27
Maicham sa ai nai
(Theu 38:1-7)
1 “Maicham ly Akasia dengkeaung ngan hawi sa ai tla. Huni maicham ly jeng miu pangrei, ka miu pangrei, ka-sang ly miu thomrei awm ai nai tla.
2 Maicham taki palyhreira y, taki ka-tawm kamsui palyhrei sa ai nai tla. Huni takichi ly maicham hawi amtawn iy, hinichi ai ly kheupaja hawi mawm ai nai tla.
3 Maidym hawi thau patengra laawm, khaileaung chawn, rahum, leangkhawn, mai-ai patengra laawm napi nai maicham ateaung ngierei ly kheupaja hawi sa bawibawi ai nai tla.
4 Maicham i vui kheupaja rumryh sa ai nai tla; huni rumryh takichira y ly kheupaja sengtleng palyhrei tai ai nai tla.
5 Maicham ka-sang laileaungra y rumryh tai ai nai tla.
6 Maicham ajeaung ai nai Akasia dengkeaung ngan hawi samtleang sa iy, huni samtleang ai ly kheupaja hawi mawm ai nai tla.
7 Maicham ajeaung ai nai samtleang ly maicham takira tai yb nai sengtlengra thawi prei yb ai nai tla.
8 Kaimy nang ai mawi saleung y kang patei yb nai kamta, maicham ly palauhau pa-rei dengkeaung ngan hawi sa ai nai tla.
Tabynako apai sa ai nai
(Theu 38:9-20)
9 “Kai i awmra Tabynako ai kalang mai ka-syn kanih hawi jang ai nai tla; tokalawi ngan mang y jang ai nai kanih ali hang nai ly miu chungvairei awm ai nai tla.
10 Huni kanih ali hang nai jang ai nai yhmmawm apomrei, panuira apomrei ai py, Kheupaja hawi sa iy leangkhawn hawi katlangchi py tangka hawi sa ai tla.
11 Tosyh ngan mang y py, hunai kamta kanih ali jang ai nai tla.
12 Tabynako nidym ngan mang i apai ly miu vui pangrei sau nai kanih ali jang ai nai chengheng horei hawi panuira horei py sa ai nai tla.
13 Tabynako kunra nisi ngan mang tapang nai ly miu vui pangrei awm awm ai nai tla.
14-15 Kunra pa-kho i mang mang py, miu holai pangrei sau nai kanih ali hang nai hawi chengheng thomrei, panuira thomrei awm ai nai tla.
16 Tabynako apai katheu pa-kho i vui y kanih ali jang nai ly jeng miu apomrei awm iy beram mui an kamngau, an kamleng, an kamsen, kalang amai ka-synchi hawi aneng iy, kaseaung pau myn thun ai nai tla. Huni kanih ali hang nai ai panuira palyhreira y leng nai chengheng palyhreira y jang ai nai tla.
17 Tabynako ka-kira i chenghengchi ai tangka katlangchi patawm prei iy, leangkhawnchi ai tangka hawi py, panuirachi ai tangka hawi py sa ai nai tla.
18 Tabynako apai ly jeng miu chungvairei, ka miu vui pangrei, ka-sang ly miu pangrei awm ai nai tla. Kanih alichi ai kanih mai ka-syn hawi py, panuirachi ai kheupaja hawi py sa ai nai tla.
19 Tabynako i vui ateaung alang bawibawichi py, Tabynako hawi huni ai tapang ai nai khangmui ngiereichi py, kheupaja hawi sa ai nai tla.
Maisi yhm teaung ai nai sai
(Lev 24:1-4)
20 “Dym tleirei maisi yhm thawn pajau ai nai molam, hawi keh nai olive asitui syn u ai nai Israela chengchi teng y thui pi.
21 Aron hawi ni i chapochi ly Areng i awmra Tabynako theung i Leu Maikawm Pawm y tapang nai kanih ali hang nai angam mang y, huni maisi yhm ly dym mang dengdai khawn mang khrairei, Areng i mo y thawn ai nai tla. Israela chengchi hawi nichi i kangpreangchi ly huni reita patawm jojo ai nai tla.