37
Leu Maikawm Pawm sa nai
(Theu 25:10-22)
1 Bezalela my ly akasia dengkeaung ngan hawi jeng miu nyh pa-thom ka-rei, ka miurei bo ka-rei, ka-sang ly miurei bo ka-rei awm nai Leu Maikawm Pawm sa bo.
2 Leu Maikawm Pawm theung mang hawi angam mang ly muku an paleaung iy, teng taki ly muku hawi mawm hai typ nai ne.
3 Pawm angjeaungra muku sengtleng palyhrei sa iy, kheutang taki palyhreira y muku sengtleng ha harei tai bo.
4 Angjeaungra samtleang ai ly Akasia dengkeaung ngan hawi sa iy, muku paleaung bo.
5 Leu Maikawm Pawm angjeaung ai nai samtleang nyhrei ai ly Pawmra i mang mang makeng nyhreira tai nai sengtlengchira thawi yb nai ne.
6 Pawm khym ai nai muku tangcheng hawi jeng miu nyh pa-thom ka-rei, ka miurei bo ka-rei awm nai khym sa bo.
7 Pawm khym i kachawn nyhreira y, muku tangcheng hawi kheruben myn nyhrei sa.
8 Kheruben myn ai py Pawm khym hawi sa tabi ryp nai ne.
9 Kheruben nyhrei ly mo atha leungtang iy, nini i pakhi kadai nai ly Pawm y deung meuh bo.
Tameuh teng y talam nai tako sabawi sa nai
(Theu 25:23-30)
10 Ni ly jeng miu nyhrei, ka miurei, ka-sang ly miurei bo ka-rei awm nai sabawi ai akasia dengkeaung ngan hawi sa bo.
11 Huni sabawi ai muku paleaung iy teng ka-ki ly muku hawi mawm hai typ bo.
12 Sabawi takira peurei kambai awm nai mawmra sa iy, muku hawi mawm typ bo.
13 Sabawi angjeaung ai nai taki palyhrei i kheuchira y, muku sengtleng palyhrei tai nai ne.
14 Huni sengtleng palyhreichi ai ly mawmra sahawi y abiri iy tai bo.
15 Angjeaungra samtleang nyhrei ai akasia dengkeaung ngan hawi sa iy muku paleaung bo.
16 Sabawi ateaung samtang, sora, tuidym hawi kreip hang talam ai nai khauchi ly muku hawi sa nai ne.
Maisi yhm kateang sa nai
(Theu 25:31-40)
17 Ni ly maisi yhm kateang ai muku tangcheng hawi sa; maisi yhm panuira hawi kateang ai py, muku hawi sa nai ne. Huni maisi yhm kateangra y kaseaung paumyn, pau kangdai napi nai pau ka-puchi ly maisi yhm kateangra y sa tabi ryp bo.
18 Maisi yhm phei pheirei mang y kateangchy thomrei, bawibawi tariurei sa.
19 Kateangchy tariureira i ha hareira y, kaseaung paumyn, pau kangdaichi abawi nai baden pau hawi atawm nai, ka-pu kaseaung pau thomrei awm.
20 Maisi yhm kateang meaungra y paumyn, pau kangdaichi baden pau hawi atawm nai, ka-pu sa nai kaseaung pau palyhrei py awm.
21 Kateang thomrei sala y kaseaung paumyn ha harei py awm.
22 Kaseaung paumyn sengreang hawi maisi yhm kateangchi ly tabi mei iy, muku hawi sa nai ne.
23 Ni ly maisi yhm kateang i vui maisi yhm saryhrei, tangkeih hawi maidym khauchi ai muku hawi sa.
24 Ni ly huni maisi yhm kateang hawi, huni i vui ateaung ngiereichi ai muku tangcheng sie horei hawi sa nai ne.
Rimui patawira maicham sa nai
(Theu 30:1-5)
25 Ni ly rimui mui katui patawi ai nai akasia dengkeaung ngan hawi maicham sa; huni maicham ly jeng miurei, ka miurei, ka-sang ly miu nyhrei awm; maicham kachawn taki kamsuichi ly maicham hawi amtawn prei nai ne.
26 Maicham kangbai, teng kamki, kachawn taki kamsuichi ai py muku paleaung iy, maicham teng ka-ki muku tangcheng hawi mawm bo.
27 Huni maicham i makeng nyhreira y sengtleng nyhrei thawi ai nai, muku sengtleng nyh nyhrei tai.
28 Samtleang nyhrei ai akasia dengkeaung ngan hawi sa iy, muku an paleaung hai typ bo.
Tahm palyn nai asitui hawi rimui mui katui sa nai
(Theu 30:22-38)
29 Ni ly tahm palyn nai asitui kachai hawi rimui mui katui tangcheng sa nai ne. Ref 37:29 Theu 30:22-38*