7
Pathyp pi nai keung Mekisadeka
1 Hini Melkisadeka, Salem i samrang, Salo Kangteng Tameuh i pathyp pi nai keung my Abraham ly arengchi ai pajau nai vawi nai kha y lamchung i amtheaung hai.Ref 7.1–2: AA 14.17–20
2 Naibaly Abraham ly mymy teng y cheaungkhangra y horei y harei pei. Ni i amyn angchei i awm nai sai ly Hawi naira Samrang ne, huni i ka-tla ly Salem i Samrang ne teang: huni ly Aly nai Areng, nanai sai ne;
3 ni ly ampo py by y, amhm py by y, amsi sangumchi i satang py by y, awm angchei nai kani py by y, hengra tem nai py by y, Tameuh i Chapo kamta sa nai ne lawh veng; mymy ly temma pany y nai pathyp pi nai keung ne.
4 Hunaibaly huni khumi ly mana tanrei tahm asang na mo, nanai dawn u cham. Ti ampreng nai keung Abraham ly mymy i tavai keung i nga nai kahawi ngierei theung i nai ni teng y horei y harei pei nai ly.
5 Levi kangpreangchi theung y pathyp pi nai keung kalop nga nai ngiereichi ly Reita kamta khumi humchi teng i nai horei y harei la ai nai leu nga khypkhyp nai bo; huni ly nichi i amjo amnauchi teng i nai ne, nichi ly Abraham phai bawi i theu nai ne teu iy py.Ref 7.5: Kati 18.21
6 Na i py nichi theung y mymy i kangpreangchi patawm teang y nai keung ly Abraham teng y horei y harei la i, leu adeu nai nga nai keung ai ly amtheaung py amtheaung hai teang.
7 Na i py aei ai nai vuilam ny y nai, kalen kyh nai ly katheang kyh nai ai amtheaung hai nai awm lawh veng.
8 Naibaly hinira y ly khumi dei thai naichi ly horei y harei nga u lawh reng; na i py hunira y ly heng jojo, nanai mymy i satang pany hai nai ly nga nai ne.
9 Naibaly Levi, horei y harei la reng nai keung malawn py Abraham i kiu y ly horei y harei pei bo;
10 ati mana nai mo nabaly Melkisadeka my lamchung nai thym khala y ly mymy ly amsi pajo phai bawi y awm veng rai.
11 Hunaibaly Levichi ly pathyp pi nai keung lawn nai deaungkho y angym naira nga pajau nai ne lawh baly (huni i anui y ly khumi humchi ly Reita nga veng), Aron kamta khai rym nai ny y naimy, Melkisadeka kamta pathyp pi nai keung takhra theu ai nai ati aly awm mo?
12 Pathyp pi nai keung lawn ai naira ly takhra vui khala y Reita ai ly takhra hai vui teang ai nai dawn angchi yb nai ne.
13 Vai mymy i satang thui dudu nai ly cheng takhra i khumi ne lawh veng, huni theung i nai ami py maicham y amsi vai y leang.
14 Achi i Areng ly Juda cheng theung i nai ne, nanai hawihai amteng veng; huni cheng molam y Mosi my pathyp pi nai keung i satang sai py thui y leang.
Melkisadeka atawm nai pathyp pi nai keung
15 Naibaly Melkisadeka kamta pathyp pi nai keung takhra,
16 tlang y leu pei nai reita kamta sa nai ny y i, hengra tem y nai sa thai naira kamta sa lawh nai khumi theu lawh baly, achi i leu thui nai ly khrikhri pa-rei chai nai tleaung y chai ra bo.
17 Ati mana nai mo nabaly mymy i molam ly, “Nang ly Melkisadeka kamta Deungtasarei pathyp pi nai keung ne,” nanai pany hai nai ne.Ref 7.17: Sam 110.4
18 Angchei i leu pei nai ly ham y nai hawi chawn y nai deaungkho y taphra nai ne;
19 (Reita ly ati sai py angym hai y leang:) naibaly athang khai naira hawi kyh nai ai tym hai lawh nai ne, huni i saho y achi ly Tameuh teng y kasa jojo.
20 Naibaly huni ly vaineng abeu y nai deaungkho y ny y leang.
21 Ne mang ly vaineng abeu y naimy nichi ai pathyp pi nai keung y lawn hai: na i py ni i satang thui pi nai keung ly,Ref 7.21: Sam 110.4
“Areng my vaineng abeu iy adawn ali y ai i,
‘Nang ly deungtasarei pathyp pi nai keung ne,’ napi,”
nanai vaineng abeu kheih bo;
22 hina tanrei Isu ly khrikhri pa-rei leu maikawm kahawi keh y khaw hai nai keung lawn bo.
23 Naibaly nichi ly dei naira deaungkho y awm jojo ai nai ngo y lawh nai y, pathyp pi nai keung y lawn naichi ly nawi parai jem;
24 ni naini deungrasarei awm jojo nai deaungkho y akatheung lawh ai nai vuilam ny y nai pathyp pi nai keung lawn naira ly nga lawh veng.
25 Hunaibaly mymychi ai chiu sa pi ai nai mymy ly deungtasarei heng jojo nai deaungkho y mymy i saho y Tameuh teng y jeu naichi ai ly angym pa-rei ang paheng pajau.
26 Hunai kamta pathyp pi nai keung kalen keh, khumi kachai, ka-di ka-de y nai, anyng akau y nai, khumi kamngochi teng i nai awm takhra iy, kani tleaung y salo keh naira y tym hai nai ly achi i vui awm angchi yb nai ne;
27 mymy ly huni pathyp pi nai keung kalen kehchi i sa nai kamta, kani tleirei amy i kamngo nairachi deaungkho y talam manme veng iy, huni bo y ly khumi humchi i kamngo nairachi deaungkho y talam ai nai aly ngai y leang; ati mana nai mo nabaly huni ly amymy ai atalam amang nai thym khala y ly sa bi ai nai aly by y pa-rei tlenrei my sa na veng.Ref 7.27: Lev 9.7
28 Reita ly ham y naira awm nai khumichi ai ly pathyp pi nai keung kalen keh y khai rym lawh veng; na i py Reita bo i vaineng abeu nai leu ly deungtasarei i vui angym hai chum nai Chapo ai khai rym nai ne.