2
Rengrang pa-rei atleu nai
1 Hunai deaungkho y achi ly achi i kano y thai naichi ly hawihai palai dawn nai tleaung y dawn ra ai nai tla, ti y baly achi ly ajau vui lawh na.
2 Ati mana nai mo nabaly kani pri i amtaw thau naichi ai teaung nai leu thui nai malawn py khaw baly, naibaly taphra naira hawi leu tangai y naira cheaungkhangchi ai vawitheung tha naira avo parai nai nga jojo baly,
3 achi ly hina tanrei paheng naira aly len parai nai ai dawndan y baly mana tleaung thai rengrang ai mo? Huni paheng nai satang ly angchei khala y Areng ai teaung nai thui veng bo i, thai nai keungchi ly achi ai ang khaw pi;
4 Tameuh my py ka-ma-rachi hawi, atiti rengrangchi hawi, atiti sa thai naira cheaungkhang hawi, mymy i ngai nai kamta Phailo Kachai i atiti paji naichi deaungkho y nichi hawi pany hai bo.
Atleu naira y tym hai nai keung
5 Mymy ly vai momang i khaileaung pri awm ai nai, huni i satang achi i thui nai ly, kani pri i amtaw thau naichi i anui y khai y leang.
6 Na i py ami mo ly mani manira y mo hini leu thui iy,Ref 2.6–8: Sam 8.4–6
“Khumi ly ati mo? Nang ly ni ai ati mana nai
dawn jojo mo?
Nang ly khumi i chapo ai py ati mana nai de jojo mo?
7 Nang ly ni ai ly kani pri i amtaw thau naichi anui y
maidenrei panem;
Nang ly ni ai ly nang parai naira hawi
tahm khai naira y amym hai i,
Nang i kiu y sa naichi tleaung y ni ai lu y khai teang;
8 Nang ly ni i kheu anui y ati cheaungkhang khai,”
nanai pany hai veng bo. Hunaibaly ati cheaungkhang ni i anui y khai nai deaungkho y , ni i anui y khai y nai ly ha py by y. Na i py vai ly achi ly ati cheaungkhang mymy i anui y awm nai ly niu y leang rai.
9 Na i py kani pri i amtaw thau naichi i tleaung y anui y panem nai Isu ai ly Tameuh i pahenra saho y khumi leaung leaungrei i vui y dei naira pateng hai ai nai, dei naira y patang nai deaungkho y nang parai naira hawi tahm khai naira amym hai nai achi my niu lawh veng.
10 Ati mana nai mo nabaly ni i vui y ati cheaungkhang awm nai hawi, ni i saho y ati cheaungkhang awm teang nai keung i vui ly, chanau neangneangchi ai nang parai naira y hawi ai nai, nichi i heng naira sa pi nai keung ai ly patang nairachi deaungkho y angym hai ai nai avo parai.
11 Pachai nai keung hawi mymy i pachai naichi py sangum vanrei ne; hunai deaungkho y mymy ly nichi ai amjo amnau, nanai amyn pathi ai nai kaji hai y i,
12 “Kai i amjo amnauchi teng y nang i amyn kathui pi ai i,Ref 2.12: Sam 22.22
Awm achu naichi theung y ly
khulym kathui iy kang palo ai,” napi.
Naibaly “Mymy ai kaym cheng ai,” napi bi.
13 Naibaly,Ref 2.13: Is 8.17, 18
“Khen cham, kai hawi Tameuh i kai ai
pei nai deaungdichi,” napi taleang bi.
14 Hunaibaly mymy ly dei naira i saho y dei naira ai aly peang nai keung (huni ly Diabola ne), tama hai thai ai nai hawi, dei naira ai jei nai deaungkho y heng nai sala y miseaung y awm nai bawibawichi ai ly lawi hai thai ai nai,
15 huni deaungdichi ly tlang hawi thi nga naichi ne nai deaungkho y mymy py huni kypkyp ly nga teang bo.
16 Ati mana nai mo mo nabaly mymy ly kani pri i amtaw thau naichi ai sabawm nai ny y leang, Abraham i kangpreangchi ai sabawm nai teu.Ref 2.16: Is 41.8–9
17 Hunaibaly mymy ly khumichi i vui y kamngo tama hai naira lawn ai nai, Tameuh mang i atiti ra y ly pathyp pi nai keung kalen keh pahen parai nai hawi ka-ym awm parai nai lawn thai ai nai, cheaungkhangra y mymy i amjo amnauchi kamta awm ai nai ly mymy i vui aeang parai nai angchi yb nai ne.
18 Mymy kypkyp ly parawi naira avum iy patang chum nai deaungkho y, parawi naira avum naichi ai ang sabawm pajau.