28
Pathyp pi nai keungchi i ateaungchi
(Theu 39:1-7)
1 “Nang i amjo Aron hawi ni i chapo Nadab, Abihu, Eleaza hawi Ithamachi ai palau. Nichi ly pathyp pi nai keung kalop sa u ai nai Israela chengchi theung i nai vawi takhra.
2 Nang i amjo Aron, pathyp pi nai keung i vui rym-ah awm iy apu parai nai ateaungchi sa pi ai nai tla.
3 Aron ly kai teng y pathyp pi nai keung lawm iy Kai i kalop sa pi thai ai nai, kaimy sa thai naira pei nai kupe kakawpchi ai palau iy, Aron i vui ateaungchi sa pi ai nai tla.
4 Huni khumichi my sa pi ai nai ateaung alangchi ly tang taang adangra ephod, baichu kangjiu, mawi-en thun nai baichu, lupeu hawi khobaichi ne. Huni ateaung alangchi ly nang i ngamjo Aron hawi ni i chapochi ai pathyp pi nai keung y, kai i kalop sa nai khala amthyp nai pathyp pi nai keung ateaungchi ne.
5 Kupe kawp nai keungchi ly aneng nai khala beram mui an kamngau, an kamleng, an kamsen, muku kalang, kanih mai ka-synchi tabawi ai nai tla.
6 “Ephod ai ly beram mui an kamngau, an kamleng, an kamsen, muku kalang, kanih mai ka-synchi hawi mawi-en sa ai nai tla.
7 Ephod taki kachawn nyhrei sui ai nai asavan nai vui nyhrei awm ai nai tla.
8 Tangtaang akawmra py, huni amjychi hawi sa iy ephod hawi patawm mei ai nai tla.
9 Vang kateng Mahura lengseaung nyhrei la iy, hunira y Jakob i chapo leaung holai nyhreichi i amyn tajiu ai nai tla.
10 Lengseaung harei y chapo leaung tariurei, katheang kalen ka-thui amynchi hawi, vai lengseaung hareira y huni bo i chapo leaung tariureichi i amyn tajiu ai nai tla.
11 Muku paitheng i kupe hawi lengseaung holai nyhreira y Jakob i chapo leaung holai nyhrei amyn tajiu typ iy, huni lengseaungchi ai ly muku kriu theung y khai ai nai tla.
12 Israela cheng holai nyhreichi ai pany jo ai nai, huni vang kateng lengseaung nyhrei ly paleang asavan nai ephod vuira y tai ai nai tla. Huna nai kamta Aron ly nichi i amyn ai paleang tleaung atheng nai deaungkho y, Kai, Areng ly kaimy i khumichi ai kang pany pi jo ai.
13 Muku kriu nyhrei sa iy,
14 muku jyn tavawi nai nyhrei ai ly muku kriu hawi hui tabi typ ai tla.
Tangtaang adangra
(Theu 39:8-21)
15 “Tameuh i kangai pany ai nai teaung nai tangtaang adangra ly pathyp pi nai keung kalen keh i vui so pi; tangtaang adangra ai ephod sa nai vawnsaichi hawi sa iy, huni ka-tawm mawi-en sa ai nai tla.
16 Tangtaang adangra ly tlip typ nai khala, jeng ka ka-meaung ka-rei awm ai nai tla.
17 Tangtaang adangra salo y vang kateng lengseaung lam palyhrei pajyn ai nai tla; angchei i lamra ly amia, topazi lengseaung hawi karnet lengseaung,
18 pa-nyh i lamra ly emerald, lengseaung, saphire lengseaung, diamond;
19 pa-thom i lamra ly huakintho lengseaung, kalkidon lengseaung, amethusto lengseaung;
20 palyh i lamra ly birula lengseaung, karnelian lengseaung, Jasper lengseaungchi ne. Hunichi ai ly muku kriu theung y khai typ ai nai tla.
21 Israela theaung holai nyhrei amyn ai, lengseaung holai nyhreira, ha harei y Jakob i chapo leaung leaungrei i amyn tajiu ai nai tla.
22 Tangtaang adangra i vui y muku vui leangchi so.
23 Tangtaang adangra tleng mang i taki nyhreira y leangkhawn tai nai muku sengtleng nyhrei tai ai nai tla.
24 Muku vui nyhrei ai sengtleng nyhreira y tai ai nai tla.
25 Takhra muku vui nyhrei ai muku kriu nyhreira tai nai deaungkho y, tangtaang adangra ai ephod asavan nai vuinawnchi hawi suichi ai nai tla.
