32
Muku si cho myn
(Leu 9:6-29)
1 Mosi ly mawi anui y satlo y naimy, mawi salo y kra parai pa-rei awm nai khala khumichi ly Aron teng y chei achu pariukhiu iy, “Kaichi ai Aikupta pri i dengdairei pahawi nai Mosi ly ati mana lawh mo, nanai kaichi pany y nai deaungkho y, kaichi ai pahawi ai nai tameuh harei so pi kyh,” nanai takeng u.Ref 32:1 Amtaw 7:40*
2 Aron my nichi teng y, “Nangchi i ajuchi hawi cho chanauchi ateaung nai muku kanochi aleng iy kai teng y jeu hai u,” napi.
3 Hunaibaly khumi bawibawichi ly mymychi i muku kanochi aleng iy Aron teng y pei u.
4 Aron my muku kanochi ai patlawn iy muku hawi si cho myn sa bo.Ref 32:4 1 Areng 12:28, Ataw 7:41*
Naibaly khumi mipuichi my, “Israelachi awi, hini tameuh ly achi ai Aikupta pri i dengdairei pahawi nai keung, achi i tameuh ne he!” napi.Ref 32:4 1 Areng 12:28, Ataw 7:41*
5 Naibaly Aron ly muku si cho myn mo y maicham sa iy, “Khawndam ly Areng ai tahm khai nai pawi sa u ai nai tla,” nanai satang thai hai bo.
6 Kani pa-nyh khawn angthodyh y khumi bawibawichi ly leng patlum nai kapathypra hawi leunghawi kapathyprachi talam u bo. Huna nai apathyp u chum baly nichi cha nei pavui u i, neampacho, neampachychi amau u bo. Ref 32:6 1 Kor 10:7*
7 Areng my Mosi teng y, “Mawi anui y satlo kaliki ly Aikupta pri i dengdairei pahawi nai nang i khumichi ly kai ai paleang u vui bo.
8 Nichi ly kai i reita lam i nai hi u vui bo; muku hawi si cho myn sa iy huni myn y apathyp i, chiu u bo. Huni tameuh ly nichi ai Aikupta pri i dengdairei pahawi nai tameuh ne, nanai aeu u sau na bo,” napi.
9 Areng my, “Hini khumichi ly khri pa-rei paleung tang, nanai kai pany.
10 Kai ai paka moh; kai ly kado theu i, nichi ai katamyh pawn ai. Naibaly kai ly nang hawi nang i kangpreangchi ai khumi cheng kalen kang lawm hai ai,” napi.
11 Na i py Mosi ly my i Areng Tameuh teng y khri pa-rei ahui naimy takeng nai ly “Aw Areng, nang ly Aikupta pri i dengdairei sa thai naira len parai nai hawi atleu pi nai, nang i khumichi ai khri pa-rei kado theu hai lawh ai bo a?Ref 32:11-14 Kati 14:13-19*
12 Aikupta chengchi my, nang ly Israela chengchi ai mawichira pahawi iy tamyh be ai nai, Aikupta pri i dengdairei pahawi nai teu, nanai thui y ai a? Kado theu hai me mo ly paleung amnym kyh jemjem ba; nang i khumichi tlang tleaung y pajeng naira tym hai mo kyh.
13 Nang i miseaung Abraham, Isaka hawi Jakobchi ai pany pi jo kyh; nang ly nichi i kangpreangchi ai kani mang i ka-sichi kamta peung hai ai, nanai hawi, nangmy adeu hai typ nai huni pri bawibawi ly nichi i kangpreangchi amtym jojo ai nai, nanai pany pi ba,” nanai ahui pi bo. Ref 32:13 AA 17:8; 22:16-17*
14 Naibaly Areng ly kado katheu rym i, mymy i khumichi ai pajeng y naimy lawi hai bo.
15 Mosi ly makeng nyhrei ririra y reita leu pei naichi tajiu typ nai lengseaung phei nyhrei syn iy, mawi i nai satla kathiu bo.
16 Huni lengseaung phei nyhrei hawi, huni salo y tajiu naichi ly Areng i kuchi ne.
17 Josua ly khumi mipuichi i aeu nai katyn thai nai khala Mosi teng y, “Tai naira mang aeu nai katyn amsau taw nai kathai lawh ly” napi.
