35
Anawn kani i vui reitachi
1 Mosi ly Israela cheng bawibawichi ai palau achu iy nichi teng y, “Areng my nangchi teaung ai nai, hina nai reita leu ang pei nai ne:
2 Nangchi ly kani saryhrei sala y kani tariurei kalop sa pajau; na i py saryh kani ly Kai, Areng i vui khai takhra nai, ja patyp nai kani ne ai nai tla. Huni kani y kalop sa nai khumi ai ly padei ai nai tla. Ref 35:2 Theu 20:8-11; 23:12; 31:15; 34:21; Lev 23:3; Leu 5:12-14*
3 Anawn kani y ly nangchi i yhm y mai malawn py liu ai nai tlo y,” napi..
Tabynako i vui y atiti talam naichi
(Theu 25:1-9)
4 Hunaibaly Mosi ly Israela cheng bawibawichi teng y, “Nangchi teng y Areng my hina nai leu ang pei bo:
5 Nangchi ly Areng teng y atitichi talam ai nai tla. Amimi py, talam ai ngai baly muku, tangka, kheupaja;
6 kanih mai ka-syn, an kamngau, an kamleng hawi beram mui kamsen, mi-i mui kanih,
7 an kamsen pathym nai beram kataichi i peih, mawi peih kanem, akasia dengkeaung ngan,
8 maisi hang, tahm palyn nai asitui, rimui muikatui hawi mui katui i vui rimui;
9 Pathyp pi nai keung kalen keh i ephod hawi tangtaang adangra ateaungchira y tai nai kanelian lengseaung hawi, takhra vang kateng lengseaungchi syn ai nai tla,” napi.
Areng i awmra Tabynako i vui ateaungchi
(Theu 39:32-43)
10 Nangchi theung i kupe kakawp bawibawichi ly Areng i leu pei nai kamta jeu u ly sa u ai nai tla.
11 Tabynako hawi amphu sambeu, huni i leangkhawnchi, teng mawm naichi, lengteaungchi, chenghengchi hawi kheutang panuirachi;
12 Leu Maikawm Pawm hawi ajeaungra samtleangchi, Leu Maikawm Pawm khym, Leu Maikawm Pawm y tapang nai kanih alichi;
13 sabawi hawi angjeaungra samtleangchi, sabawi i ateaung alangchi, Tameuh teng y talam ai nai tako;
14 maisi yhm hawi maisi yhm ateaung alangchi, maisi yhmchi hawi maisi hang;
15 rimui patawi ai nai maicham hawi samtleangchi, tahm palyn nai asitui, rimui mui katui, Tabynako katheu pa-kho y jang nai kanih ali hang nai;
16 lengpatlum ai nai maicham hawi kheupaja rumryh, angjeaungra samtleang hawi, huni i ateaung alang bawibawichi, kheupaja rahum hawi panuira kheu;
17 Tabynako apai y jang nai kanih alichi hawi apai chenghengchi, panuirachi, kunra pa-kho y jang ai nai kanih ali hang nai;
18 Tabynako i vui khangmuichi, Tabynako apai vuinawnchi;
19 pathyp pi nai keung Aron hawi ni i meingtym kachaira y kalop sa nai khala amthyp ai nai rym-ah awm nai ateaung alangchi, hunichi i vui sa pi ai nai tla,” napi.
Khumi mipuichi i syn nai katalamchi
20 Israela cheng bawibawichi ly Mosi teng i nai theu u bo.
21 Areng teng y atiti talam ai ngai nai khumi ngiereichi ly Areng i awmra Tabynako i vui talam ai nai talam ai nairachi syn u bo. Nichi ly Areng ai chiu naira y aly ngai nai atitichi, pathyp pi nai keungchi i ateaung alangchi sa ai nai vawnsaichi syn u nai ne.
22 Talam ai paleung ano nai neampacho neampachychi ly muku ka-ma-ra atai nai, muku kano, muku kiu sabyh hawi muku leangchi talam patyp ai nai Areng teng u iy,
23 an kamngau, an kamleng, an kamsen pathym nai beram mui, kanih mai ka-syn, mi-i mui kanih, an kamsen pathym nai beram katai peih, mawi peih kanem, hunichi awm nai khumi bawibawichi ly huni atitichi syn u ai nai tla.
24 Tangka, ti y baly kheupaja ngan talam pajau naichi py, Areng teng y talam u; naibaly Akasia dengkeaung ngan awm naichi ly atitichi sa naira y hunichi talam u nai ne.
25 Kalang kyn kawp parai nai neampachy bawibawichi ly beram mui kalang an kamngau, an kamleng;
26 an kamsen hawi kanih mai ka-syn kalang, mi-i mui kalangchi talam u bo.
27 Israela cheng lu sa naichi ly pathyp pi nai keungchi i ateaungchi napi nai, ephod hawi tangtaang adangra y tai ai nai kanelian lengseaung hawi takhra vang kateng lengseaungchi py,
28 Maisi hangchi, tahm palyn nai asituichi, rimui mui katuichi py talam ai nai tla.
29 Mosi teng y Areng my leu pei nai kamta Israela neampacho neampachy bawibawichi ly paleung ngai parai naimy, mymychi i atiti katalamrachi Areng teng y talam u bo.
Areng i awmra Tabynako sa nai kupe kakawpchi
(Theu 31:1-11)
30 Mosi my Israela chengchi teng y, “Areng ly Juda cheng theaung theung i Hura i katu, Uri i chapo Bezalela ai vawi takhra bo.
31-32 Ni ly Tameuh teng i sa thai naira nga nai deaungkho y, muku, tangka, kheupaja nganchi hawi mawi-en amjyjy kupe kakawp,
33 vang kateng lengseaung kata iy ka-pu sa kawp nai, dengkeaung ngan o-pangen kawp nai, napi nai kupe kakawp cheaungkhang sa kawp ai nai py pei bo.
34 Areng ly ni ai py, Dan theaung theung i Ahisama i chapo Aholiaba ai py, myni i kawp naira ai amichi teng y patiu pateang thai ai nai cheng naira pei pi bo.
35 Nini teng y mawi-en o-pangen kawp nai, kupe kakawp, an kamngau, an kamleng hawi an kamsen amthym nai beram mui, kanih mai ka-syn hawi takhra kanihchi aneng kawp nai cheng nairachi pei pi bo. Nini ly kupe amjymjyra y kawp parai tlai i, mawi-en sa naira y kawp katlen hawi nai ne.