3
Kaichi i vui chiu so pi u
1 Kangkhym i naira y ly amjo amnauchi awi, Areng i leu ly nangmychi theung y awm khyp nai kamta ly peung praw iy, palo naimy awm thai ai nai hawi,
2 kaichi py Tameuh ai dawn y nai hawi kamngo sa nai khumichi teng i nai lawi naira nga thai ai nai, kaichi i vui chiu so pi u kyh:khumi bawibawichi ly ym naira awm bebe nai ny y leang.
3 Na i py Areng ly ka-ym awm mang, mymy ly nangchi ai ang khaw hai iy, kamngo sa reng nai keung khi i nai ang lawi hai ai mang.
4 Naibaly nangchi ly kaichi i leu kang pei nai ngierei ly patawm u reng i, patawm veangveang ai nai py athang kang khai.
5 Naibaly Areng ly nangchi i paleung ai ly Tameuh ai tamen naira mang y hawi, Krista i kham tanga naira mang y pahawi sy.
Khumi luteng kalop sa ai nai tla
6 Naibaly amjo amnauchi awi, kaichi teng i dengdairei leu taviu nai nga nai kamta awm y iy, reita ny y nai kamta awm nai amjo amnau bawibawichi hawi amkawm y ai nai, achi i Areng Isu Krista i amyn y leu kang pei u.
7 Nangmychi kypkyp my kaichi i amtiu ai nai khumichi lawn ai nai tla, nanai nangmychi pany u veng bo; ati mana nai mo nabaly kaichi ly nangchi theung y reita kamta ny y nai kang awm vai y ly;
8 kaichi ly ami i kiu i nai py jawm my kang cho vai y leang; huna ny y naimy nangchi theung y ami ai py myn pho hai y ai nai, kaichi ly vum kanithun khri pa-rei akawm naimy kalop sa reng;
9 kaichi ly pajau y nai deaungkho y ny y leang, nangchi ly kaichi i amtiu naichi lawn ai nai khen pata ai naira sa nai teu.
10 Kaichi ly nangchi theung y awm nai thym khala y py hini leu kang pei ly, “Ami py kalop sa ai nai ngai y baly, cho py cho moh sy,” nanai ly.
11 Nangchi theung y phyreichi ly reita ny y nai kamta awm reng nai satang kaichi ly thai, nichi ly ahi ryry atyhtyh lawh veng i kalop den py so y nai ne.
12 Hunaibaly hunichi ka-tawm ly kalop sa me-myh ai nai hawi, mymychi i biu cha ai nai py Areng Isu Krista y ly leu kang pei nai kang pachei nai ne.
13 Na i py amjo amnauchi awi, atiti kahawi sa ai nai palei u moh.
14 Ami py hini cha pa nai kaichi i leu patawm y baly, mymy kaji thai ai nai huni khumi ai ly den py amkawm u y ai nai ma u kheng.
15 Ne mang ly paleung ka-e kamta naini palawn u moh, amjo amnau kamta parip u.
Kangkhym i leu
16 Naibaly aly nai Areng kypkyp my ly cheaungkhangra y nangchi ai aly naira mana khala y py pei sy. Areng ly nangchi bawibawi teng y awm sy.
17 Kai Pawla ly kaimy i kiu kypkyp my hini kawn nai leu tajiu nai ne he. Hini ly kai i cha pa nai bawibawi y ka-ma-ra ne.
18 Achi i Areng Isu Krista i pahenra ly nangchi bawibawi teng y awm sy.