38
Leng patlum naira maicham sa nai
(Theu 27:1-8)
1 Ni ly leng patlum nai maicham ai akasia dengkeaung ngan hawi sa; huni maicham ly jeng miu pangrei, ka miu pangrei, ka-sang ly miu thomrei awm.
2 Taki palyhreira i kachawn kamsuichi ly maicham hawi sa patawm prei nai ne. Maicham verei y kheupaja hawi mawm typ bo.
3 Ni ly maicham i ateaung alangchi ly maidym hawi thau kadeng nai laawm pangdai, khaileaung chawn, sora, leangkhawn hawi mai-ai kadeng nai laawmchi ai kheupaja hawi sa bawibawi nai ne.
4 Kheupaja rumryh ly maicham ka-sang laileaungrei y tai bo.
5 Kheupaja rumryh taki palyhreira y samtleang thawi ai nai sengtleng palyhrei sa.
6 Ni ly samtleang nyhrei ai akasia dengkeaung ngan hawi sa iy, kheupaja hawi mawm typ bo.
7 Samtleang ai ly maicham makeng nyhreira i sengtlengchira thawi yb bo. Maicham palauhau ai nai dengkeaung dawn hawi sa nai ne.
Kheupaja rahum sa nai
(Theu 30:18)
8 Ni ly Areng i awmra Tabynako katheu pa-khora y kalop tla nai neampachychi i, kheupaja khangpuichi hawi kheupaja rahum hawi panuira sa bo. Ref 38:8 Theu 30:18
Areng i awmra Tabynako apai
(Theu 27:9-19)
9 Ni ly Areng i awmra Tabynako tapang ai nai kanih alichi ai kalang mai ka-syn hawi sa; tokalawi ngan mang y tapang ai nai kanih ali hang nai ly miu chungvairei awm.
10 Kanih ali vawn ai nai chengheng apomrei hawi panuira apomrei ai kheupaja hawi py, leangkhawn hawi katlangchi ai tangka hawi py sa nai ne.
11 Tosyh ngan mang i kanih alichi py, tokalawi ngan mang i kamta sa teang.
12 Nidym ngan mang i jang ai nai kanih ali hang nai ly jeng miu vui pangrei awm iy, chengheng horei, panuira horei, leangkhawn hawi katlangchi ai tangka hawi sa bo.
13 Katheu pa-kho awm nai Tabynako nisi ngan mang apai py, miu vui pangrei awm teang bo.
14-15 Tabynako mang mang makengrei y, ka miu holai pangrei awm nai kanih ali hang nai hawi, chengheng thomrei, panuira thomrei awm bawibawi.
16 Tabynako apai ka-ki verei jang ai nai kanih alichi ly kanih mai ka-syn hawi sa nai ne.
17 Chengheng panuirachi ai kheupaja hawi sa iy, chengheng leangkhawnchi, katlangchi hawi chengheng meaung mymrachi ai tangka hawi sa; apai chengheng bawibawichi ai tangka katlangchi hawi patawm prei nai ne.
18 Tabynako apai katheu pa-kho i vui kanih ali hang nai ai ly an kamngau, an kamleng, an kamsen pathym nai beram mui, kalang mai ka-synchi hawi aneng iy mawi-en ka-pu thun bo. Tabynako apai kanih alichi kamta katheu pa-kho kanih ali hang nai ly jeng miu apomrei hawi, ka-sang miu pangrei ne.
19 Huni kani ali ai ly kheupaja panuira palyhreira y panui nai chengheng palyhreira y vawn typ nai ne. Huni i leangkhawnchi, chengheng mawm mymrachi hawi chenghengchi ai tangka hawi sa bo.
20 Tabynako hawi apai i vui khangmui bawibawichi ai kheupaja hawi sa nai ne.
Areng i awmra Tabynako y teaung nai tamo nganchi
21 Leu sai horei tajiu typ nai lengseaung phei nyhrei reumera Areng i Tabynako i vui teaung nai tamo ngan amynchi ly pathyp pi nai keung Aron i chapo Ithama my lu sa iy, Levi theaungchi my Mosi i leu pei nai kamta tajiu bo.
22 Juda theung Hura i katu, Uri i chapo Bezalela ly Areng my Mosi teng y leu pei nai ngierei sa nai ne.
23 Ni ai sabawm nai keung Dan cheng theung i Ahisama i chapo Aholiaba ly mawi o-pangen nai kupe kakawp, ka-tawm myn sa kawp nai keung, an kamngau, an kamleng, an kamsen pathym nai beram mui, kanih mai ka-synchi aneng kawp nai khumi ne.
24 Tabynako i vui khumichi ly Areng teng talam nai muku kaji bawibawi ly sie 2,508 rei awm.
25 Khumi amyn la achu nai khala, Israela chengchi teng i nga nai tangka kaji ly sie 8,628 awm nai ne.Ref 38:25-26 Theu 30:11-16
26 Huni tangka kaji ly khumi amyn la nai khala kup naichi i pei achu nai tangkachi ne. Saneng apomrei hawi saneng apomrei leng neampacho vuikanai ly 603,550 rei awm nai ne.Ref 38:26 Mt 17:24
27 Panuira harei y tangka kaji sie 83 rei awm riri iy, Tabynako hawi kanih ali jang nai chengheng panuira i vui teaung nai tangka kaji ly sie 8,571 rei awm.
28 Huni bo y palai rai nai tangka kaji 57 rei nai ly Bezalela my leangkhawnchi, chengheng meaung mymrachi hawi katlangchira teaung bo.
29 Areng teng y talam nai kheupaja kaji ly sie 6,068 rei awm .
30 Areng i awmra Tabynako katheu pa-kho i vui panuirachi, kheupaja maicham, kheupaja rumryh, maicham i ateaung alang bawibawichi,
31 Tabynako apai hawi katheu pa-kho i vui panuirachi, Tabynako hawi apai ka-ki khangmui ngiereichi ai, huni kheupaja hawi sa nai ne.