6
1 Hunaibaly hengra abawi y nai atiti sa naira i nai uikhei iy Tameuh mang y ym nai, tui y paju nairachi hawi kiu tamam nai py, kadeichi i angthau bi naira hawi deungtasarei tara chih naira patiu nai lengseaung leng nai ly leng ali y naimy,
2 Krista i satang pakeung sangumchi thui pi ali y i, khumi ka-cheng lawn ai nai atho so u veangveang sina.
3 Naibaly Tameuh my avo hai baly achi ly hunai kamta sa takengkeh ai.
4 Naibaly tlenrei paleung angvang hai nai, kani pri mang i atiti pei nai pateng nai, Phailo Kachai nga hai nai,
5 Tameuh i leu hawi nai hawi, neng tym ai nai atiti sa thai naira pateng chum veng nai hi vui naichi i molam ly,
6 nichi ly Tameuh i Chapo ai ly mymychi i vui y tahen anawi bi nai amthang hai leaung nai ne nai deaungkho y, nichi ai ly uikhei hai palai bi ai nai vuilam ny y leang.
7 Tla reng nai kani tui nei chum nai, hlau pi naichi i vui amti amjang aly ngai nai patheu pi nai khaileaung ly Tameuh teng i amtheaung naira nga reng nai ne;
8 na i py kabeng aleng awm nai hawi preaung deaungchi patheu baly tapeang i, amsawi lawi naira nga vi iy, kangkhym y ly mai leng ai nai tla lawh veng.Ref 6.8: AA 3.17–18
9 Na i py ngai parai naichi awi, kaichi ly hunai kamta leu thui teu iy py, nangchi ly huni tleaung y atiti hawi keh nai, paheng naira y abawi nai atitichi ly sa u ai nai kaichi ly athang kang khai.
10 Nangchi i atiti sa nai hawi mymy i amyn deaungkho y nangchi i tamen naira amteng hai nai, khumi kachaichi ai sabawm nai, ne, vai khrairei sabawm jojo nai ly ang tami pi vui ai nai, Tameuh ly hawi y nai keung ny y leang.
11 Na i py nangchi leaung leaungrei ly tem pa-rei athang khai naira kangym nga thai ai nai, hunai kamta atho sa nai sai amteng hai jojo ai nai kaichi ly khrikhri pa-rei kang ngai hai;
12 hunaibaly nangchi ly atho si y naimy ym naira hawi kham pajau naira deaungkho y leu adeu nairachi amtym chum naichi i amtiu nai keung lawn ai.
Ym ai hawi nai leu ka-deu
13 Tameuh my Abraham teng y leu adeu nai thym khala y ly mymy tleaung y len keh nai angam iy vaineng abeu thai y nai deaungkho y, mymy naimy vaineng abeu iy,
14 “Lawi pajau y pa-rei kaimy amtheaung hai takengkei ai. Peung py kang peung hai takengkei ai,” napi.Ref 6.14: AA 22.16–17
15 Hunaibaly mymy ly pajau tanga pa-rei kham nai bo y leu adeu nai ly nga khyp bo.
16 Khumichi ly nichi tleaung y len keh lawh nai angam iy vaineng abeu lawh reng nai ne; nichi i aei nai cheaungkhangra y py leu khaw hai ai nai vaineng abeu nai ly tem hai lawh reng.
17 Hunaibaly Tameuh my leu adeu nai amtym naichi teng y ly mymy i sa tau nai pipi palai lawh thai y nai sai patei ai ngai nai, vaineng abeu kheng bo.
18 Hunaibaly Tameuh ly ka-chawi thui ai nai vuilam ny y nai, pipi palai lawh thai y naira nyhrei tabom nai deaungkho y, achi, lawi naira hau naichi ly achi i mo y athang khai naira ang khai pi nai ai ly patawn thleng thai ai nai, khri pa-rei khaw hai naira nga thai ai.
19 Achi ly huni athang khai naira ai ly phailo i cheuha kakhaw hawi ka-ym awm nai nga bo; huni ly kanih jang nai theung y khrairei kun nai ne.Ref 6.19: Lev 16.2
20 Hunira y ly Isu ly Melkisadeka kamta deungtasarei pathyp pi nai keung kalen keh y lawn chum iy, achi i vui mo mang y chei man nai keung y kun bo.Ref 6.20: Sam 110.4