HEBRAICHI
TENG Y CHA PA NAI
1
Chapo teng i dengdairei leu pei nai
1 Tameuh my jangni y sangum cheaungkhangra y amsi pajochi teng y amochi ai leu thui hai;
2 na i py hini kangkhym kangtem i neng y ly mymy ly Chapo ai achi teng y leu thui hai bo; mymy ly ni ai ati cheaungkhang amtym ai nai keung y khai rym i, ni i saho y kani khaileaung py sa.
3 Ni ly mymy i nang parai naira kangvang sangso hawi awm nai sai atawm khypkhyp nai ne, naibaly mymy i atiti sa thai nai leu deaungkho y ati cheaungkhang khaw hai; naibaly ni ly kamngo pachai nai bo y salo mang y Tahm Asang Keh Nai i lamtang mang y ateh bo;
Chapo ly len keh nai
4 Ni ly kani pri i amtaw thau naichi tleaung y amyn hawi keh nai amtym nai deaungkho y, nichi tleaung y hawi keh nai lawn bo.
5 Ati mana nai mo nabaly Tameuh ly,Ref 1.5: Sam 2.7; 2 Sam 7.14; 1 Neng 17.13
“Nang ly kai i Chapo ne,
Vaini ly kang lawn hai bo,” napi nai hawi,
Kai ly ni i vui Ampo lawn ai i,
Ni ly kai i vui Chapo lawn ai,” nanai
kani pri i amtaw thau naichi theung y ami teng y thui vai mo?
6 Naibaly mymy ly tapen man nai ai ly khaileaung pri y hawi bi kha y,Ref 1.6: Leu 32.43
“Tameuh i kani pri i amtaw thau naichi bawibawi ly
ni ai chiu u sy,” ang napi.
7 Naibaly mymy ly kani pri i amtaw thau naichi i molam y,Ref 1.7: Sam 104.4
“Ni ly mymy i kani pri i amtaw thau naichi ai ly
ali y lawn hai reng,
Ni i kalop sa nai keungchi ai py
mai kangveaung y lawn hai reng,” ang napi.
8 Na i py Chapo i molam y naini hini thui nai ne;Ref 1.8–9: Sam 45.6–7
“Aw Tameuh, nang i areng atehra ly
deungtasarei awm ai nai ne;
Teng naira areng cheaungvawi py
nang i peang naira i areng cheaungvawi ne.
9 Nang ly hawi naira ai ly ngai i,
hawi y naira ai ly nang ly niu ngai y;
hunai deaungkho y Tameuh, nang i Tameuh ly
nang i ahawichi tleaung y ly nang i tlang tleaung y
amo theu nai rimui khri pa-rei ang thi nai bo he,”
napi.
10 Naibaly “Areng awi,Ref 1.10–12: Sam 102.25–27
nang ly angchei khala y ly khaileaung palum bo,
Kani py nang i kiu y sa nai ne;
11 Hunichi ly tama pawn ai i,
Nang ly awm jojo ai nai ne:
Hunichi bawibawi ly ateaung kamta ly tangym ai i,
12 Nang ly hunichi ai kanih kamta taeang ai,
ateaung kamta khyp pa-rei.
Hunaibaly hunichi ly takhra veng ai bo:
Na i py nang ly huna jojo ai i,
Nang i sanengchi py tem ai ny y,” napi.
13 Na i py mymy ly,Ref 1.13: Sam 110.1
“Nang i paleung ka-echi ai ly
nang i kheu amchym naira kaso y ryrei ly,
Kai i lamtang mang y ateh,” nanai
kani pri i amtaw thau naichi theung y ami i molam y thui vai mo?
14 Nichi bawibawi ai ly kalop sa ai nai phailo, paheng naira amtym ai nai keungchi ai sabawm ai nai pato nai ny y nai sai a?