HAKAI
I AMO LEU
1
Areng my Achura yhm sa palum teang ai nai leu pei nai
1 Pasia pri empara samrang Dari i peang nai pa-nyh saneng, tariu lo, kani harei kani y Areng my amo Hakai teng y pei nai leu ne. Huni leu pei nai ly Juda samrang i bangtang kalen Shealtiel i chapo Zerubabela hawi, pathyp pi nai keung kalen keh Jehizada i chapo Josuachi i vui ne.Ref 1:1 Ezra 4:24—5:2, 6:14
2 Ati cheaungkhang sa thai nai Areng my Hakai teng y, “Hini neng ly Achura yhm sa palum teang ai nai neng ny y, nanai hini khumichi my thui u bo,”
3 nanai leu pei chum baly amo Hakai dengdairei, Areng i leu ly mipuichi teng y,
4 “Kai i khumichi awi, nangchi ly yhm hlau kahawichira y awm u teu i py, kai i Achura yhm ly phra seaungkhrang lawh ly!
5 Ati mana mo, nanai nangchi niu y nai sai a?
6 Nangchi ly chohpui chomaw neangneang pati u teu i py, maidenreichy naini pakym u khyh. Nangchi teng y teicha teinei awm i py, bym pa-rei cha ai nai aleu y, kreip hang awm i py pavui na pa-rei nei ai nai aleu y, baichu ateaungchi awm i py bi-um na pa-rei ateaung ai nai alawn y, kalop sa keung py kajeu ka-rei kawi pa-rei, sa nai vang ngo y.
7 Ati mana nai y hina nai tym nai mo, nanai nangchi niu u y nai sai a?
8 Vaimy mawichi mang y chei u iy, dengkeaungchi lo u ly Achura yhm so u teang. Hunaibaly kai ly kawn ai; cheang baly avo nai kamta kai ai chiu u pajau ai.
9 “Nangchi ly amti amjang neangneang pakym achu ai nai nga u ai, nanai athang khai i py, maidenreichy naini nga u khyh nai ne. Yhm y syn u nai khala py, kai ly hunichi ai kang hm pi pan vui bo. note 1:9 kang hm pi pan vui bo; ti y baly kang taphra pi pan vui bo.Ati mana nai y kai ly hina nai sa mo na baly, nangchi bawibawi ly nangmychi i yhmchi sa nai hawimy, kalop nawi ala iy, kai i Achura yhm ai ly phra seaungkhrang naimy awm hai jo nai deaungkho y ne.
10 Hunai molam y kani khang hai i, mani amti amjangchi py nangchi pati ai nai ngo u y.
11 Kai ly hini pri y jengrawm hai bo. Hini pri i mawi aheungchi, li hlauchi, kreip akhochi hawi olive akhochira y py, khaileaung i theu nai amti amjang ngiereichira y py, khumi hawi tawnbawichi ai py, nangchi i atho sa naimy pati nai amti amjangchira y py, kani khang hai bo,” napi.
Areng i leu pei nai ai khumichi tangai u nai
12 Naibaly Shaltiel i chapo Zerubabela, pathyp pi nai keung kalen keh Jehizada i chapo Josua hawi Babulon pri y pri pala naira i vawi teang nai mipui bawibawichi ly mychi i Areng Tameuh my leu pei nai kamta sa u bo. Nichi ly jei hyn nai deaungkho y, Areng my pato nai amo Hakai i thui nai leu tangai u bo.
13 Naibaly Areng i leu pei nai thui pi nai keung Hakai ly “Areng my, kai ly nangchi hawi vanrei awm ai,” nanai leu pei nai ly khumichi teng y thui pi.
14 Areng ly Juda samrang i bangtang kalen Shaltiel i chapo Zerubabela, pathyp pi nai keung kalen keh Jehizada i chapo Josua hawi pri palara i vawi u teang nai khumi bawibawichi ai, Achura yhm sa naira y paleung apei hai bo. Nichi ly mychi i Areng, ati cheaungkhang sa thai nai Tameuh i Achura yhm sa nai ly
15 empara samrang Dari i peang nai pa-nyh saneng, tariu lo, kani apom phai palyhrei kani y sa u amteaung nai ne.