18 Mosi my, “Kai i thai nai katyn ly tavai eaung nai katyn py ny y, tavai sum vo hang nai katyn py ny y, khulym thui nai raawi katyn teu,” napi.
19 Mosi ly tai naira kang sa y tym nai khala, si cho myn hawi khumichi lam lengleang nai niu baly, khri pa-rei kado theu nai deaungkho y, my i syn nai lengseaung phei nyhrei ai mawi kheutang y aphi su i, tleu piu bo.
20 Ni ly nichi i sa nai si cho myn ai patlawn vui i, teipei pa-rei deng iy tui hawi kanu khala, Israela chengchi ai nei hai bo.
21 Mosi my Aron teng y, “Hini khumichi ly nang deaungkho y huna tanrei len nanai kamngo sa ai nai nichi ly nang ai ati ang sa hai mo?,” nanai deng.
22 Aron my pathang nai ly “Kai ai kado theu hai lawh moh; hini khumichi ly hawi y naira sa ai nai, mana tanrei paleung ka-dawn len na mo, nanai nangmy pany yb nai ne.
23 Nichi ly kai teng y, ‘Aikupta pri i dengdairei kaichi ai pahawi nai keung Mosi ly dei mo, heng mo py kaichi pany y nai deaungkho y, kaichi ai pahawi ai nai tameuh harei so pi,’ nanai ang takeng.
24 Kaimy nichi teng y, ‘Nangchi i muku ateaung alangchi aleng iy kai ai pei,’ kanapi. Kai ly nichi teng i nga nai muku ateaungchi mai y patlawn i, hini si cho myn lawm bo!,” napi.
25 Israela chengchi ly tengpang sahawi i paleung ka-echi my cheh ai naira lawm i, Aron my atho sa hai nai molam y, pakym paka lei y na pa-rei lang lengleang, nanai Mosi ly niu nai ne.
26 Hunaibaly Mosi ly tai naira apai katheu pa-khora angdo iy, “Areng i khumichi awi, kai teng jeu u!, nanai athorei my palau bo. Huna nai khala Levi theaungchi ly Mosi teng y chei u achu i,
27 Mosi my nichi teng y, “Israela chengchi i Areng Tameuh my, ‘Nangchi khumi luteng ly haisau syn iy, tai naira apai pa-kho tleirei y chei u bawibawi ly nangchi i amjo amnau, ahawi ka-dawi, yhm deaungpachi ai tleh u,’ nanai leu ang pei,” napi.
28 Levi theaungchi ly Mosi i leu pei nai tangai u i, huni kani y khumi leaung sang thomrei tahm tleh u bo.
29 Naibaly Mosi ly Levi theaungchi teng y, “Vaini nangchi ly nangmychi i chapo kypkyp, amjo amnau kypkypchi ai tleh nai deaungkho y, Areng i kalop sa ai nai pathyp pi nai keung y, nangmychi naimy aau u nai bo; hunai y Areng ly nangchi ai amtheaung hai bo,” napi.
30 Kani pa-nyh y Mosi my Israela chengchi teng y, “Nangchi ly khri pa-rei kamngo sa tamang u bo. Vai, kai ly Areng awm nai mawi salo y lyn kalau ai; nangchi i kamngo lawira nga ai nai takeng pi ai i, nga tan nga lym ai,” napi.
31 Mosi ly Areng teng y chei ali teang i, “Hini khumichi ly khri pa-rei kamngo sa tamang u bo; muku tameuh myn sa iy chiu u lawh bo.
32 Nichi i kamngo pahen pi kyh; na i py nichi i kamngo pahen pi y ai na baly, nang i khumi amyn tajiu nai cha-iu theung i nai, kai i amyn taphra vui teu,” nanai takeng bo. Ref 32:32 Sam 69:28, Amtaw 3:5*
33 Areng my, “Kai i tlang tleaung y kamngo sa nai khumichi i amyn naini kaimy i cha-iu theung i kataphra ai.
34 Vai chei iy nang teng y kang thui pi nai meingtym y tym pa-rei nichi ai pahawi; kai i angel my nang ai lam patei ai; na i py hini khumichi i kamngolai kapajeng ai nai neng tym ai mang,” napi.
35 Hunai deaungkho y Areng ly Israela chengchi tlang tleaung y no kanghawi tym hai bo; huni ly nichi my Aron ai si cho myn sa hai lawh nai deaungkho y ne.