31
Areng i awmra Tabynako sa ai nai kupe kakawpchi
(Theu 35:30-36:1)
1 Areng my Mosi teng y,
2 “Kai ly Juda theaung theung i Hura i katu, Uri i chapo Bezelela ai vawi yb bo;
3-5 Ni ly muku, tangka, kheupajachi ai khen hawi iy ka-pu sa kawp nai, vang kateng lengseaungchi kata iy palum kawp nai, dengkeaung mawi o-pangen kawp nai, napi nai huni kalopchi kawp katlen hai ai nai, kai ly ni teng y sa thai naira kapei nai ne.
6 Kai ly ni ai sabawm ai nai Dan theaung theung i, Ahisama i chapo Aholiaba ai kavawi yb bo. Kaimy leu pei nai ngiereichi sa thai ai nai, takhra kupe kakawp bawibawichi ai py, khri pa-rei sa thai naira kapei nai deaungkho y,
7 nichi ly kai i awmra Tabynako, Leu Maikawm Pawm hawi khym, Tabynako theung i ateaung alang bawibawichi,
8 sabawi hawi huni i ateaung alangchi, muku maisi yhm kateang hawi huni i ateaung bawibawichi, rimui mui katui patawira maicham,
9 leng patlum naira maicham hawi huni i ateaung alangchi, rahum hawi panuira,
10 Aron hawi ni i chapochi pathyp pi nai kalop sa nai khala y amthyp ai nai, rym-ah awm nai pathyp pi nai keung ateaungchi,
11 tahm palyn nai asitui hawi meingtym kachaira i vui rimui mui katuichi py, sa u thai ai nai ne. Kaimy nang ai leu kang pei nai kamta, nichi ly huni bawibawichi sa u ai nai tla,” napi.
Anawn kani
12 Areng my Mosi ai Israela chengchi teng y thui hai nai ly
13 “Kai i Anawn kani y ja ai nai tami u moh; Anawn kani ly Kai, Areng my nangchi ai, kai i khumi y vawi takhra nai ne, nanai katu chanau deung kangthau khrairei, pany jo ai nai ka-ma-ra ne.
14 Anawn kani ly ja ai nai tla; ati mana nai mo na baly huni kani ly khai takhra nai kani ne nai deaungkho y, ja ai nai tla. Anawn kani y ja y naimy kalop sa nai khumi ai ly padei takengkei ai nai tla.
15 Nangchi ly kani tariurei sala y kalop sa ai nai nga; na i py saryh kani ly Areng i vui au patyp nai anawn kani ne; huni kani y kalop sa nai khumi ai ly padei takengkei ai tla.Ref 31:15 Theu 20:8-11; 23:12; 34:21; 35:2; Lev 23:3, Leu 5:12-14*
16 Israela chengchi i vui Anawn kani ly Leu Maikawm sa nai ka-ma-ra ne i, ja ai nai tla.
17 Huni ly kai hawi Israela chengchi sala khaw hai nai ka-ma-ra ne; ati mana nai mo na baly Kai, Areng my kani tariurei sala y kani hawi khaileaung ai sa nai ne i, saryh kani y ly kalop so y naimy kai anawn bo,” napi.Ref 31:17 Theu 20:11*
18 Tameuh ly Sinai mawi salo y Mosi teng y, leu pei chum nai khala, Tameuh mymy kypkyp my lengseaung phei nyhrei tleaung y reita leuchi tajiu pi iy, Mosi teng y pei pi nai ne.