34
Pa-nyh lengseaung phei nyhrei
(Leu 10:1-5)
1 Areng ly Mosi teng y, “Angchei i lengseaung phei nyhrei hawi atawm nai lengseaung phei nyhrei so teang; nangmy kawi hai vui nai, angchei i lengseaung phei nyhrei tleaung y tajiu nai leu saichi kamta, kaimy hini lengseaung phei nyhreira tajiu pi teang ai.
2 Kai hawi avum ai nai khawndam khawn ly Sinai mawi salo y lyn kalau.
3 Nangmy tlairei lyn khyh; mawi y nang hawi vanrei ami py lyn mo sy; mawi verei y khumi awm moh sy; mawi kheutang y py, beram, si teicha patlai mo sy,” napi.
4 Hunaibaly Mosi ly Areng i Leu pei nai kamta, lengseaung phei nyhrei sa i, kani pa-nyh khawn angthodyh Sinai mawi salo lyn jo bo.
5 Areng ly tamai angjawi mang dengdairei satla kathiu i, Mosi sahawi y angdo iy, Areng mymy i amyn nang parai nai sai amteng hai bo.
6 Naibaly Areng ly Mosi teng y chei tapai iy, “Kai, Areng ly pahen naira angym nai Tameuh, neaung hawi iy tamen naira nang parai nai Tameuh, ka-ym awm nai Tameuh ne.Ref 34:6-7 Theu 20:5-6; Kati 14:18; Leu 5:4-10; 7:9-10*
7 Kai ly sang neangneang nawi parai nai cheng kangpreangchi teng y, kai i adeu nai leu meitang khaw hai ai; kai ly sa tamang nai hawi kamngo molam nichi i kamngo pahen pi ai. Na i py amhm ampochi i kamngo ai ly katu chanauchi i tlang tleaung y deung thom deung palyh tym pa-rei kapajeng ai,” napi.
8 Mosi ly tlenrei khyhmy khaileaung y ambeu i chiu iy,
9 “Aw Areng, nang ly kai ai paleung no baly, kaichi hawi vanrei chei ai nai kang takeng. Hini khumichi ly paleung tang nai cheng ne; na i py kaichi i sa tamang nai hawi kamngo naichi pahen pi kyh ly kaichi ai nang i khumichi ne, nanai palawn teang kyh ba,” napi.
Leu Maikawm sa palai nai
(Theu 23:14-19; Leu 7:1-5, 16:1-17)
10 Areng my Mosi teng y, “Kai ly vai, Israela chengchi hawi Leu Maikawm asa ai. Khaileaung pri cheng takhrachi theung y py so vai y nai, nichi i mei ka-niu y atiti len parai tlai naichi sa pi ai. Kai, Areng leaungrei naini sa thai naira len parai naichi sa pajau khyh, nanai khumi bawibawichi my niu u ai; ati mana nai mo na baly nangchi i vui Kai, Areng my ka-jei hawi parai nai rengrang tlai naichi kang sa pi ai nai ne.
11 Vaini nang teng y kaimy kang pei nai reita leuchi tangai. Nangchi tako nai lam i Amori cheng, Kanan cheng, Hiti cheng, Perizi cheng, Hivit cheng, Jebusi chengchi ai kaimy paryh pi pawn ai i, tlamsa ra nga u ai.
12 Nangchi my tiu ai nai pri i khumichi hawi, nai aso y ai nai amkyn u; nai asa lawh baly, nangchi ly nichi i deaung y man u ai.
13 Nangchi ly nichi i maichamchi panawi pawn ai nai tla; nichi i tameuh leungchengchi taphra ai nai tla; nichi i tameuh nu Aser i mynchi py, paliu pawn ai nai tla. Ref 34:13 Leu 16:21*
14 Kai, Areng ly ka-awi sa nai keung ai niu ngai y nai deaungkho y, nangchi ly tameuh takhra ai chiu ai nai tlo y.
15 Nangchi ly huni pri i khumichi hawi nai aso moh; ati mana nai mo na baly nichi ly mychi i tameuhchi teng y apathyp nai khala, nangchi ai ang heang ai i, nichi i tameuhchi teng y apathyp nai mawi biu cha u lawh ai nai deaungkho y ne.
16 Nangchi i chapochi ly huni pri i neampachychi ai pom u lawh baly, huni neampachychi ly kai ai ym y iy, nichi i tameuhchi ai chiu ai ym ai nai, nangchi i chapochi ai parawi ai.
