36
1 “Bezalela hawi Aholiaba nini py Tabynako sa ai nai, Areng teng i kupe kakawp hawi, ka-vo dawn pany kawp nai takhra kupe kakawp bawibawichi py, Areng i leu pei nai kamta khyp sa u ai nai tla,” napi.
Khumi mipuichi i talam naichi syn nai
2 Mosi ly Bezalela hawi Aholiaba nini ai py, Tabynako sa ai nai Areng teng i kupe kakawp nga nai khumichi hawi, sabawm ai nai paleung ka-no awm nai bawibawichi ai py palau iy, kalop amteaung hai bo.
3 Nichi ly Tabynako sa ai nai Israela chengchi my syn nai katalamra vawnsai ngiereichi Mosi teng i nai nga u bo. Khawn tleirei Israela chengchi ly mymychi i katalamra vawnsaichi Mosi teng y syn pi jojo nai ne.
4 Huna nai khala Tabynako sa nai kupe kakawpchi ly Mosi teng y chei iy,
5 “Khumi mipuichi my syn nai vawnsaichi ly Areng my sa hai nai kalop i vui, ngai nai tleaung y palai na bo,” napi u.
6 Naibaly Mosi my, “Ami py Tabynako sa ai nai i vui y talam ai nai vawnchi talam u bi moh jau,” nanai leu pei iy, taira i khumi bawibawichi teng y satang thai hai. Hunaibaly khumichi ly katalamra vawnsaichi syn u y leang bo.
7 Talam nai vawnsaichi ly kalop sa ai nai aleu nai bo y, palai pangpo na veng bo.
Areng i awmra Tabynako sa nai
(Theu 26:1-37)
8 Kupe kakawpchi theung i kawp katlen nai keungchi ly Areng i awmra Tabynako sa u bo. Nichi ly kanih mai ka-syn hawi an kamngau, an kamleng, an kamsen pathym nai beram mui hawi aneng iy pakhi awm nai kheruben mynchi thun nai kanih ali hang nai horei hawi Tabynako sa u nai ne.
9 Kanih ali bawibawi ly ahyh riri iy, ha harei ly jeung miu apom phai tajarei, ka miu palyhrei awm bawibawi.
10 Nichi ly kanih ali hang nai pangrei y dawnrei hui tabi i, takhra ali pangrei ai py, hunai kamta hui tabi teang.
11 Kanih dawnrei i tawm katemra y kanih ngan kamngau hawi tai u bo.
12 Angchei i kanih dawn tawm katemra y tlapaha vui pangrei, pa-nyh i kanih dawn tawm katemra y tlapaha vui pangrei py, ka-tlyh khyp tai teang nai ne.
13 Nichi ly muku leangkhawn vui pangrei sa iy, huni leangkhawnchi hawi kanih dawn nyhrei ai kanih jeungrei palawn hai bo.
14 Naibaly nichi ly Tabynako tabiu ai nai mi-i mui hawi aneng nai kanih ali hang nai holai harei hui tabi u bo.
15 Kanih ali holai harei ly jeng, ka ahyh bawi i, ali ha harei i jeng ly miu phairei, ka miu palyhrei awm bawibawi.
16 Nichi ly kanih ali hang nai pangrei ai jeungrei hui tabi iy, takhra ali tariurei ai jeungrei hui tabi nai ne.
17 Angchei i kanih jeung tawm katemra y tlapaha vui pangrei, takhra kanih jeung tawm katemra y tlapaha vui pangrei py tai u bo.
18 Nichi ly Tabynako tabiu ai nai kheupaja leangkhawn vui pangrei sa iy, teng nyhrei hui tabi i, tabiura harei lawm bo.
19 Huni bo y amphura sambeu sa u bi; harei nai ai ly an kamsen pathym nai beram katai peih hawi py, huni salo y tabiu bi ai nai mawi peih kanem sa u nai ne.
20 Nichi ly Tabynako theung mang i angpangchi ai akasia dengkeaung ngan hawi sa u bo.
21 Angpang ha harei ly jeng miu horei, ka ly miurei bo ka-rei awm i,
22 Tabynako i vui angpang bawibawi ly pakaura sa iy tabi bo. Tabynako i angpang ngierei ly pakaura sa nai ne.
23 Tokalawi ngan mang y tapang ai nai angpang dawn apomrei sa iy,
24 Angpang dawn ha harei i kheutang y panuira nyhrei pacho ai nai tangka panuira vui palyhrei sa bo.
25 Hunai kamta Tabynako i tosyh ngan mang tapang ai nai angpang dawn apomrei sa iy,
26 angpang dawn ha harei i kheutang y tangka panuira vui palyhrei sa bo.
27 Nidym ngan mang i Tabynako nithun mang tapang ai nai angpang dawn tariurei ai py,
28 nidym ngan taki nyhrei pakau ai nai angpang dawn nyhrei py sa bo.
29 Huni angpangchi ai kheutang y py, salo mang py, sengtlengchi hawi tabi typ bo; huni bo i taki nyhrei py, hunai kamta sa teang nai ne.
30 Hunai deaungkho y angpang dawnrei i kheutang y tangka panuira nyhrei awm i, angpang dawn tajarei hawi tangka panuira holai tariurei awm nai ne.
31 Nichi ly Tabynako theung mang i angpang dawnchi i vui atleangrachi ai akasia dengkeaung ngan hawi sa u. Tabynako tokalawi ngan mang i vui atleangra pangrei,
32 tosyh ngan mang i vui atleangra pangrei hawi, nidym ngan mang i vui atleangra pangrei sa u bo.
33 Umtang i angpang laileaung atleangra ly Tabynako taki nyhrei y tem hai bo.
34 Angpangchi ai muku paleaung iy atleangrachi khaw ai nai muku sengtlengchi tai bo; atleangrachi ai py muku paleaung nai ne.
35 Nichi ly kanih ali hang nai ai an kamngau, an kamleng, an kamsen pathym nai beram mui, kalang mai ka-synchi hawi aneng iy kheruben mynchi thun nai ne.
36 Kanih ali khaw typ ai nai muku leangkhawn tai nai chengheng palyhrei ai ly Akasia dengkeaung ngan hawi sa u bo. Chenghengchi pado ai nai kheutang y tangka panuira palyhrei sa u nai ne.
37 Tabynako katheu pa-kho i vui kanih ali hang nai ai an kamngau, an kamleng, an kamsen pathym nai beram mui, kalang mai ka-synchi hawi aneng iy, mawi-en thun nai ne.
38 Huni kanih ali hang nai i vui chengheng pangrei sa iy, leangkhawnchi tai i, chengheng meaung hawi, chengheng kheutang ai muku paleaung bo; chengheng panuira kheu pangrei ai kheupaja hawi sa nai ne.