26 Naibaly muku sengtleng nyhrei sa iy ephod hawi abira nai, tangtaang anui i takira y suichi ai nai tla.
27 Muku sengtleng nyhrei sa bi iy apu parai pa-rei aneng nai, tangtaang akawmra ka-neang, ephod mo i teng hyn nai sahawi y suichi ai nai tla.
28 Tangtaang adangra i sengtlengchi ai ephod i sengtlengchi, Kalang kamngau hawi suichi nai deaungkho y, tangtaang adangra ly ahaw y pa-rei tangtaang akawmra ka-neang y awm jo ai.
29 “Aron ly Meingtym Kachaira y kun nai khala, tangtaang adangra asavan ai nai tla. Tangtaang adangra y Israela theaungchi i amyn abawi nai deaungkho y Kai, Areng ly kai i khumichi ai kang pany pi jojo ai.
30 Aron ly kai i mo y jeu nai khala, Urim hawi Thummimnote 28:30\xk Urim hawi Thummim: Tameuh i kangai pany thai ai nai pathyp pi nai keungchi teaung nai vang kateng lengseaung amjy nyhrei ne. *\x* amthyp iy kun pajau ai nai, ni i tangtaang adangra y huni Urim hawi Thummim ai pacheang ai nai tla. Israela chengchi ly kai i kangai pany thai ai nai, Aron ly kai i mo y kun nai tleirei, huni tangtaang adangra amthyp ai nai tla. Ref 28:30 Kati 27:21; Leu 33:8, Ezara 2:63; Neh 7:65*
Pathyp pi nai keungchi i takhra ateaung alangchi
(Theu 39:22-31)
31 “Ephod anui y amchiu nai baichu kangjiu ly beram mui an kamngau hawi aneng ai nai tla.
32 Lu apaen ai nai kho awm ai nai tla; huni kho teng aphrai y ai nai aneng takhra nai kanih ngan hawi mawm typ ai nai tla.
33-34 Huni baichu kangjiu anui mang teng kamkira y an kamngau, an kamleng, an kamsen pathym nai beram mui, thaisi athai mynchi hawi muku syhryhchi pakhe iy tai ai nai tla.
35 Aron ly pathyp pi nai kalop sa nai khala y hini baichu kangjiu amthyp ai nai tla; Ni ly meingtym kachai kai i mo y kun nai khala py, hu i nai theu teang nai khala py, muku syhryh katyn kathai ai i, ni ly deira i nai law tleaung ai.
36 Muku phei harei sa iy, ‘Areng i vui aau patyp ai,’ nanai tajiu typ ai nai tla.
37 Lupeu ajeng nai salo y, huni muku phei ai vui kamngau hawi suichi ai nai tla.
38 Israela chengchi ly Kai, Areng teng y kapathypra talam nai molam y, jawi tamang nai awm lawh teu i py, huni katalamra ai kaimy kawn pi ai nai Aron ly lu kati y muku phei thangchi ai nai tla.
39 “Baichu hawi lupeu ai kalang mai ka-syn hawi aneng iy, khobai ly mawi ka-pu thun ai nai tla.
40 “Aron i chapochi ateaung ai nai rym-ah awm iy apu parai nai baichuchi, khobaichi hawi lukhym kasauchi aneng pi ai nai tla.
41 Huni baichu ateaung alangchi ai nang i amjo Aron hawi ni i chapochi ai hini ateaungchi amthyp hai; naibaly nichi ly kai i kalop sa nai keungchi lawm ai nai olive asitui leih iy, tahm palyn pi ai nai tla.
42 Nichi kangji ngo y ai nai akeng i ka-so phaibeung ryrei, phangphi kadawichi sa pi ai nai tla.
43 Aron hawi my i chapochi ly kai i awmra Tabynako theung y kun nai khala py, meingtym Kachaira y pathyp pi nai keungchi i kalop sa ai nai maicham sahawi y ahai nai kha y py, kangji nga iy dei y ai nai, huni phangphi kadawichi amchiu ai nai tla. Hini reita ly Aron hawi ni i kangpreangchi teaung patawm jojo ai nai tla.