33
Sinai mawi dengdairei tako bi ai nai leu pei nai
1 Areng my Mosi teng y, “Nang ly Aikupta pri i dengdairei pahawi nai khumichi hawi vanrei, hini meingtym i nai theu iy kai ly Abraham, Isaka, Jakob hawi nichi i kangpreangchi teng y pei ai adeu nai pri y chei u. Ref 33:1 AA. 12:7; 26:3; 28:13*
2 Nangchi ai lam patei ai nai Angel ai kaimy pato pi ai. Kanan cheng, Amori cheng, Hiti cheng, Perizi cheng hawi Jebusi chengchi ai kaimy patheu pawn ai.
3 Nangchi ly cha nei avaw y iy pa-tiu khuta hawi nai pri kahawira kang tha ai. Na i py nangchi ly paleung tang nai khumichi ne nai y, lam sala y nangchi ai kang tamyh pawn lawh na i, kaimy kypkyp ly nangchi hawi vanrei chei y leang,” napi.
4 Israela chengchi ly huna nai leu pei nai thai nai khala paleung mawn u i, vang kateng ateaungchi ateaung u y bo.
5 Areng my Mosi dengdairei Israela chengchi teng y, “Nangchi ly paleung tang nai khumi ne; kai ly nangchi hawi kani tanareichy chei hai lawh baly, nangchi ai kang padei chauchau ai; vai ly nangchi i vang kateng ateaungchi aleng u; huna khala naini, kai ly nangchi ai mana kang sa hai ai mo, nanai dawn pi ai,” napi.
6 Hunai deaungkho y Israela chengchi ly Sinai mawi i dengdairei theu u nai bo y, vang kateng ateaungchi ateaung u bi y leang bo.
Areng i awmra Tabynako
7 Israelachi tai naira tleirei y Mosi ly Tabynako ai, tai naira i angam mang, kamlo kyhra y sa reng nai ne. Huni ai ly Areng i awmra Tabynako, nanai amyn pathi; ami py ne sy, Areng i kangai pany ai ngai nai khumi ly Areng i awmra Tabynako mang y chei ai nai tla.
8 Mosi ly Tabynako mang y chei nai tleirei, khumichi ly mychi tai mo y angdo u iy Mosi Tabynako theung y kun nai pa-rei, khen patawm u reng.
9 Mosi Tabynako theung y kun phai kun baly, tamai angjawi tla kathiu i, Tabynako katheu pa-kho y beu bo. Areng ly tamai theung mang Mosi hawi leu arum nai ne.
10 Khumi bawibawichi ly Tabynako katheu pa-kho y tamai beu nai niu baly, lu meung iy chiu u bo.
11 Naibaly Areng hawi Mosi ly ahawi kamrawi tengtawi leu arum nai kamta mo atha leungtang naimy leu arum hawi. Huni bo y Mosi ly tai mang y vawi ali teang bo. Na i py mymy ai sabawm nai keung thawndeang leaungrei, Nun i chapo Josua ly Tabynako theung y awm jo nai ne.
Areng ly mymy i khumichi hawi vanrei awm ai nai adeu nai
12 Mosi my Areng teng y, “Nang ly kai ai hini khumichi ai pahawi ai nai leu pei nai ly teng khyp; na i py kai hawi vanrei ami ai pato ai mo, nanai ly leu pei y nai ne. Nangmy, ‘Nang ai hawihai palai kang pany, nang ai paleung kang no,’ nanai thui bo.
13 Nang ly kai ai paleung no na baly, kai ly nang i kalop sa iy nang i paleung kangai sa thai ai nai, nang i sa ai dawn tau naichi thui pi kyh. Hini khumichi ly nangmy vawi takhra nai khumichi ne, nanai py pany pi kyh,” napi.
14 Huna nai khala Areng my, “Kai ly nang hawi vanrei chei iy, nang ai eaung naira kang pei ai,” napi.
15 Mosi my, “Nang ly kai hawi vanrei chei hai y baly, kaichi ai hini meingtym i nai theu hai mo kyh.
16 Nang ly kaichi hawi vanrei chei hai y lawh baly, nang ly nangmy i khumichi hawi kai ai paleung no, nanai ami pany thai ai mo? Nang ly kaichi hawi vanrei awm hai khala naini, kaichi ly khaileaung pri i cheng takhrachi hawi amtleh nai amny ai,” napi.
17 Areng ly Mosi teng y, “Kai ly nang ai hawihai palai pany iy paleung kang no nai deaungkho y, nang i hnei nai kamta kang sa pi ai,” napi.
18 Hunaibaly Mosi my, “Nang i kangvang nang parai nai sangso niu ai nai pei kyh,” nanai takeng.
19 Areng my, “Kai i nang parai nai ngierei nang ai patei iy kai i amyn kachai py, nang teng y amteng hai ai; kai ly Areng ne; kaimy vawi takhra nai khumichi teng y, tamen naira hawi pahen naira kapatei reng nai ne. Ref 33:19 Rom 9:15*
20 Kai ai niu nai khumi ly heng ai ny y nai deaungkho y, nang ai kai i meimai kang patei ai ny y.
21 Na i py kai i sahawi y awm nai lengseaung saleung y angdo.
22 Kai i nang parai nai kangvang sangso ko nai khala, kai ly nang ai lengseaung ka-ko sala y kang khai iy, kai katlen vui y ryrei ly nang ai kai i kiu hawi kang tamym vui ai.
23 Naibaly kai i kiu la vui ai i, nang ly kai i nithun anam niu ai khyh; na i py kai i meimai ly nang niu ai ny y,” napi.