26
Areng i awmra Tabynako
(Theu 36:8-38)
1 “Kai i awm naira Tabynako ly kanih mai ka-syn, beram mui kamsen, an kamlengchi hawi kanih ali hang nai horei aneng ai nai tla. Huni kanih alichira y kheruben mynchi thun ai nai tla.
2 Huni kanih alichi ly jeung kasau miu apom phai tajarei, ka kangdai ly miu palyhrei awm riri ai nai tla.
3 Huni kanih ali hang nai pangrei y kanih ngan harei kamta hui tabi ai nai tla; takhra ali pangrei py huna nai kamta sa ai nai tla.
4 Hui tabi nai kanih ali hang nai jeung jeungreichi i teng mang y, kalang kamngau tlahachi sa ai nai tla.
5 Kanih ali pangrei hui tabi nai angchei kanih jeungrei i teng mang y tlaha vui pangrei, kanih ali hang nai pangrei hui tabi nai pa-nyh i kanih jeungrei i teng mang py, tlaha vui pangrei ka-tli thai ai nai tla.
6 Huni kanih ali hang nai jeung nyhrei ai kanih jeungrei palawn thai ai nai muku sengtleng vui pangrei so.
7 “Tabynako tabiu ai nai kanih jeung holai harei ly mi-i mui hawi aneng.
8 Kanih jeungrei y jeng kasau miu phairei, ka ly miu palyhrei awm ai nai tla.
9 Huni kanih jeung pangrei y kanih jeungrei hawi, kanih jeung tariurei y jeungrei palawn nai hawi hui tabi ai nai tla. Pa-nyh i hui tabi nai kanih jeung ai ly Tabynako i mo mang y tlip typ iy khai ai nai tla.
10 Angchei i hui tabi nai kanih jeungra i kangkhym kanih ali thang nai tengra y tlaha vui pangrei, pa-nyh i hui tabi nai kanih jeungra i kangkhym kanih ali thang nai tengra y tlaha vui pangrei tai ai nai tla.
11 Huni kanih jeung nyhrei tabi mei iy Tabynako tabiura lawm ai nai kheupaja leangkhawn vui pangrei sa pajau baly, tlahachira y vawn ai nai tla.
12 Tabynako tabiu nai kanih tawm kamlai ly nithun mang y palajai ai nai tla.
13 Kanih jeung jeng kasau tabiu nai kamlai miurei nai ly Tabynako i kup mang y pala kathiu ai nai tla.
14 “Amphu sambeu tabiu bi ai nai tla; angchei i nai ly an kamsen pathym nai beram katai peih hawi tabiu iy, salo keh i tabiu nai ly suirei nai mawi peih hawi sa ai nai tla.
15 Huni Tabynako khaw typ ai nai, thaneaung pjeng hawi pado ai nai tla.
16 Huni kangdo ly miu horei, ka ly miurei bo ka-rei awm riri iy,
17 huni pjeng tengtawi tabi thai ai nai pjeng dawn tleirei, makeng mang ly palai, makeng mang ly leaungkeu sa ai nai tla.
18 Tabynako tokalawi ngan mang i kavui pado ai nai dawn apomrei sa ai nai tla.
19 Pjeng dawn ha harei i anui mang y awm nai kheu nyh nyhreichi i vui, tangka phainai vui palyhrei sa ai nai tla.
20 Tabynako tosyh ngan mang i kavui pjeng dawn apomrei hawi,
21 pjeng dawn ha harei anui y, tangka panuira phainai vui palyhrei sa ai nai tla.
22 Huni Tabynako nidym ngan mang i kavui padora dawn tariurei sa ai nai tla.
23 Tabynako nidym ngan takichi i kavui padora nyhrei sa ai nai tla.
24 Huni taki padorachi ai kheutang dengdai salo mang khrairei, sengtleng hawi vawn typ ai nai tla. Taki nyhrei i vui py padora dawn nyhrei ai, hunai kamta sa teang ai nai tla.
25 Hunaibaly padora dawn tajarei hawi, ha harei i vui tangka panuira phainai nyh nyhrei, tangka phainai holai tajarei awm ai nai tla.
26 Tabynako i vui lengteaung holai pangrei ly thaneaung pjeng hawi so; Tabynako tokalawi ngan mang i kavui lengteaung pangrei,
27 tosyh ngan mang i kavui lengteaung pangrei hawi nidym ngan amtu mang i kavui pangrei sa ai nai tla.
28 Padorachi i umtang y khanglang nai lengteaungchi ly Tabynako mang katem y tym khrai ai nai tla.
29 Chengheng pjengchira y muku an paleaung ai nai tla; lengteaungchi py muku an paleaung ai nai tla; lengteaungchi thawi ai nai muku sengtlengchi tai ai nai tla.
30 Kaimy mawi salo y kang patei nai kamta Tabynako sa ai nai tla.
31 “An kamngau, an kamleng, beram mui kamsen, kanih mai ka-syn hawi aneng nai kanih ali so. Kanih alira y kheruben myn thun ai nai tla.
32 Kanih ali ai thaneaung yhmmawm palyhreichira y vawn ai nai tla; yhmmawmchi ai muku paleaung iy tangka phainai palyhreira y panui ai nai tla.
33 Kanih ali ai leangkhawn hawi jang chum baly, kanih ali hang nai nithun mang y lengseaung phei nyhrei awm nai Leu Maikawm Pawm khai. Kanih ali ly meingtym kachai hawi chai keh nai meingtym ai patleh takhra ai. Ref 26:33 Heb 6:19, 9:3-5*
34 Leu Maikawm Pawmra y khym tai ai nai tla.
35 Sabawi hawi maisi yhm ly kanih ali hang nai angam mang y khai ai nai tla; sabawi ly tosyh ngan mang y, maisi yhm ly tokalawi ngan mang y khai ai nai tla.
36 “Tabynako katheu pa-kho y jang ai nai beram mui kamsen, an kamleng, an kamngau, kalang kangleung amai ka-syn hawi aneng iy, kaseaung pau mawi ka-pu sa nai kanih ali hang nai harei py aneng ai nai tla.
37 Huni kanih ali jang ai nai i vui y thaneaung yhmmawm pangrei sa iy, muku leangkhawnchi tai ai nai tla; yhmmawmchi ai muku paleaung iy yhmmawm panuira pangrei ai py, kheupaja ngan hawi sa ai nai tla.