2
Reita taphra nai keung
1 Na i py amjo amnauchi awi,achi i Areng Isu Krista ang jeu ai nai hawi, achi ly mymy teng y achu ai nai molam y ly,Ref 2.1: 1 Thes 4.15–17
2 “Areng i kani ly tym yb veng bo,” napi nai, phailo deaungkho y mo, leu deaungkho y mo, kaichi teng i dengdairei cha pa nai kamta deaungkho y mo nangchi i paleung amchyh praw y ai nai hawi khru py khrukhra y ai nai kaichi kang takeng.
3 Ami py sai py nangchi ai tapawp ai nai pei u moh: atlym naira ly tym man veng iy Reita Taphra Nai, tama nai i chapo ly amteng y baly huni kani ly tym ai ny y.
4 Ni ly Tameuh nanai amyn pathi nai ngierei ai hawi chiu nai amjy bawibawi ai tiu nai, nichi i tlang tleaung y tahm apasang ai; hunaibaly ni ly Tameuh i achura yhm kalen pui y ateh iy Tameuh kamta apalawn ai.Ref 2.4: Dan 11.36; Ezek 28.2
5 Kai ly nangchi teng y kang awm nai thym khala y huni leu ly kang thui pi rengreng, nanai pany u jojo y nai sai a?
6 Ni ly mymy i neng khyp nai khala y amteng thai ai nai ly ati my kam mo, nanai ly vai nangchi ly pany mang.
7 Kangviu y Reita Taphra Nai ly vai py atiti sa dudu nai ne: na i py la vui nai awm y ryrei ly vai ly kam nai keung awm.
8 Huni bo y Reita Taphra Nai Keung ly amteng ai bo, naibaly Areng Isu my ni ai ly mymy i labeaung i taho nai y padei ai, naibaly ang jeu nai hawi amteng nai deaungkho y ni ai tama hai.Ref 2.8: Is 11.4
9 Huni Reita Taphra Nai Keung ang jeu nai ly Setan i sa nai sai kamta atiti sa thai naira cheaungkhang hawi, ka-ma-ra cheaungkhang hawi, ka-chawi rengrang cheaungkhang hawi,Ref 2.9: Mt 24.24
10 tama dudu naichi i vui hawi y nai tapawp nai cheaungkhang hawi jeu ai; ati mana nai mo nabaly nichi ly hengra nga thai ai nai leu meitang tamen naira ai patawm y leang bo.
11 Hunai deaungkho y nichi ly huni ka-chawi leu ym ai nai Tameuh my tamang hai naira nichi teng y tym hai;
12 hunaibaly leu meitang ai ym y iy, hawi y naira y kawn lawh nai bawibawichi ly sum naira nga bebe thai ai.
Atleu naira nga ai nai nangchi ai vawi takhra nai
13 Na i py Areng i ngai parai nai amjo amnauchi awi, Phailo i ang pachai nai hawi leu meitang ai ym iy, pahengra nga ai nai Tameuh my angchei kha i dengdairei nangchi ai ang vawi nai deaungkho y, kaichi ly nangchi i molam y Tameuh teng y kawn nai leu thui jojo nai ne;
14 hunira y ly nangchi ly achi i Areng Isu Krista i nang parai naira nga thai ai nai, mymy ly kaichi i Satang Kahawi thui pi nai y nangchi ai ang palau.
15 Hunaibaly amjo amnauchi awi, khaw pa-rei angdo u ly, leu thui nai deaungkho y mo, kaichi i cha pa nai deaungkho y mo, kaichi kang patiu nai leu taviu nai bawibawi ly patawm u cheng cheng.
16 Hunaibaly achi i Areng Isu Krista kypkyp hawi, Tameuh achi i Ampo, achi ai ang tamen nai keung py pahenra deaungkho y deungtasarei awmnem naira hawi athang khai naira kakhaw ang pei nai keung my ly,
17 nangchi i paleung awm hai nem iy, atiti sa naira y hawi leu thui nai kahawi cheaungkhangra y py khaw hai sy.