5
1 Areng my, “Nang khumi cho awi, acho kachiu harei la iy nang i labeaung mui hawi sam vau pyn. Naibaly hunichi ai sie neh iy, kangngeng riri phy thomrei phy.
2 Phyrei ai ly Jerusalem mary y katanmeuh nai neng tem nai khala mary theung y mai veang. Takhra phy harei ai lo ly mary theung y amki iy haisau hawi tawpbaw pawn. Vai phy harei ai ly ali theung y pakheang veng. Kai ly huni phyrei ai pareng iy haisau hawi kalei ai.
3 Sam maidenrei ai ly nang i kanih tawnra y tapau iy kry me ba.
4 Huni bo y maidenrei la iy mai y veang veng. Huni samra i mai ly Israela cheng verei theung y ahei ai,” napi.
5 Sa thai naira awm nai Areng my, “Jerusalem mary ai khen cham; kai ly huni mary y pri neangneangchi ai taki teungtareung hai iy, khaileaung pri i umtang y khai bo.
6 Na i py huni Jerusalem mary i khumichi ly kai i leu pei naichi tangai y iy, cheng takhrachi tleaung y malawn py hawi y keh bo. Nichi ly tengpang sahawi prichira i khumichi tleaung y py, kai i reita ai akhi u bo. Jerusalem mary i khumichi ly kai i leu pei naichi khai su iy, kai i reita py patawm u y.
7 Aw Jerusalem mary, kai sa thai naira awm nai Areng my leu pei nai tangai ba. Nang ly tengpang sahawi i awm nai khumi chengchi tleaung y malawn py, khrukhra hai keh lawh. Kai i reita hawi leu pei naichi ai patawm y. Nang ly tengpang sahawi y awm nai khumi chengchi i awm nai tanrei malawn py by y.
8 Hunai deaungkho y kai, sa thai naira awm nai Areng my leu kang pei nai ly aw Jerusalem mary, kai ly nang i paleung ka-e ne i, khumi cheng cheaungkhangchi i mo y nang ai kang pajeng ai.
9 Ati mana nai mo na baly kai i paso nai mynchi molam y, nang ai kai ly jangni y kang pei vai y nai, vai mo mang py kang pei ali vai y ai nai pajeng naira kang pei ai.
10 Ref 5.10: Tng 4:10. Naibaly Jerusalem mary i amhm ampochi ly mymychi i cho chanauchi ngan cha u ai; cho chanauchi my py mychi i amhm ampochi i ngan cha u teang ai. Nangchi i dei kamthumchi ai py kai ly pajeng iy, meingtym tleirei y ahei hai ai.”
11 Areng my leu pei nai ly “Nangchi ly amso ngai nai cheaungkhangchi sa u iy, Achura yhm ai py chai hai y nai deaungkho y, kai ly Tameuh kangheng ne nai y, nangchi ai pahen y naimy kang tamyh pawn ai.
12 Nangchi theung i phy thomrei y phyrei khumichi ly marychi theung y no kanghawi, kajeu kanglam y dei u ai. Takhra phy thomrei y phyreichi ly mary angam mang y haisau tamo y dei u ai. Huni bo i phy thomrei y phyrei ai ly ali theung y pakheang pawn iy kaimy haisau hawi tleh ai.
13 Nang ly kai i kado theu nai rym y nai ryrei ly kai i kado theu naira angym pa-rei avum ai. Kai Areng ly nang i ka-ym by y nai molam y kado theu nai ne i, hina nai leu kang pei nai ai nang ly hini atitichi tym nai khala pany thai ai.
14 Tengpang sahawi i khumi cheng bawibawichi ly nang i sahawi mang aleaung u nai khala, nang i phra nai sai ai khen iy labeaung ang pi hai naimy asyn u pawn ai.
15 “Kai ly nang i tlang tleaung y khri pa-rei kado theu hai iy, no-ei pa-rei kang pajeng nai khala, tengpang sahawi i khumi cheng cheaungkhangchi ly jei athengra naimy, nang i amso ngai nai niu iy ang panui hai ai.
16 Kai ly nang ai teicha teinei avaw hai iy kanglam kang khai ai. Nang ly thailiho tamo kamta, khri pa-rei kanglam kamtang avum hai ai. Kai ly nang ai taphra ai.
17 Ref 5.17: Amt 6:8. Nang i cho chanauchi ai dei hai ai nai daichi mawi kasichi hawi cha nei takang nai py, nang ai padei ai nai no kanghawi khrukhra naira hawi tavai takaichi py kang pato ai. Hini ly kai, Areng i leu pei nai ne,” napi.