THESALONIKA
AVANGCHI TENG Y PAWLA I
CHA PA NAI NYHREI
1
1 Pawla nini Silvana hawi Timothei ly Tameuh achi i Ampo hawi Areng Isu Krista y awm nai Thesalonika avang i palau takhra kamkawm teng y ly:Ref 1.1: Ataw 17.1
2 Ampo Tameuh hawi Areng Isu Krista teng i dengdairei pahenra hawi awmnem naira ly nangchi teng y awm sy.
Krista ang jeu nai neng khala tara chih ai nai
3 Amjo amnauchi awi, kaichi ly nangmychi molam y ly Tameuh teng y kawn nai leu thui jojo ai nai tla:huni ly avo khyp, ati mana nai mo nabaly nangchi i ym naira ly khri pa-rei veang nai, nangchi bawibawi y atamen leungtang naira ly peung nai tleaung y peung ra peung ra lawh veng;
4 hunaibaly nangchi ai ana naira bawibawi y hawi, nangchi i tlang tleaung y ngari patang nai tym naira y ly nangchi i kham tanga nai sai hawi ym nai sai deaungkho y kaichi ly Tameuh i palau takhra kamkawmchi theung y ly nangchi ai kamlyh u reng nai ne.
5 Huni ly nangchi ai Tameuh i peang naira khumi palawn ai ataing thai ai nai, Tameuh i tara chih nai hawi parai nai ka-ma-ra chai pyn nai ne:nangchi ly huni peang naira deaungkho y patang u nai ne he.
6 Tameuh ai pany y nai hawi achi i Areng Isu Krista i Satang Kahawi tangai y naichi i tlang tleaung y tavawi thai ai nai,
7 mymy ly mymy i kani pri i amtaw thau nai ham parai naichi hawi mai kangveaung theung y kani pri mang i dengdairei amteng nai khala y ly,
8 nangchi ai ngari patang hai nai keungchi ai ly ngari patang naira vawitheung tha ai nai hawi, nangchi ngari patang nai keungchi ai ly kaichi hawi anawn naira vawitheung tha ai nai ly Tameuh i mei ka-niu y ly meitang ne.
9 Huni kani y ly mymy i khumi kachaichi y palo naira nga ai nai hawi, ym nai bawibawichi y rengrang tlai napi naira nga ai nai ang jeu nai khala ly (kaichi i pany hai nai leu ym u nai deaungkho y),Ref 1.9: Is 2.10
10 nichi ai ly Areng hawi mymy i nang parai nai atiti sa thai naira i dengdairei deungtasarei tama ai naira khrairei patheu iy, ngari patang ai.
11 Achi i Tameuh my ang palau naira y ly palau ai ataing nai ang sa rym thai ai nai hawi, ym naira y atiti sa nai cheaungkhang mymy i atiti sa thai naira y nangchi ai sa hai thai ai nai, kaichi ly chiu kang sa pi jojo nai he.
12 Hunaibaly achi i Tameuh hawi Areng Isu Krista i pahenra kamta, achi i Areng Isu i amyn ly nangmychi y palo nai awm thai ai i, nangchi py mymy y ly palo nai awm thai ai.