17 “Tamo ngan hawi tameuh mynchi sa iy chiu u moh,” napi.Ref 34:17 Theu 20:4 Lev 19:4; Leu 5:8; 27:15*
18 “Tako angbo abawi y nai Pawi sa ai nai tla. Nangchi ly Abiba lo y Aikupta pri i dengdairei theu u nai deaungkho y, huni lo y kai i reita leu pei nai kamta, kani saryhrei angbo abawi y nai tako cha u ai nai tla. Ref 34:18 Theu 12:14-20, Lev 23:6-8, Kati 28:16-25*
19 Chapo chalu, tawnbawi cho chalu ly kai i vui ne. Ref 34:19 Theu 13:2*
20 Na i py keaungngo kano kasau cho chalu ne lawh baly, beramcho harei hawi atleu ai nai tla. Atleu ai nai ngai y lawh baly, keaungngo kano kasau i kaneaung khei ai nai tla. Nangchi i chapo chalu ngiereichi ai ly atleu ai nai tla.
Amimi py katalamra syn y naimy, kai teng y jeu u moh sy.Ref 34:20 Theu 13:13*
21 Nangchi ly kani tariurei sala y kalop so u ly saryh kani y ly anawn ai nai tla; li thawn nai neng hawi hlau i amti amjang pakym nai neng khala py, anawn ai nai tla. Ref 34:21 Theu 20:9-10; 23:12, 31:15, 35:2, Lev 23:3, Leu 5:13-14*
22 “Chajai choh tyn angchei nai neng khala changtha la pawi so u ly thengthai pakym achu nai kaseih neng y, chohboleh pawi sa ai nai tla.Ref 34:22 Lev 23:15-21, 39-43; Kati 28:26-31*
23 “Nangchi i cheng neampacho bawibawichi ly sanengrei y tlen thomrei, Israelachi i Tameuh Kai, Areng teng y jeu iy chiu ai nai tla.
24 Kai ly cheng takhrachi ai, nangchi tako nai lam i nai paryh pawn iy nangchi i pri kau hai chum nai khala, nangchi i Areng Tameuh mo y pawi kalen thomrei sa nai sala ly ami py nangchi ai ang tiu ai ny y.
25 “Kai teng y apathyp nai khala, tawnbawi hawi vanrei talam nai takora y angbo abawi moh sy; Katlen Vui nai Pawira y tleh nai tawnbawi mawi ly khawn mang khrairei, kamlai awm moh sy.” Ref 34:2 Theu 12:10*
26 “Saneng tleirei nangchi i li, hlaura i amti amjang chaluchi ai, nangchi i Areng Tameuh yhm y syn u ai nai tla.
“Beram cho, mi-i cho i ngan ly amhm i kanutui hawi byh ai nai tlo y,” napi.Ref 34:26 Leu 14:21; 26:2*
27 Areng my Mosi teng y, “Hini reita leu pei naichi ly tajiu typ; kai ly nang hawi py, Israela chengchi hawi py, hini reita leu pei nai kamta Leu Maikawm asa bo,” napi.
28 Mosi ly ati sai py cho nei y naimy kani y kani vui palyhrei, vum y vum vui palyhrei, hu y Areng hawi vanrei awm nai ne. Ni ly lengseaung phei nyhrei tleaung y Leu Maikawm, napi nai Leu sai Horei tajiu typ bo.
Mosi Sinai mawi salo i satla kathiu nai
29 Mosi ly Leu Maikawm lengseaung phei nyhrei syn iy Sinai mawi salo i satla kathiu nai khala, ni ly Areng hawi leu arum nai deaungkho y, ni i meimai ly khri pa-rei angvang na; na i py mymy ly apany y leang.Ref 34:29-35 2 Kor 3:7-16*
30 Aron hawi Israela cheng bawibawichi ly Mosi i meimai angvang nai niu baly, ni i sahawi y ahai u vam y.
31 Na i py Mosi my Aron hawi Israela cheng lu sa nai bawibawichi ai palau i, nichi ly Mosi teng y chei u; naibaly Mosi ly nichi ai leu arum hai bo.
32 Naibaly Israela cheng bawibawichi ly Mosi teng y chei u i, taki teungtareung u bo. Huna nai khala Mosi ly Sinai mawi salo y, Areng my leu pei nai bawibawichi ai, nichi teng y thui pi pateang bo.
33 Mosi ly Israela chengchi hawi leu arum pajau nai khala, my i meimai y amymra hawi amym vui bo.
34 Mosi ly Areng hawi leu arum ai nai Areng i awmra Tabynako theung y kun nai tleirei, meimai amym nai ly alei vui reng nai ne; theu teang nai khala Areng i leu pei nai ngiereichi, Israela chengchi teng y amti pi ali teang bo.
35 Huna nai khala Israela chengchi ly ni i meimai angvang nai niu u; hunai deaungkho y ni ly Areng hawi leu arum ai nai Tabynako theung y kun jo nai ryrei, ni i meimai y amymra hawi amym vui nai ne.