2
Habakkuk teng y Areng my pathang pi teang nai
1 Kai ly angdeangra chang salo y lyn iy ajeng naimy, Areng my kai i thui ai nai leu mana thui pi na mo, kai i amti pi nai ai mana pathang pi na mo, nanai ajeng ai.
2 Areng my kai teng y, “Nang ai kaimy pany hai nai satangchi phain praw thai ai nai lengseaung pheichira y tajiu; pany chai pyn pa-rei tajiu ba.
3 Huni atitichi meitang khyp ang tym ai nai neng ly tym y leang rai. Na i py kaimy patei ai naichi tym angchi khyp ai nai neng ly ang tym kasa praw ryp ai. Huni neng ly tym patyh kyh ai nai athang khai. Na i py tym angchi khyp ai bo i, ajeng rym naimy awm ba, kra y leang mang.Ref 2:3 Heb 10:37
4 Pany hai nai leu ly ‘khumi hawi y naichi ly heng pajau y leang; khumi kahawichi ly Tameuh ai ym nai deaungkho y heng u ai.’ ” napi.Ref 2:4 Rom 1:17; Kala 3:11; Heb 10:38
Khumi hawi y naichi i khym taham kasi
5 Nang chawn nai ly li-tapawp reng; ngai phi ala naichi ly paleung len amlyh iy, paleung khaw y. Nichi ly dei areng kamta, mana khala py paleung anyp vai y. Hunai deaungkho y nichi ly pri harei bo baly pri harei ai tiu iy peang vui reng nai ne.
6 Tavai sum nai khumichi ly tavai eaung nai khumichi tlang tleaung y, paleung no-ei nai leu katheu iy, khumi aniu y nai sa u ai. Nichi my, “Amychi peang y nai yhmtheaung katuichi ai lawm u nai nangchi ly taham si u bo. Nangchi ly mana tanrei kakra, nangmychi i kalai keungchi ai tapawp iy, nangmychi nang chawn ai nai sa u veangveang ai mo?” nanai thui u ai.
7 Ka-vo ka-leang malawn py pany y naimy, amichi ai tiu iy eaung nai nangchi ly kalai awm i, athorei my katy pe hai ai nai avum ai. Paleung ka-echi ly jeu iy nangchi ai kaso tahyn theu hai ai. Nangchi ai tiu iy lawm u ai.
8 Nangchi ly pri neangneangchira i khumichi ai tiu iy lawm u bo. Vai dei kamthum khumichi ly nangchi my khumi ai padei nai molam py, khaileaung pri i khumichi hawi, marychi ai tiu nai molam py, nangchi ai tiu iy lawm u ai.
9 Nangchi ly taham si u! Athorei my tiu naira i nga nai yhmtheaung katuichi hawi, nangchi ly nangmychi i dengtheungchi ai nang chawn hai bo. Atho sa iy mychi i tabu ai ka-sangra y sa nai tavo kamta, mymychi i yhm ai phrumai by y pa-rei sa u bo!
10 Na i py nangchi i dawn tau naimy ly nangmychi i khumichi ai kangji nga hai bo. Nangchi ly khumi cheng cheaungkhangchi ai tamyh nai molam y, nangmychi naimy phra naira tym bo.
11 Yhm angpang lengseaungchi malawn py, nangchi ai ang jo sei iy amphura i yhmkuichi my, raawi avah hai na bo.
12 Nangchi ly taham si u! Nangchi ly reita taphrara y sangum pala i, khumi ai padei iy mary sa bo.
13 Nangchi my tiu iy eaung nai khumichi ly atyhtyh naimy kalop sa iy, atho bai u. Nichi my sa nai yhm hlau ngireichi ly mai my kang pawn bo. Hini ly ati cheaungkhang sa thai nai Areng my sa nai ne.
14 Panglichi ly tui my kawi nai kamta, khaileaung py Areng i nang parai nai ai pany nai hawi kawi naimy awm ai.Ref 2:14 Isaia 11:9
15 Nangchi ly taham si u! Nangchi ly kado theu nai deaungkho y, nangmychi i yhm deaungpa prichi ai cheh iy kangji khai u bo. Nichi ai pavui tapai nai kamta atlym hai khikha bo.
16 Nangchi ly tahm awm ai nai tleaung y, kangji nga ai nai neng tym ai. Nangmychi kypkyp py, neicha iy pavui tapai u ai. Areng ly nangchi ai kamngo pajeng nai khau nei hai ali teang iy, nangchi i tahm awm nai ai ly kangji nga nai mang y tym hai ai.
17 Nangchi ly Lebanon thengreungchi paliu u bo. Vai ly nangmychi kypkyp ai paliu nai avum u ai. Nangchi ly huni thengreung theung i amso tawnbawichi ai tleh u bo. Vai ly amso tawnbawichi my nangchi ai jei hyn hai ai. Nangchi my sa tamang nai khumi ai padei nai molam py, khaileaung pri y awm nai khumichi hawi marychira awm nai khumichi ai khrukhra hai naichi molam py, hina naichi tym ai.
18 Mynchi ly atira y teaung ai mo? Hunichi ly khumichi my sa nai teu i, katapawpra ny y baly ati sai py katheu thai y. Amy i sa naira ai ym nai ly ati kamran nga ai mo? Huni ly leu katheu thai y nai tameuh ne na a!
19 Nangchi ly taham si u! Deng keaung beang ai, “Anglaw jau” nanai py, lengseaung ai, “Angthau jau” nanai py, nangchi thui u reng nai ne. Myn ly nangchi ai ati thui pi pachai thai ai mo? Muku tangkachi hawi an paleaung nai ne i py, huni myn ly heng y leang.
20 Areng ly mymy i chai parai nai Achura yhm y awm. Khaileaung pri y awm nai khumi bawibawichi ly mymy i mo y awmnem naimy awm u sy.