25
Tabynako sa ai nai vui y talam nai
(Theu 35:4-9)
1 Areng my Mosi teng y,
2 “Israela chengchi ly kai teng y talam nai atitichi talam ai nai tla, nanai thui pi. Nang ly khumi lutengchi my, ngai parai naimy pei nai katalamrachi ly kawn pi ai nai tla.
3 Talam ai nai atitichi ly; muku, tangka, kheupaja,
4 kanih mai ka-syn, an kamngau, an kamsen jeaung, beram mui kamleng, mi-i mui hawi aneng nai kanih,
5 an kamleng pathym nai beram katai peihchi, mawi peih kangleung, thaneaung keung,
6 maisi hang, tahm palyn ai nai asitui hawi veang ai nai rimui mui kahawichi py,
7 pathyp pi nai keung kalen keh i pachiu nai ephod note 25:7\xk ephod: vang teng iy an amchai nai kanih ngan hawi sa nai ateaung ne. Hunira i baichu chakeura y Tameuh i kangai pany ai nai Urim hawi Thummim vawn amjy nyhrei pacheang yb nai ne. *\x*hawi tangtaang adangra y pathi ai nai vang kateng mahura hawi takhra vang kateng lengseaungchi ne.
8 Khumi mipuichi ly kai i vui Tabynako sa ai nai tla. Naibaly kai ly nichi theung y kaawm hai ai.
9 Nang ai kang patei nai kamta Tabynako hawi ateaung alangchi sa ai nai tla.
Leu Maikawm Pawm
(Theu 37:1-9)
10 “Pawm ly jeng miu nyh pa-thom ka-rei, ka kalen ly miurei bo ka-rei, ka-sang ly miurei bo ka-rei awm nai ai thaneaung keung hawi so u.
11 Huni ly theung mang py, angam mang py muku an paleaung hai iy teng ka-ki muku mawm hai typ ai nai tla.
12 Huni Pawm ajeaung ai nai muku sengtleng palyhrei sa iy taki palyhrei i kheuchira y, makengrei y sengtleng nyhrei sa bawi ai nai tla.
13 Thaneaung keung hawi ajeaungra samtleangchi sa iy muku mawm typ ai nai tla.
14 Pawm angjeaung ai nai samtleangchi ly Pawm y tai nai sengtlengchira y thawi yb ai nai tla.
15 Samtleangchi ai sengtlengchira i nai ajiu vui moh; thawi jo ai nai tla.
16 Reita leu pei naichi tajiu typ nai lengseaung phei nyhrei kang pei ai. Huni lengseaung phei nyhrei ai ly huni Pawm theung y khai ai nai tla.
17 Jeng miu nyh pa-thom ka-rei, ka ly miurei bo ka-rei awm nai Pawm khym ly muku tangcheng hawi sa ai nai tla.Ref 25:17 Heb 9:5*
18 Khym i mang mang kachawn y Kherubennote 25:18\xk Kheruben: pakhi awm iy heng nai amjychi. *\x*myn nyhrei ai muku tangcheng hawi sa ai nai tla.
19 Huni myn ly khym i kachawn nyhreira khym ngan y sa ai nai tla.
20 kheruben nyhrei i kadai nai pakhichi ly Pawm khymra y khiu ai nai tla; mo atha leungtang iy huni khym ai khen hai ai nai tla.
21 Lengseaung phei nyhrei ly Pawm theung y khai iy, khym typ ai nai tla.
22 Hunira y kai ly nangchi hawi avum ai; kai ly kheruben nyhrei khym salo y awm iy, Israela chengchi teng y leu pei ai nai ngiereichi ly nang teng y kang thui pi ai.
Tameuh teng talam ai nai tako khaira sabawi
(Theu 37:10-16)
23 “Thaneaung keung hawi jeng miu nyhrei, ka miurei, ka-sang miurei bo ka-rei awm nai sabawi harei so.
24 Huni sabawi ly muku tangcheng hawi paleaung iy, sabawi teng kamki ly muku hawi mawm typ ai nai tla.
25 Sabawi ka-ki kangdai peurei awm nai hawi mawm prei iy muku paleaung ai nai tla.
26 Sabawi taki palyhreichira i kheuchira y, muku sengtleng palyhrei tai ai nai tla.
27 Samtleang thawi ai nai sengtlengchi ly sabawi teng mawm nai anui y tai ai nai tla.
28 Samtleangchi ly thaneaung keung hawi sa iy, muku an paleaung ai nai tla.
29 Kreip hang talam nai khala y teaung ai nai, samtang, sora, chy-ychy hawi rahumchi ai ly muku tangcheng hawi sa ai nai tla.
30 Huni sabawi ly Leu Maikawm Pawm i mo mang y khai ai nai tla; kai teng y talam nai tako kachaichi py, sabawi salo y avaw y pa-rei khai ai nai tla.Ref 25:30 Lev 24:5-8*
Maisi yhm khaira
(Theu 37:17-24)
31 “Maisi yhm khaira ly muku hawi sa iy, maisi yhm kateang hawi kateang panuira ly muku hawi so; Huni maisi yhm kateangra y kaseaung paumyn, pau kangdai napi nai pau ka-puchi ly maisi yhm kateangra y sa tabi ryp ai nai tla.
32 Huni maisi yhm kateang phei pheirei mang y, kateangchy thom thomrei, bawibawi tariurei sa ai nai tla.
33 Kateangchy tariureichi ra i ha hareira y, kaseaung paumyn, pau kangdai abawi nai baden pau ka-pu pau thomrei awm ai nai tla.
34 Maisi yhm kateang meaungra y, paumyn, pau kangdaichi awm nai baden pau palyhrei awm ai nai tla.
35 Kateangchy thom thomrei sala y, kaseaung paumyn ha harei awm ai nai tla.
36 Kaseaung paumyn seangreang hawi maisi yhm kateangchi ai muku hawi sa patawm ai nai tla.
37 Maisi yhm panuira y maisi yhm saryhrei sa ai nai tla. Huni maisi yhmchira i kangvang ly mo mang y ko thai ai nai so.
38 Tangkeih hawi maidym khauchi py, muku tangcheng hawi sa ai nai tla.
39 Maisi yhm kateang hawi ateaung alangchi ai ly nai muku tangcheng sie horei hawi sa ai nai tla.
40 Kaimy mawi salo y kang patei nai ka-tawm khyp, sa ai nai dawn patyp ba.Ref 25:40 Amtaw 7:44; Heb 8:5*