei kado theu hai nai ly pangli my a?
Nang ly tamaichi theung y atang bo;
nang i khumichi teng y eaung naira
tym hai nai khala, ali kani hawi tamai ly
nang i tavai keaungngo ka-ri ne.
9 Nang ly nangmy i thailiho py,
ko ai nai thailiho chyn py, angveirym bo.
Nang i amlosadi ly khaileaung ako hai bo.
10 Nang ai niu nai khala, mawichi ly amchyh u;
Kani mang dengdairei tuichi leaung.
Khaileaung theung i tuichi ly katyn amsau na;
tui sampyhchi py asang na bo.
11 Khri pa-rei rang nai thailiho chynchi ly angvang thlithlup iy,
tivichi ly kangvang sadi nai khala y,
kanito hawi lo ly anawn veng bo.
12 Nang ly kado theu naimy khaileaung y amki prei iy,
kado theu nai haiho hawi, khumi cheng cheaungkhangchi ai chiu piupa bo.
13 Nang ly nangmy i khumichi hawi
nangmy i khai takhra nai khumi ai, atleu ai nai jeu kyh ba.
Nang ly khumi hawi y nai i lu sa nai ai, taphra vui iy
ni i nithun abang naichi ai tama hai chauchau bo.
14 Nang i thailiho chyn ly tavailu areng ai ko nai pri leu vui bo.
Ni i tavaimi kamkawm ly ali kamchai kamta, kaichi ai hm pawn ai nai ang jeu u.
Nichi ly khumi kamawnchi ai ana pumpi nai khumichi kamta, khri pa-rei paleung ateng hai u bo.
15 Nang ly nangmy i keaungngochi hawi, pangli y chiu nai khala,
tuichi ly phawn theu na bo.
16 Kai ly hini leaungsaichi thai baly kaso theu;
kai i labeaung teng ly jei nai
ahyn thlyhthlyh naimy tlang ly nau vui iy,
kheuchi ly atlym khikha na bo.
Kaichi ai tiu nai khumichi ai, Tameuh my pajeng nai neng tym pa-rei,
kaichi ly awmnem nai my ajeng ai.
17 Thaidu keungchira y athai by y,
kreip keungchi ly kreip athai athai y;
Olive keungchi eaung y,
li hlauchira y amti amjang thawn y,
beramchi ly dei be i,
tawnbawi yhmchi akeu rang teu i py,
18 Aw Areng Tameuh, nang ly kai i atleu keung ne nai deaungkho y,
kai ly amo theu naimy awm ai.
19 Ati cheaungkhang sa thai nai keung Areng ly kai ai atho pei bo.Ref 3:19 2 Sam 22:34; Sam 18:33
Nang ly kai ai sitha kamta kheu khaw hai iy,
mawichira y chymme naimy khai bo.