8
Pathyp pi nai keung kalen keh Isu
1 Hunaibaly kaichi i leu thui naichi theung y aly len keh nai ly hini ne he: achi ly hunai kamta pathyp pi nai keung kalen keh;Ref 8.1: Sam 110.1
2 kani mang y Tahm Asang Keh Nai i areng atehra lamtang mang y ateh i, Meingtym Kachai hawi achura yhm tatang, khumi i sa nai ny y nai, Areng i jang naira y kalop sa nai keung nga bo.
3 Pathyp pi nai keung kalen keh ngiereichi ly atiti pei nai hawi apathyp nairachi talam ai nai khai rym nai ne; hunaibaly hini pathyp pi nai keung kalen keh py ati mo talam ai nai aly ngai nai ne.
4 Naibaly Reita kamta atiti pei nai talam pi nai keungchi awm angchi yb nai deaungkho y mymy ly khaileaung pri y awm i khyly den py pathyp pi nai keung lawn ai ny y;
5 nichi ly kani pri mang i atiti ka-tawmchi hawi pa-pui i kalop sa u lawh reng. Ne, Mosi my achura yhm jang ai nai tau thym khala y ly Tameuh my thui pi nai kamta, “Mawi y khen pata ai naira ang patei nai kamta ly cheaungkhang sa ai nai amkym,” napi.Ref 8.5: Theu 25.40
6 Vai naini mymy ly sa nai sai hawi keh nai nga bo; ati mana nai mo nabaly mymy ly leu adeu naira hawi keh naichi salo y sa nai leu maikawm hawi ra hawi ra nai i savai aleaung bo.
7 Huni leu maikawm kangman i nai ly padeng ai naira by y i khyly, pa-nyh i vui y meingtym hau pi y leang bo.
8 Naibaly mymy ly nichi ai padeng nai,Ref 8.8–12: Jer 31.31–34
“Khen cham, neng ly tym ai bo, nanai Areng my napi.
Kai ly Israelachi dengtheung hawi Judachi
dengtheung teng y ly
Leu maikawm kangtha kakhai ai:
9 Mymychi i amsi pajochi ai Aikupta pri i
dengdairei pahawi ai nai
Nichi i kiu y kapatawn nai kani y,
Nichi teng y kai i leu maikawm khai nai kamta ny y;
Ati mana nai mo nabaly nichi ly kai i
leu maikawm y awm u jo y;
Hunaibaly nichi ai ly kadawn hai y bo, Areng my napi.
10 Ati mana nai mo nabaly huni neng bo y ly
Kai ly Israelachi dengtheung teng y leu maikawm khai
nai ly hini ne he, nanai Areng my napi:
Mymychi dawn naira y kai i leu pei naichi kapachei iy
Nichi i paleung y py katajiu teang ai;
Naibaly kai ly nichi i vui y Tameuh kalawn ai i,
Nichi ly kaimy i vui y kai i khumichi lawn ai;
11 Naibaly khumi leaung leaungrei
mymy i saleaungchi hawi
Amymy i amjo amnau teng y,
‘Areng ai pany’ nanai patiu y ai,
Nichi bawibawi ly, theang keh nai i dengdairei
len Keh nai tym pa-rei kai ai pany bawibawi ai:
12 Nichi i taphra naira y kapahen ai,
Naibaly nichi i kamngochi py
tlen py kapany pi jo y leang bo,” ang napi.
13 Hunaibaly mymy ly leu maikawm kangtha, nanai thui nai deaungkho y kangman i nai ly ang tangym hai veng nai bo; na i py tlum ryry nai hawi dawn tami nai atiti ly tama vi nai ne.