3
Mosi tleaung y len keh nai Isu Krista
1 Hunaibaly amjo amnau kachai, kani pri mang i palau nai phy nga naichi awi, achi i ym nai leu Amtaw Thau nai Keung hawi, Pathyp pi nai Keung kalen keh Isu ai ly dawn u.
2 Tameuh i dengtheung bawibawichi theung y Mosi my ka-ym awm nai kamta ly, ni ly mymy ai sa nai keung teng y ka-ym awm nai ne.
3 Naibaly dengtheung lu ai ly dengtheungchi tleaung y palo keh lawh nai kamta ly, ni ly Mosi tleaung y nang parai naira nga ra nga ra ai ataing nai khai rym nai bo.
4 Dengtheung tleirei y amimi mo ly lu y awm bawibawi veng; cheaungkhang i lu naini Tameuh ne.
5 Naibaly huni bo y leu thui nai pany hai ai nai ly, Mosi my ly Tameuh i dengtheung bawibawichi theung y kalop sa nai keung ka-ym awm khypkhyp nai bo;
6 na i py Krista ly Tameuh i dengtheungchi i tlang tleaung y Chapo y ka-ym awm nai ne, naibaly achi ly tem khala y khrairei vam naira hawi athang khai naira i amlyh naira khaw parai pa-rei my patawm cheng baly, achi ly mymy i dengtheungchi ne.
Tameuh i khumichi vui awmnem naira
7 Hunaibaly Phailo Kachai i thui nai kamta khyp ly,Ref 3.7–11: Sam 95.7–11
“Vaini ly mymy i raawi tangai u baly,
8 Daichi ka-ym y parawi nai kani y
pangaw hai nai thym khala i kamta ly,
Nangchi i paleung tang hai u moh.
9 Hu y ly nangchi i amsi sangumchi my
kai ai parawi i kai ai cham,
Naibaly nichi ly saneng vui palyhrei sala y
kai i atiti sa naichi niu.
10 Hunaibaly kai ly huni kangpreangchi i
tlang tleaung y paleung angai y,
‘Nichi i paleung y dawn nai tamang jojo,
Kai i lam py pany u y,’ kanapi.
11 Kai i kado theu nai vaineng abeu nai kamta ly,
Nichi ly kaimy i anawn naira y kun y ai,” napi.
12 Amjo amnauchi awi, amkym u , ti y baly Tameuh kangheng ai ly hi vui ai nai nangchi theung y ami py ym y nai paleung kamngo awm lawh na:
13 “Vaini” nanai sala y kani tleirei phai apachei u leungtang, ti y baly nangchi theung y ami py kamngo tapawp naira y paleung tang hai nai awm lawh na;
14 achi my achi i ym amteaung angchei nai ly tem nai khala y khrairei khaw parai pa-rei my patawm cheng baly,
15 achi ly Krista y phy nga nai keungchi ne;Ref 3.15: Sam 95.7–8
Naibaly hini leu ly,
“vaini ly mymy i raawi thai u baly
pangaw hai nai thym khala i kamta ly,
nangchi i paleung tang hai u moh,”
nanai thui reng nai ne.
16 Naibaly thai se iy pangaw hai naichi ly amichi mo? Aikipta pri i dengdairei Mosi my hawi nai bawibawichi ny y lawh a?Ref 3.16–18: Kati 14.1–35
17 Naibaly saneng vui palyhrei sala y paleung angai y nai ly amichi i tlang tleaung y mo? Kamngo sa nai keung daichi ka-vym y dei naichi i tlang tleaung y ny y lawh a?
18 Naibaly leu tangai y naichi harei ny y baly, ni i anawn naira y kun y ai nai vaineng abeu nai ly amichi teng y mo?
19 Hunaibaly nichi ly ym naira by y nai deaungkho y kun thai y bo, nanai achi ly pany bo.