30
Rimui patawi nai maicham
(Theu 37:25-28)
1 “Rimui patawi ai nai maicham ly Akasia dengkeaung ngan hawi so.
2 Huni ly maicham ly jeng ka ka-meaung, jeng miurei, ka miurei hawi ka-sang miu nyhrei awm ai nai tla. Maicham kachawn taki kamsuichi ly maicham hawi amtawn prei ai nai tla.
3 Maicham kangbai, teng ka-ki, kachawn takichi ai muku paleaung ai nai tla. Maicham teng ka-ki muku hawi mawm ai nai tla.
4 Maicham i makeng nyhreira y samtleangchi thawi ai nai muku sengtleng nyhrei tai ai nai tla.
5 Samtleangchi ly akasia dengkeaung ngan hawi sa iy, muku paleaung ai nai tla.
6 Leu Maikawm Pawm mo i kanih ali jang nai angam mang y, huni maicham khai ai nai tla. Huni meingtym y kai ly nang hawi avum ai.
7 Aron ly khawn tleirei maisi thawn ai nai sa nai khala y, maicham salo y rimui mui katui patawi ai nai tla.
8 Ni ly dym mang y maisichi thawn nai khala py, rimui mui katui patawi ai nai tla. Nang i katu chanau deungrei rimui mui katui talam nai ly Areng i mo y avaw by y pa-rei sa jojo ai nai tla.
9 Huni maicham salo y ly patawi ngau y nai rimui talam ai nai avo y. Tawnbawi ai mo, teicha teinei mo py talam ai nai avo y. Kreip hang talam nai py leih ai nai avo y.
10 Aron ly sanengrei y tlenrei, kamngo ahui nai tawnbawi thi hawi maicham kachawnra i taki kamsui palyhreichi ai py kaleu iy, maicham kachai sa ai nai tla. Nang i katu chanauchi ly huni reita ai saneng tleirei sa jojo ai nai tla. Huni maicham ly Kai, Areng i vui au nai chai keh nai maicham ne,”
Areng i awmra Tabynako i vui akeu pei nai
11 Areng my Mosi teng y,
12 “Nang ly Israela chengchi i amyn la nai khala, amyn la nai thym y nichi teng y khrukhra naira avum y ai nai, Areng teng y khumi luteng aau ai nai tla.
13 Amyn la naira y abawi nai khumichi ly pei ai tla nai khumi akeu tangka ly neh iy pei ai nai tla. Khumi luteng huni akeu tang ka kai teng y talam ai nai tla. Ref 30:13 Theu 38:25-26; Mt 17:14*
14 Saneng apomrei hawi saneng apomrei leng amyn la naira y kup nai khumichi ly kai teng y akeu pei ai nai tla.
15 Areng teng y nangchi i khumi akeu pei nai khala, Khumi kanang py ne sy, khumi kamawn py ne sy, pei ai nai tla nai akeu tleaung y nawi py nawi y, di py di y, hujirei pei khyp ai nai tla.
16 Nang ly Israela chengchi teng i, huni akeu tangka pangym achu iy kai i awmra Tabynako kry ai nai i vui teaung ai nai tla. Nangchi i khumi akeu pei nai tangka saho y, Areng ly nangchi tlang i vui ama hai ai, nanai pany jo ai,” napi.
Kheupaja rahum
17 Areng my Mosi teng y,
18 “Kheupaja panuira awm nai kheupaja rahum sa ai nai tla. Huni kheupaja rahum ly kai i awmra Tabynako hawi maicham sala y khai iy, tui kadeng ai nai tla.Ref 30:18 Theu 38:8*
19 Aron hawi ni i chapochi ly mychi i kiu kheuchi, huni rahum i tui hawi asi u ai nai tla.
20 Nichi ly kai i awmra Tabynako theung y kun y rai khala py ne sy, maicham salo y katalamrachi talam y rai kha py ne sy, huna nai kiu kheu asi u baly dei ai ny y.
21 Nichi hawi nichi i kangpreangchi ly huni reita patawm jojo ai nai tla,” napi.
Tahm palyn nai asitui
22 Areng my Mosi teng,Ref 33:22-38 Theu 37:29*
23 “Mura hang sie holai palyhrei, sinamon mui katui sie saryhrei, lawitheng sie saryhrei;
24 kassia sie holai palyhrei napi nai hawi keh nai mui katuichi ai (ka-vo khai yb nai kaji jirei neh ai nai) olive asitui palang tariurei hawi katlen iy,
25 rimui kamta tahm palyn nai asitui so.
26 Hini tahm palyn nai asitui teaung iy kai i awmra Tabynako hawi Leu Maikawm Pawm ai py,
27 sabawi hawi huni i ateaungchi ai py, maisi yhm ateaung hawi huni i ateaungchi ai py, rimui patawira maicham ai py,
28 leng patlum nai maicham hawi huni i ateaung ngiereichi py, rahum hawi panuira py, huni rimui hang hawi pajui ai nai la.
29 Hunichi ai hina nai kamta talam nai deaungkho y, chai keh hai ai nai tla. Hunichi ai abi nai ngierei ly pajeng naira avum ai.
30 Naibaly Aron hawi ni i chapochi ai kai i kalop sa nai pathyp pi nai keungchi lawm ai nai, nichi ai rimui hawi leih iy tahm palyn pi.
31 Israelachi teng y hina nai leu pei; kai i kalop sa ai nai tahm palyn naira y nangchi i katu chanau deung kangthau khrairei, hini asitui kachai teaung ai nai tla.
32 Huni asitui ly khumi rumrangchi tlang tleaung y leih ai nai tlo y; huni asitui ka-tawm py sa ai nai tlo y. Huni asitui ly kachai ne i, asitui kachai, nanai palawn ai nai tla.
33 Khumi ami py ne sy, huni asitui ka-tawm sa nai mo, pathyp pi nai keung ny y nai khumi tlang tleaung y, huni asitui leih nai mo, sa lawh baly, kai i khumi theung i nai nyn va vui ai,” napi.
Rimui mui katuichi
34 Areng my Mosi teng y, “Rimui mui katuichi napi nai state, onykha, kalbanum hawi kathan katli tangchengchi ai kaji kangngeng riri neh ai nai tla.
35 Rimui sa nai kamta huni mui kahawichi ai rimui mui katui so; chaipyn iy tangcheng lawm ai nai palawi thiu ai nai tla.
36 Huni mui katuichira i phyrei ai teipei pa-rei deng iy, kai i awmra Tabynako theung, kai i mo y syn ly Leu Maikawm Pawm mo y phui ai nai tla. Huni rimui mui katui ai chai keh nai rimui mui katui palawn ai nai tla.
37 Nangmychi teaung ai nai ly huni rimui sa nai kamta sa ai nai tlo y; huni rimui mui katui ly kai i vui talam nai ne i, rimui mui katui kachai palawn ai nai tla.
38 Huni rimui mui katui ai amy i vui mui kahawi sa nai khumi ly kai i khumi theung i nai nyn va vui ai,” napi. Ref 30:22-38 Theu 37:29*