39
Pathyp pi nai keungchi i vui ateaungchi sa pi nai
(Theu 28:1-14)
1 Meingtym Kachaira kalop sa nai pathyp pi nai keungchi amthyp nai, rym-ah awm apu parai nai ateaungchi ai, nichi ly an kamngau, an kamleng, an kamsen pathym nai beram mui hawi aneng u bo. Areng my Mosi teng y leu pei nai kamta, Aron i vui pathyp pi nai keung ateaungchi sa pi nai ne.
2 Pathyp pi nai keung i vui ephod ly kalang mai ka-syn, an kamngau, an kamleng, an kamsen pathyp nai beram mui, muku jyn hawi aneng.
3 Nichi ly an kamngau, an kamleng, an kamsen pathym nai beram mui, kalang mai ka-synchira y muku phei kamporyp ai, muku vui seih iy aneng nai ne.
4 Ephod ai suichi ai nai paleang asavanra vui nyhrei tai bo.
5 Areng my Mosi teng y leu pei nai kamta, kupe kakawp hawi aneng nai khobai, huni vawnchi hawi aneng iy, ephod hawi patawm mei bo.
6 Nichi ly Kanelian lengseaung vang katengchi kata iy muku kriura y khai chum baly, hunira y Jakob i chapo leaung holai nyhrei amynchi tajiu typ nai ne.
7 Nichi ly Areng my Mosi teng y leu pei nai kamta, Israela cheng holai nyhreichi i jeng y, huni lengseaungchi ai paleang asavanra vui salo y tai nai ne.
Tangtaang adangra sa nai
(Theu 28:15-30)
8 Nichi ly tangtaang adangra ai ephod sa nai ateaungchi hawi sa iy, mawi-en py hunai kamta sa teang.
9 Huni tangtaang adangra ly tlip typ iy, jeng, ka ka-meaung ka ka-rei awm.
10 Nichi ly huni tangtaang adangra tleaung y, vang kateng lengseaung lam palyhrei tai; angchei i lam y amia, topazi lengseaung, karnet lengseaung,
11 pa-nyh i lam y, emarakdim lengseaung, saphire lengseaung, diamond;
12 pa-thom i lam y, huakintho lengseaung, kalkidon lengseaung, amethusto lengseaung;
13 palyh i lam y, birula lengseaung, karnelian lengseaung, jasper lengseaungchi ne; hunichi ai muku kriu theung y khai me bo.
14 Huni vang kateng lengseaung ha hareira y, amyn ha harei tajiu ai nai, lengseaung holai nyhreira Israela cheng holai nyhreichi jeng y, Jakob i chapo leaung holai nyhreichi i amyn tajiu typ nai ne.
15 Nichi ly tangtaang i vui muku leangchi sa.
16 Muku kriu nyhrei hawi muku sengtleng nyhrei sa iy, muku sengtleng nyhrei ai ly tangtaang adangra tleng mang i, taki nyhreira tai u bo.
17 Muku leang nyhrei ai tangtaang takira i sengtlengra tai iy,
18 takhra tawm katem nyhrei ly muku kriu nyhrei hawi sui mei bo. Hunai kamta muku leng ly ephod i paleang asavan nai vuichi i mo y tai nai ne.
19 Nichi ly muku sengtleng nyhrei sa bi iy ephod hawi abiri nai, tangtaang adangra anui mang i taki nyhreira, theung mang y tai bo.
20 Nichi ly muku sengtleng nyhrei sa bi iy apu parai nai tangtaang adangra i leng, ephod i paleang asavan nai vui nyhrei mo i anui kyh y tai bo.
21 Areng my Mosi teng y leu pei nai kamta, tangtaangra i sengtlengchi ai, ephodra i vui kamngau hawi suichi nai deaungkho y, tangtaang adangra ly ahaw kathiu y naimy tangtaang adangra salo y khaw typ jo nai ne.
Pathyp pi nai keungchi i vui takhra ateaungchi sa pi nai
(Theu 28:31-43)
22 Nichi ly ephod anui y amchiu ai nai baichu kangjiu ly an kamngau pathym nai beram mui hawi sa u bo.
23 Huni baichu kangjiu i lu apaenra ly teng aphrai y ai nai, kanih ngan hawi mawm typ nai ne.
24-26 Areng my Mosi teng y leu pei nai kamta, huni baichu kangjiu anui mang tawm kamkira y, an kamngau, an kamleng, an kamsen pathym nai beram mui, thaisi athai mynchi hawi muku syhryhchi pakhe iy tai u.
27 Nichi ly Aron hawi ni i chapochi i vui theung i baichu kangjiu,
28 lupeu, lukhym, kanih mai ka-syn phangphi,
29 an kamngau, an kamleng, an kamsen pathym nai beram mui hawi mawi-en thun nai khobai kanemchi ai Areng my Mosi teng y, leu pei nai kamta sa u bo.
30 Nichi ly “Areng i vui aau patyp bo,” nanai tajiu typ nai muku hawi sa nai lu athangra sa u bo.
31 Areng my Mosi teng y leu pei nai kamta, huni lu athangra lupeu tleaung y vui kamngau kalang hawi thangchi nai ne.
Kalop sa pajau nai
(Theu 35:10-19)
32 Areng i awmra Tabynako molam sa nai kalop bawibawichi pajau angym be bo; Areng my Mosi teng y leu pei nai ngierei Israela chengchi ly sa u nai ne.
33 Nichi ly Tabynako hawi huni i ateaung alangchi, leangkhawnchi, apang dawnchi, leangteaungchi, chenghengchi hawi anuirachi py,
34 an kamsen pathym nai beram katai peih tabiura, mawi peih kanem kanih ali hang nai tabiura py,
35 lengseaung phei nyhrei khai nai Leu Maikawm Pawm, angjeaungra samtleangchi hawi Pawm khym py,
36 sabawi hawi huni i ateaung alangchi, Tameuh teng y talam nai tako py,
37 muku maisi yhm kateang hawi maisi yhmchi, huni i ateaung alangchi hawi maisi hang py,
38 muku maicham, tahm palyn nai asitui, rimui mui katui hawi Tabynako katheu pa-kho i vui kanih ali hang nai py,
39 kheupaja maicham, kheupaja rumryh, angjeaungra samtleang, maicham i ateaung alangchi py, muku rahum hawi panuira kheu py,
40 Tabynako apai i vui kanih alichi, chenghengchi hawi panuirachi, Tabynako katheu pa-kho i vui kanih ali hang nai hawi vuinawnchi, Tabynako khangmuichi py, Areng i awmra Tabynako angtheung mang i ateaung ngiereichi py,
41 meingtym kachaira apathyp nai khala, pathyp pi nai keungchi amthyp ai nai rym-ah awm apu parai nai ateaungchi, pathyp pi nai keung Aron hawi ni i chapochi ateaung ai nai ateaung kachaichi py Mosi teng y tym hai u bo.
42 Israela chengchi ly Areng my Mosi teng y leu pei nai ngiereichi sa u angym be bo.
43 Mosi ly nichi i sa chum nai ngiereichi ai hawihai palai khen i, Areng my leu pei nai kamta nichi i sa u be nai ly niu nai deaungkho y Mosi my nichi ai amtheaung hai bo.