ZEKHARIAH
I AMO LEU
1
Areng my vawi ali teang ai nai, mymy i khumichi ai palau nai
1 Hini leu ly Pasia empara samrang Dari my peang nai pa-nyh saneng, tajarei lo theung y Areng my amo Zekhariah teng y pei nai leu ne. Zekhariah ly Iddo i katu, Berekhia i chapo ne. Ref 1:1 Ezra 4:24—5:1, 6:14
2 Ati cheaungkhang sa thai nai Areng my Zekhariah teng y, “Kai, Areng ly nangchi i amsi pajochi ai, khri pa-rei kado theu hai bo.
3 Na i py vai nangchi ly kai teng y vawi u ali teang; kai py nangchi teng y kang jeu ai.
4 Nangchi ly nangmychi i amsi pajochi kamta so u moh. Jangni khala i amochi ly nichi teng y hawi y nai saichi anawn u ai nai thui pi teu i py, nichi ly tangai y, dawn dan u y.
5 Huni amochi hawi nangchi i amsi pajochi ly dei u be veng bo.
6 Kai ly kaimy i amochi dengdairei, nangchi i amsi pajochi teng y leu pei naichi hawi pany hai nai leuchi kapei pi nai ne. Na i py nichi ly kai i leu ai dawndan u y nai deaungkho y, avo nai kamta pajeng naira avum u. Huna nai khala nichi ly uikheih u. Ati cheaungkhang sa thai nai kai, Areng ly kaimy i dawn yb nai kamta, nichi ai kamngo vang kamlau parip nai ne, nanai py pany u ai,” nanai nichi teng y thui pi ai nai leu pei nai ne.
Amo i paleung mei y keaungngochi niu nai
7 Empara samrang Dari i peang nai pa-nyh saneng, Shebet lo napi nai lo holai ha, kani apom phai palyhrei kani y, Areng ly vum y kai teng paleung mei y amteng pi bo.
8 Kai ly keaungngo kamsen atang nai khumi leaungrei ai kaniu bo. Ni ly leaunghawi theung y awm nai muratu keungchi sala y angdo naimy awm. Ni i nithun y ly keaungngo kamsen, keaungngo kariura hawi keaungngo kangleung awm.Ref 1:8 Amt 6:2-8
9 Kaimy ni teng y, “Areng awi, hini keaungngochi i awm nai sai ly ati mo?,” napi.
Ni my, “Nichi ly ati mo, nanai kaimy thui pi ai.
10 Areng ly khaileaung pri y khen ai nai nichi ai pato nai ne,” nanai pathang.
11 Keaungngo atang naichi my kani pri amtaw thau nai teng y, “Kaichi ly khaileaung pri verei y amki be veng bo. Khaileaung pri verei ly jeaungmang iy sabawmra by y nai kaniu u,” nanai amti pi.
12 Naibaly kani pri amtaw thau nai my, “Aw ati cheaungkhang sa thai nai Areng, Jerusalem mary hawi Juda marychi ai nang i kado theu nai ly saneng vui saryhrei awm bo; huni marychi ai pahen y naimy, mana tanrei awm jo ai mo?,” napi.
13 Areng ly kani pri amtaw thau nai teng y paleung pahawi nai leuchi thui pi nai deaungkho y,
14 kani pri amtaw thau naimy py kai teng y, “Ati cheaungkhang sa thai nai Areng my, kai ly chai parai nai Jerusalem mary pui ai khri pa-rei tamen iy kapahen nai ne.
15 Kai ly kaimy i khumichi tlang tleaung y tym ai nai kado theu nai kam-yh nai thym y, tlamsa naimy awm ai nga u nai khumi bawibawichi ly kai i khumichi avum nai ngari kamtang panawi ra bo. Naibaly kai ly huni khumichi ai khri pa-rei kado theu hai nai deaungkho y,
16 Jerusalem mary ai pahen nai sai patei ai nai, kavawi ali teang nai ne. Kai i Achura yhm sa palum teang iy, Jerusalem mary pui ai py, sa palum u teang ai nai tla ai,” napi.
17 Kani pri amtaw thau naimy kai teng y, “Ati cheaungkhang sa thai nai Areng ly mymy i marychi bi-ai ali teang ai nanai py, mymy ly ang jeu ali teang ai i Jerusalem mary ai sabawm iy, mymy i peang nai mary pui palawn vui ai nanai py, amthang hai ba,” nanai ang thui pi bo.
Paleung mei y takichi niu nai
18 Kai ly takhra paleung mei y niu nai hareira y, si taki palyhrei kaniu.
19 Kai ly kaimy hawi vanrei leu arum nai kani pri amtaw thau nai teng y, “Hini taki palyhrei i awm nai sai ly ati mo?,” nanai kadeng cham bo.
Huni kani pri amtaw thau nai my, “Huni takichi ly Juda khumi, Israela khumi hawi Jerusalem mary i khumichi ai ahei hai phro nai khaileaung pri i sa thai naira awm nai khumichi ai pata nai ne,” napi.
20 Naibaly Areng ly kai ai, sakichi syn iy kalop sa nai khumi leaung palyhreichi ai patei.
21 Kai my, “Hini khumichi ly ati sa ai nai jeu u nai mo?,” kanapi.
Nimy, “Nichi ly Juda chengchi ai ahei hai iy, tamyh be pawn nai khumichi ai kaso theu hai iy tiu pajau vui ai nai ang jeu u nai ne,” napi.