2
Achura yhm kangtha i apu nai sai
1 Areng ly huni saneng saryh lo, kani apom phai harei kani y, amo Hakai dengdairei, mymy i leu pei nai ly
2 mymy ly Hakai ai hina nai thui hai bo. Mymy ly nang ly Juda samrang i bangtang kalen Jerubabela, pathyp pi nai keung kalen keh Josua hawi huni bo i mipuichi teng y,
3 “Vaichi khala i Achura yhm ly mana tanrei apu parai na mo, nanai pany nai khumi nangchi theung y awm a? Vai ly hini Achura yhm ai, nangchi ati mana niu u mo? Huni ly ati sai py ny y nai kamta lawm ai. Ref 2:3 Ezra 3:12
4 Na i py aw mipuichi awi, paleung atho di u mo? Kai ly nangchi hawi vanrei awm nai ne iy, nangmychi sa ai awm nai kalop naini, nangchi so u.
5 Aikupta pri i dengdairei nangchi vawi u nai khala y, kai ly nangchi hawi vanrei awm jo ai, nanai adeu nai kamta, vai khrairei nangchi hawi vanrei kai awm; hunai deaungkho y jei u moh.Ref 2:5 Theu 29:45-46
6 “Kai ly kra y naimy kani khusang hawi khaileaung ai py, kacheng hawi pangli ai py, amchyh hai bo. Ref 2:6 Heb 12:26
7 Khumi cheng cheaungkhangchi ai taphra pawn ai. Huni khumichi i muku tangka, yhmtheaungchi ai, hini meingtym y khumichi ai syn hai ai. Achura yhm py muku tangka, yhmtheaungchi hawi kawi naimy awm ai, nanai ati cheaungkhang sa thai nai Areng my leu pei bo.
8 Khaileaung pri y awm nai ngierei, muku tangkachi ly kai i ne.
9 Achura yhm kangtha ly Achura yhm kangngym tleaung y apu keh ai. Huni meingtym y kai ly kaimy i khumichi ai nang chawn hai iy, tlamsa naira pei ai, napi. Hini ly ati cheaungkhang sa thai nai Areng my thui nai leu ne.
Pathyp pi nai keungchi teng y amo i leu adeng ahui nai
10 Empara samrang Dari i peang nai pa-nyh saneng, takawrei lo, kani apom phai palyhrei kani y, ati cheaungkhang sa thai nai Areng i leu ly Hakai teng y tym bi bo.
11-12 Mymy ly “Khumi leaungrei ly Tameuh teng y talam chum nai mawi ai, my i ateaung hawi tapau iy, kreip hang, olive asitui, ti y baly mani mo teicha teinei py ne sy, ateaung hawi abi lawh baly, huni teicha teinei ly katalamra teicha teinei lawm vui ai mo, lawm vui y mo, nanai reita leu pei nai kamta, leu pacheang pi ai nai pathyp pi nai keungchi teng y deng,” napi.
Huni molam deng nai khala, pathyp pi nai keungchi my, “Huni teicha teineichi ly katalamra teicha teinei lawn y leang,” nanai pathang u bo.
13 Naibaly Hakai my, khumi leaung leaungrei ly khumi tlaiveu ai abi nai deaungkho y, chai y tapi rai. Naibaly ni ly huni teicha teineichi ai abi lawh teu baly, hunichi py chai y vui ai a? nanai deng.Ref 2:13 Kati 19:11-22
Pathyp pi nai keungchi my, “Hunichi ly chai y ai,” napi u.
14 Naibaly Hakai my, “Hunai kamta teang, hini pri i khumichi hawi nichi i sa nai leaungsaichi ly chai y nai deaungkho y, maicham salo y talam nai kapathypra ngierei py chai y, nanai Areng my leu pei bo,” napi.
Amtheaung naira pei ai nai Areng my leu pei nai
15 Areng my, “Nangchi ly nangmychi avum nai leaungsai ai niu u y nai sai a? Achura yhm so y rai khala,
16 nangchi ly chohpui chomaw teaung chungvai nyhrei awm ai nai athang khai nai ly teaung chungvairei naini awm khyh na a. Kreip hang palang chungvai atlo apom phai pangrei nga ai nanai thui u iy, kreip hang khai nai chy-y pui y khen nai khala, palang vuipangrei niu khyh na a.
17 Kai ly nangchi atho sa iy pati nai amti amjang ngiereichi ai ali kabi hawi py, kaleung my cha iy jeirawm hai nai py, ji amai hawi py taphra bo. Na i py nangchi uikheih u y.
18 Vaini ly Achura yhm sangum langdeng pala chum nai kani, takawrei lo, kani apom phai palyhrei kani ne. Huni kani dengdairei mo mang y ati tym ai mo, nanai nangchi khen u.
19 Nangchi teng y chohpui chomaw by y bo i, kreip keungchi, thaidu keungchi hawi olive keungchi py athai y leang rai. Na i py kai ly vai i dengdairei, nangchi ai amtheaung naira pei ai,” napi.
Zarubabela teng y Areng my leu adeu nai
20 Huni lo kani apom phai palyhrei kani y my, tlen pa-nyh Areng i leu ly Hakai teng y,
21 Juda samrang i bangtang kalen Zarubabela i vui mymy ly “Kai ly kani khusang hawi khaileaung amchyh hai i,
22 pri bawibawichi ai taphra iy, nichi i sa thai naira jum hai ai. Tavai keaungngo ka-richi atang nai keungchi hawi vanrei akhum hai meuh ai; keaungngochi ly dei ai. Keaungngo atang nai risachi py, mychi tengtawi atleh u ai.
23 Kai i miseaung tatang Zerubabela awi, huni kani y kai ly nang ai kang la ai i, kai i jeng y peang hai ai. Nang ly kaimy vawi takhra nai khumi ne,” napi bo. Hini ly ati cheaungkhang sa thai nai Areng my thui nai leu ne.